SA BUKA TE

OBADAEA
Sa Vinabakala
Hie buka sapu papakana hola koari doduru. Sa laena sa pozapoza Obadaea si “nabulu te Tamasa” gua. Sa totoso si lopu bakala ba guana hola nia vuaheni lima gogoto vesu ṉavulu onomo sipu lopu ele podo se Zisu Karisito. Sa kinorokorotae te Obadaea si la gua koasa tinahuara tanisa popoa pa Edomu, sa butubutu sapu podalae gua pukerane si kana ia se Izireli. Sa popoa Edomu si koa koari na toqere pa kali matao koasa Kolo Matena meke tata pa popoa Moabi.
Edomu si keke pozana e Isoa sa tasina Zekopi, meke Izireli si keke pozana e Zekopi. Sa butubutu Edomu si pa tutina Isoa, meke sa butubutu Izireli si pa tutina e Zekopi. Sa butubutu Ziuda si mae guana pa tutina Izireli ke ari pa Ziuda meke Edomu si tamatasi mo. Ba totoso mae huara ia ri pa Babiloni si pa Ziuda si eri tu sari pa Edomu meke somana la toka ni tu rini sari pa Babiloni meke somana zau vagi dia tinagotago tugo.
Gorevura sa kinorokorotae te Obadaea totoso la ari tie pa Nabataea meke rapata ia si pa Edomu meke vagi hobe hokara ia tu sa popoa. Kaiqa zuapa ṉavulu puta vuaheni, mudina sapu podo se Zisu si murimuri taloa hokara sa butubutu Edomu pa kasia popoa gua sapu korotae nia e Obadaea.
Sari Ṉati Pinaqapaqahana sa Buka
Sa vina kilasa te Edomu. 1-14
Sa rane te Zihova. 15-21

Sari Zinama Tuketukele

1 Sa dinogodogorae te Obadaea.

Hiera gua si zama nia e Zihova sa Baṉara pa guguana Edomu d.

Ele avosia gami sa inavoso mae guana koe Zihova:

Na tie paleke inavoso si ta garunu la koari na butubutu pude zama guahe:

“Gasa turu, mada la raza ia pa vinaripera si pa Edomu!”*

Kote Va Lipulipu ia e Zihova se Edomu

2 Zama se Zihova koe Edomu, “Dotu, Arau kote va gore igo pude na butubutu malohorona hola si agoi koari na butubutu;

kote ta hakohakoe si agoi koari doduru.

3 Sa vina titie pa bulomu si koha igo si agoi,

agoi sapu koa koari na vasidi tomedi pa korapa patupatu koari na toa,

meke tavete mua popoa panauluna hokara,

agoi sapu zama guahe pule nigo,

‘Esei kote boka daku gore nau pa pepeso?’ gua.

4 Be vea tapuru va ululu guana atata si agoi

meke tavete mua vori koari na pinopino,

ba vasina kote daku gore nigo Arau,”

zama vura gua se Zihova.

5 Zama pule si Asa, “Be mae sari tie hikohiko koa goi,

sari tie hikohiko pana boṉi,

vea, lopu kote gua mo sapu hivani rini si kote ta vagi?

Be mae sarini pude pudiki qurepi koa goi,

vea, lopu kote veko hola i rini si ka visavisa qurepi?

Kei Edomu, na tinasuna nomana si kote kamo koa goi!

6 Ba se Isoa si kote ta zalo,

sari doduru nana tinagotago ta tomedi si kote ta hiko!

7 Doduru pu tavete ni vinariva egoi agoi si kote zuzuku lani igo pa mua voloso;

meke va vura igo pa mua pinaqaha popoa;

sari mua baere kote sekesekei nigo meke huara igo;

arini pu poni bereti goi kote nama nigo sipata,

ba lopu kote gilania goi.

8 Koasa rane asa,” zama vura gua se Zihova,

“si vea, lopu kote huara pani Rau sari tie tumatumaedi pa Edomu,

sari tie gilagilanadi koari na toqere te Isoa?

9 Kei Temani, sari mua varane si kote matagutu hola,

meke doduru koari na toqere te Isoa

si kote ta seke va mate pa vinaripera.”

Ginugua Tava Kilasa nia Edomu

10 “Koa gua koasa hiko na vinariva matei sapu tavete la nia goi koasa tasimu e Zekopi,

si kote nobi igo na kinurekure si agoi;

kote ta huara taloa hokara si agoi.

11 Koasa rane sapu va talevara si agoi

totoso paleke taloa ni ri votiki tie sari tinagotago te Ziuda,

meke sari tie karovodi si nuquru koari nana sasada koari na goba pa vasileana,

meke mudumudukeda ni rini sari likakalae pa Zerusalema,

si guana keke mo arini si agoi.

12 Lopu pada doṉo gore nia goi sa tasimu koreo

koasa nana rane kaleanana,

babe qetuqetu ni sari tiena sa popoa Ziuda

koasa dia rane tinahuara,

babe zama va titie

koasa rane sapu tasuna si arini.

13 Lopu pada pude nuquru la i goi sari sasada pa goba tadi Qua tinoni

koasa dia rane tinasuna,

babe doṉo gore ni totoso ta sigiti si arini

koasa dia rane tinasuna,

babe saputu vagi sari dia tinagotago

koasa dia rane tinasuna.

14 Lopu pada pude aqa si agoi koari na varipaza siraṉa

pude seke va matei sari tie govetedi,

babe valani koari na kana sarini pu lopu mate

koasa dia rane tinasuna.

Kote Pitu i Tamasa sari na Butubutu

15 Sa rane te Zihova si tata kamo

pude pitu i Arau sari doduru butubutu.

Gua sapu tavete ia goi, si gua tugo asa si kote ta tavete atu koa goi;

sari mua tinavete si kote kekere pule atu pa batumu.

16 Gua sapu napo tinasigiti sari na Qua tinoni koasa Qua toqere hopena,

si sari doduru butubutu si kote napo lamo dia;

kote napo si arini meke napo la dia mo

meke kote lopu koa dia mo.

Sa Minataqara te Izireli

17 Ba na tinaharupu si kote koa pa Toqere Zaione;

kote hopena si asa,

meke sa butubutu te Zekopi

si kote vagi ia sa nana tinago.

18 Sa butubutu te Zekopi si kote guana nika

meke sa butubutu te Zosepa si kote guana halalana sa nika;

sa butubutu te Isoa si kote na duduli popana,

meke kote va katu nia nika rini meke sulu pania.

Kote loke tie si kote toa hola

koasa butubutu te Isoa.”

E Zihova si ele zama.

19 Sari tie pa popoa Neqevi* kote koa i

sari toqere te Isoa,

meke sari tie pa kali lodu rimata koari na hubi toqere Izireli si kote vagi

sari pepeso tadi na tie pa Pilisitia.

Arini kote koa i sari pezara pa Iparemi meke Sameria,

meke Benisimane kote vagi ia si pa Qileadi.

20 Sa puku tie Izireli ta raovodi sapu koa pa Kenani

kote vagi ia sa pepeso sapu kamo la pa Zarepati pa Ponisia;

sari tie ta raovodi sapu koadi pa Separadi

kote vagi i sari vasileana pa popoa Neqevi.

21 Sari tie variharupi si kote sage la pa Toqere Zaione

pude kopu lani sari toqere te Isoa,

meke e Zihova si kote koa Baṉara.