Juan Nu Chada Degaba Bitabokedale

Segunda Carta de Juan

Chada ai giti Juan me mo ka degu agwa ama mo ka jun kwian Chubenu chugagwalla juma, Juan chada ai degu kwian Chubenu mne gdaite alin, me chke uñale chege kwian Chubenu e toinga nga bainige.

Chada ai giti Juan kwian Chubenu ta gbu ama ulita mo ta dbadale no daba na ole, kaire Juan kwian ta gbu me geru ngwale gai ulia kwian daba tkanga tangle geru me uliage kle chage gerule kare.

1 Cha kwian Chubenu chugagwalla juma cha chada ai dege ba ulita mne gdaite Chube nu gaba alin:

Cha no no ba ulita ole, me cha alin no ba ulita ole, kwian na tanre kaire nu Chube gerua gaba ulia, ama ulita no no ba ulita ole. 2 Cha no no ba ulita ole ba Chube gerua ulia gau giti, che geru ulia Jesucristo giti molen mo tale kaire geru e be chege che ole diali chui tangle. 3 Cha takalin Chube che Ñenua kaire Jesucristo Chube Kirolla ama age no ba ulita alin, cha takalin ama tai dage ba ulitage kaire ama ta no kete bage toigda nga suga no ole, ene ba mo ta gbe toi ulia no trate kaire ba mo ta gbe no daba na ole.

4 Nga suga noare chadi ba gweale giti ba gweale kle toi no trate Chube gerua gerule kare, Chube che Ñenua geru ketu chege toi ama takalin kare giti, geru e kle degaba kare ba kle toi, malen e giti nga suga noare chadi ulia. 5 Cha no no ba ulita ole ba cha bitalla ulita Jesucristo giti, cha gerule ulia ba ole, cha takalin che ulita Chubenu mo ta dbe no daba na ole ongoru ongoru. Geru ai cha kle dege ba alin, geru ai me jagere dale, geru ai sbali kledubi gbaba geru ai amaña che keruchugubi gwangea che Jesucristo gerua gau chuiage. 6 Che no Chube ole che agedale ulita ama takalin kare ama gerua kle gbaba gerule kare. Geru e ba nu keruchugababi gwangea, geru e kle gerule che mo ta dbadale no Chube ole kaire mo ta dbe no daba na ole ulita.

7 Ulia cha gerule ba ole, nga ulita nga dba ai gitige kwian tanre daba tkanga tangle geru ngwale me uliage kle chage kwianske kwian anblite geru ngwalege, kwian e ulita kle gerule Jesucristo me chku dale ulia kwian kare nga dba ai giti. Kwian ene kare ulita me kle gerule ulia trate Jesucristo giti ama kle kwian anblite ama kle mo ta gbe age Cristo dollale. 8 Malen cha gerule ba ulita Chubenu ole, ba mo ta gbadale toi ta giti kwian e karege, Chube be age no ba alin ba toidu no ngeru ñanale, agwa ba kwian e kare gerua gai ulia, Chube mi age no ene ba alin. Agwa ba toi no ta giti Chube takalin kare me geru ngwale gai ngwange, gire Chube be age no ulita ba alin ba toidu no ñanale. 9 Agwa ba joge siere Jesucristo geruage gire ene ba kle joge siere Chubege kaire agwe. Ba mo ta gbe no geru ulia Jesucristonu giti, ene ba ta be chege Chube Jesucristo Ñenua ole kaire ba ta be chege Chube Kirolla Jesucristo ole ule. 10 Kwian gweale bai kaire joge basale badi agwa ama me geru ulia Jesucristo giti gai ulia ama me kle Chube gerua ulia Jesucristo giti kete kwian nage, kwian kle chage geru ngwale dbe ba me kwian ene gai ngwange no ba ngwadi gwa ni ba gerudale ama ole: “Noare ba chku aini cha ngwadi.” 11 Ulia cha gerule ba ole, ba bai kaire me geru ai gai ulia cha kle gerule kare ba be mo ta gbe skate kwian kle chage geru ngwale dbege gerule kwian ene ole: “Noare ba chku aini cha ngwadi.” Ba kwian e gai ngwange ene gire ba kle age me no kwian e kle age kare, ba kle ama chudaboi chage geru ngwale dbe.

12 Ulia geru na tanre kle tragadale ba ole, agwa cha me ta geru e degakalin ulita chada giti. Ma no cha kle tañachuge joge agali ba kle ngwadi gerule ba ole, gire ene nga be suga no no chedi ulita salengwli. 13 Ba bitalla ulita Jesucristo giti kle aini Chube nu ama gaba mau alin Chube ba gau kare mau alin, ama ulita kle gbi kage ba alin chada ai giti.

Geru ai ene ulita cha chada degu ba cha bitalla Jesucristo giti ulita alin. Che kle meni.