1 Zama se Tamasa koe Mosese, 2 “Va kilasi gedi sari na tie pa Midiani koasa ginugua sapu tavetia rini koari na tie Izireli. Pana beto tavetia goi sapu gua asa, si kaqu mate si goi.”

3 Ke zama la i e Mosese sari na tinoni, “Kaqu va namanama nia gamu sa vinaripera, pude kaqu rapata la ia gamu sa popoa Midiani meke tavetia sa vina kilasa te Zihova koarini. 4 Pa hopeke butubutu Izireli si kaqu ta garunu keke tina tie pude la varipera.”

5 Ke ta vizata pa hopeke butubutu si keke tina tie varipera; sa doduruna sa ninaedi rini si ari ka manege rua tina tie varipera. 6 Va garunu lani e Mosese pa vinaripera pa tinuraṉa tanisa koimata Pinehasi tuna e Eleaza, sa hiama. Asa sapu kopudi sari na tiṉitoṉa madidi na buki siliva pude tozia sa vina gilagilana sa totoso rinizu pa vinaripera. 7 Razai rini sari na tie Midiani gua sapu tozia e Zihova koe Mosese meke va mate betoi rini sari na tie. 8 Somanae tava mate sari ka lima baṉara pa Midiani: Evi, Rekemi, Zuri, Huri, meke Reba. Va matea tugo rini se Belami tuna Beoro. 9 Pusi vagi rina tie Izireli sari na barikaleqe na koburu pa Midiani, meke vagi rini sari na dia sipi na bulumakao, meke sari doduru dia tinagotago. 10 Sulu betoi rini sari na dia vetu pa vasileana meke sari na dia vinarigara ipi poko. 11 Meke turaṉa betoi rini sari na barikaleqe na koburu ta pusidi meke dia kurukuru, meke sari doduru tiṉitoṉa pu vagi rini, 12 meke turaṉa maeni rini koe Mosese meke Eleaza meke koasa butubutu tie Izireli, arini saripu puta koari na dia ipi pa pezara pa Moabi pa kali karovona sa Ovuku Zodani pa Zeriko.

13 Vura la pa dia ipi sari Mosese, Eleaza, meke sari na koimata pa butubutu, meke la tutuvi rini sari na tie varipera. 14 Bugoro sisigiti ni e Mosese sari na palabatu, na koimata pa vinaripera saripu puledi mae pa vinaripera. 15 Nanasi sa, “Na vegua ke kopuni gamu sari na barikaleqe toadi isara? 16 Mamu gilani sapu sari na barikaleqe arini; arini sari na barikaleqe pu lulidi sari na tinarae te Belami, meke Peoro meke turaṉi sari na tie pude somana vahesi beku. Koasa ginugua asa si kamo sa oza koari na tie te Zihova. [a] 17 Ke mamu va mate betoi sari doduru koreo meke gua tugo sari doduru barikaleqe saripu ele koa turaṉa tie, 18 ba mamu kopuni na va toai telemia sari doduru vineki, saripu lopu ele koa turaṉa tie. 19 Gamu doduru pu ele va matea si keke, babe tiqui sari na tinidia rina tie matedi si kaqu koa pa sadana sa vinarigara tadi tie Izireli ka zuapa rane. Pa rane vina ṉeta meke pa rane vina zuapa, mamu va via puleni gamu, meke gua tugo sari na vineki saripu vagi maeni gamu. 20 Kaqu va via i gamu pa dinoṉo Taqarau Zihova sari doduru poko, sari na tiṉitoṉa ta tavete pa kapu kurukuru, meke na kaludi rina qoti, babe na huda.”

21 Eleaza sa hiama si zama koari na tie saripu pule maedi pa vinaripera, “Hire sari na tinarae pu valani e Zihova koe Mosese: 22-23 Sari doduru tiṉitoṉa saripu lopu boka ta sulu, guana qolo, siliva, boronizi, aeana, teni, meke ledi[b], si kaqu tava via si arini pa vina ṉadadi pa nika, beto asa si kaqu tava via pule pa kolo vina via. Doduru likakalae pule si kaqu tava via pa kolo vina via. 24 Pa rane vina zuapa, kaqu va via i gamu sari na mia poko, meke kaqu tava via si gamu pa dinoṉo te Zihova, meke kote tava malumu pude somana si gamu koari na vinarigara tie Izireli pa mia ipi.”

25 Zama se Zihova koe Mosese, 26 “Agoi meke Eleaza, meke sari na koimata pa butubutu Izireli, si kaqu nae betoi sari doduru likakalae saripu ta vagidi meke gua tugo sari na tie ta pusidi meke sari na kurukuru. 27 Kaqu va hia i gamu si arini pa karua pukuna, keke pukuna tadi na tie varipera, meke pa keke pukuna si tanisa butubutu tie pu lopu somana varipera. 28 Sa pukuna tadi na tie varipera si kaqu ta tabara vura koe Zihova keke pa doduru lima gogoto tie ta pusidi meke gua tugo koari na sipi, na bulumakao, doṉ'ki, na qoti. 29 Valani koe Eleaza, sa hiama guana vinariponi arilaena koe Zihova. 30 Koasa puku kalina sa butubutu tie pu lopu varipera, si vagia keke koari ka lima ṉavulu puta tie ta pusidi, meke gua tugo koari na sipi, doṉ'ki, qoti, meke na bulumakao. Valani koari na tuna Livae, arini saripu kopu nia sa Ipi Hopena te Zihova.” 31 Taveti ri Mosese e Eleaza gua sapu garunu ni e Zihova.

32-35 Hire sari na ninaedi sari na likakalae sapu vagi rina tie varipera: onomo gogoto zuapa ṉavulu lima sipi meke na qoti, zuapa ṉavulu rua tina bulumakao, onomo ṉavulu eke tina doṉ'ki, meke toloṉavulu rua tina vineki, sapu lopu hite koa turaṉa tie. 36-40 Kukuru hinia sapu sa pukuna tadi na tie varipera si ka ṉeta gogoto toloṉavulu zuapa tina lima gogoto sipi meke na qoti; meke ka onomo gogoto zuapa ṉavulu lima sina tinabara vagi koarini pude la koe Zihova; toloṉavulu tina lima gogoto bulumakao si tadi na tie varipera, meke ka zuapa ṉavulu rua si ta vagi koa rini pude na tinabara la koe Zihova; toloṉavulu puta tina lima gogoto doṉ'ki si tadi na tie varipera, ka onomo ṉavulu eke si ta vagi koarini pude na tinabara la koe Zihova; meke manege onomo tina vineki ta pusidi si tadi na tie varipera, ka toloṉavulu rua si ta vagi koa rini pude na tinabara la koe Zihova. 41 Ke ponia Mosese se Eleaza sa hinia sapu sa tinabara koe Zihova, gua sapu tozia e Zihova.

42-46 Sa hinia tadi na butubutu tie pu lopu somana pa vinaripera si kekeṉoṉo gua sapu ta hia la koari na tie varipera: Ṉeta gogoto toloṉavulu zuapa tina lima gogoto sipi na qoti, toloṉavulu onomo tina bulumakao, toloṉavulu puta tina lima gogoto doṉ'ki, meke manege onomo tina vineki pu lopu koa turaṉa tie. 47 Mosese si vagi pa korapadi rina hinia arini, keke pa doduru lima ṉavulu puta tie ta pusidi, meke na kurukuru, gua sapu ele va tatara nia e Zihova si ta vala koari na tie Livae pu kopu nia sa Ipi Hopena te Zihova.

48 Meke la koe Mosese sari na koimata tuturaṉa koari na tie varipera, 49 meke tozia rini gua sapu ta evaṉa, “Ele naei gami sari doduru tie varipera pa mami kinopu, meke lopu keke koarini hire si muliuṉu. 50 Ke paleke maeni gami sari na vina sari qolo hire: hokata qolo, pizopizo, riṉi, vikulu, pakupaku, saripu hopeke vagi gami. Hiva valani gami koe Zihova pude na mami vinariponi la koa Sa, sa hinobedi rina mami tinoa sina lopu mate si gami pa vinaripera.” 51 Vagi ri Mosese e Eleaza sari na vina sari qolo. 52 Sa vinarigaraedi sari doduru vinariponi mae guadi koari na palabatu varipera si tata karua gogoto kilo mamatadi. 53 Arini sapu lopu na koimata si kopuni sari na dia vinasari pu vagi teledia. 54 Ke paleke lani ri Mosese e Eleaza sari na qolo pa ipi, pude ta kopue sari na tie Izireli pa vinaripera.

<- Ninaedi rina Tinoni 30Ninaedi rina Tinoni 32 ->