1 Meke va dogoro nau sa se Zosua sa ṉati hiama kenukenue turu nana pa kenuna sa mateana te Zihova, meke se Setani si turu nana pa kali mataona sa, nama pude zutu ia se Zosua, gua.*Ezr 5:2; Rev 12:10 2 Zama la ia Zihova se Setani, “Arau Zihova gegese igo si agoi, Setani! Arau Zihova sapu ele vizatia sa popoa Zerusalema, gegese igo si agoi! Vea, lopu guana huda ta saputu vurana pa nika tu sa tie hie?” gua si Asa.*Zd 9

3 Ego se Zosua si na poko bureṉedi toa si va sage i sa meke turu nana pa kenuna sa mateana. 4 Zama la sa mateana koa rini pu turu pa kenuna sa, “Vagi pani sari nana poko bureṉedi.”

Meke zama la si asa koe Zosua, “Isana, ele vagi pani rau sari mua sinea, meke kote va sage nigo poko arilaedi arau si agoi,” gua si asa.

5 Meke zama si arau, “Va hake nia keke pusi batu viana pa batuna.” Ke va hake nia rini si keke pusi batu viana pa batuna meke va poko ia rini, sipu korapa turu nana vasina sa mateana te Zihova.

6 Meke va paleke nia sa mateana te Zihova sa zinama hie koe Zosua: 7 “Hiera gua si zama nia e Zihova Tadi na Qeto Minate: ‘Pana ene luli i agoi sari Qua siraṉa meke kopuni agoi sari gua pu hivani Arau, si tiqe kote kopu nia goi sa Qua vetu meke lalae ni sari Qua varivarigarana, meke kote ponigo Arau si keke lolomo koa rini pu korapa turu hire.

8 Va avoso, kei agoi Zosua, sa ṉati hiama kenukenue meke sari mua hiama pu korapa habotu pa kenumu, gamu si na vina gilagila koari na tiṉitoṉa pu korapa mae: Arau kote turaṉa mae nia sa Qua nabulu, sa Lelaṉa.*Zer 23:5, 33:15; Zak 6:12 9 Doṉo la, sa patu sapu va habotu ia Arau pa kenuna e Zosua! Ka zuapa mata si koa koasa keke patu asa, meke kote gasi ia Rau koasa si keke kinubekubere,’ zama gua se Zihova Tadi na Qeto Minate, ‘meke kote vagi pania Rau pa keke rane mo sa sinea tanisa popoa hie.

10 Koasa rane asa si kote hopeke ruvati gamu sari turaṉa mia pude la habotu pa kauruna sa Nana vaeni meke huda piqi,’ zama vura gua se Zihova Tadi na Qeto Minate.”*Mka 4:4

<- Zakaraea 2Zakaraea 4 ->