7
1 Tuqu, mu kopu ni sari qua zinama
meke va naqiti pa bulomu saripu ele tozi nigo.
2 Kopu ni sapu ele tozi nigo pude mu toa;
lavelave ni sari qua vina tumatumae guana keke tinagotago arilaena.
3 Pusi ni pa kakarutu limamu;
kuberi pa bulomu.
4 Mamu guni nia na tasimu vineki, sa ginilagilana lohina,
meke poza nia turaṉamu sa ginilae.
5 Arini kote kopu va seu igo koasa barikaleqe barabaratana,
koari na zinama lomolomosodi tanisa votiki barikaleqe.
Sa Barikaleqe Kaleanana
6 Koasa vuida pa qua vetu
si hopiki vura si rau.
7 Dogoria rau koari na tie pu lopu ele gilagilana,
va nonoga ia rau koari na tie tiqe toqolo sagedi,
si keke tie vaqura sapu lopu tumae balabala valeana.
8 Ene lulia sa sa siraṉa, tata la koasa vasina koa sa barikaleqe asa,
ene la gua pa siraṉa la koasa vetu tanisa,
9 pana veluvelu sipu podalae ibu sa rane,
totoso podalae huporo sa popoa.
10 Totoso asa si vura si keke barikaleqe pude tutuvia,
pokopoko guana keke maqota meke koa ia na hiniva pude vorivoriti.
11 Na mataqarana si asa meke loke nana kinurekure,
meke lopu nosona pa vetu si asa;
12 ele koa aqa pa sisiraṉa, ele pa maketi tu,
ele pa kaiqa hukihukiridi, gua mo si asa.
13 Ṉaza vagia sa sa koreo meke aho ia,
meke doṉo toṉoto la ia sa isumatana meke zama:
14 “Vukivukihi binaere si tavetia rau ṉinoroi,
meke sari masa kurukuru koasa vinukivukihi si koa dia pa vetu;
ele va hokoti rau sari qua tinokotokoro nabudi koe Tamasa!
15 Ke vura mae si arau pude tutuvu igo;
hata igo rau meke kamahire dogoro vagi igo!
16 Ele ivaria rau sa qua teqe
pa poko visoviso mae guana pa Izipi.
17 Va humaṉa lea ia rau sa qua teqe
koari na oto huda moa, na huda humaṉa lea na sinamoni na aloesi na gua.
18 Aria mada hata ia sa tataru kamoa munumunu;
mada vari qetuqetue nada mo.
19 Sa qua palabatu si lopu koa pa vetu;
taloa si asa pa keke inene gelena.
20 Paleke va soku poata si asa
meke totoso hobe rimata tu si kote pule mae si asa.”
21 Zama va malohoria sa barikaleqe meke turaṉa vagia;
koari nana zinama vina lomolomoso si saputu vagia sa.
22 Meke hinoqa lulia mo sa sa barikaleqe
guana bulumakao sapu ta turaṉa pude la tava mate,
guana dia sapu netia sa iku tana sipata;
23 aqa nia sa tupi pude goto pa bulona,
guana kurukuru sapu tapuru nuquru pa sipata,
sapu lopu rovea sa kote voi pule nia pa minate si asa.
24 Ego gamu na tuqu, va avoso mae koa rau,
mi kopu va leana ni sari zinama pu zama ni rau.
25 Lopu va malumi bulomia pude kekere la pa siraṉa tanisa barikaleqe sana
babe muliuṉu meke ene la gua pa nana siraṉa.
26 Na soku sari nana boso pu ele va hoqai sa;
saripu ele va matei sa si lopu boka ta nae.
27 Labena sa siraṉa pa vetu tanisa sapu la gua pa lovu;