Matiu 28

Sa Tinoa Pule te Zisu pa Minate

(Maka 16:1-10; Luke 24:1-12; Zone 20:1-10)

1 Pa vaqavaqasa rane Sade, pa mudina sa rane Sabati, si topue la sari Mere sa barikaleqe pa vasileana Magidala, meke keke Mere pule, pude la hopiki nia sa lovu, gua.

2 Pa totoso asa si kamo va hodaka gana si keke niu lavata. Gore mae pa maṉauru si keke mateana te Tamasa meke la topili pania sa sa patu tukuna sa lovu, meke habotu hake nana koasa patu. 3 Sa dinoṉona Sa si malara guana kapi, meke sari Nana poko si keoro sisigiti guana sinou. 4 Sari tie kopu si matagutu sisigiti, ke neneqara si arini, meke doṉo guana tie matedi.

5 Meke zama la koari karua barikaleqe sa mateana, “Mi lopu matagutu, gilania qua rau sapu korapa hata ia gamu, se Zisu sapu tava mate pa korosi. 6 Ba lopu koa tani si Asa. Ele toa pule tu si Asa, gua tugo sapu ele tozia Sa. Mae mamu dogoria sa vasina pu eko Sa. 7 Tuturei la kamahire mi la tozi ni sari kasa Nana disaepeli, sapu ele toa pule tu si Asa pa minate, meke korapa la va kenue koa gamu pa Qaleli si Asa. Vasina tu kote la dogoria gamu. Mi lopu muliṉi nia gua sapu tozini gamu rau hie,” gua sa mateana.

8 Ke tuturei taluarae pa lovu sari karua. Matagutu dia, ba qetuqetu hola dia tugo; meke totoso haqala la sari karua pude la tozi ni sari kasa Nana disaepeli, gua, 9 si tutuvu va hodaki Zisu sari karua, meke zamai Sa, “Mi koa bule,” gua si Asa. Meke mae hoqa todoṉo koa Sa sari karua, tuqei rini sari nenena, meke vahesia rini si Asa. 10 Meke zama la i Zisu, “Mi lopu matagutu, la mamu tozi ni sari kasa tasiqu pude topue la pa Qaleli. Vasina tu si kote dogorau rini si Rau,” gua si Asa.

Sa Tinozi tadi na Tie Kopu pa Lovu

11 Meke sipu korapa ene pule la sari na barikaleqe, si pule la pa Zerusalema sari kaiqa rina solodia pu kopu koasa lovu, meke la vivinei ni rini koari na ṉati hiama sari doduru ginugua saripu ta evaṉa. 12 Meke varigara sari na ṉati hiama na koimata tadi na tie Ziu, meke pada ia rini gua sapu kote taveti rini. Poni va soku ni poata rini sari kasa solodia pu kopu koasa lovu, 13 meke zamai rini, “Kote zama guahe si gamu: Totoso korapa puta gami pana boṉi, si mae hiko vagia ri Nana disaepeli sa tinina, mi gua. 14 Meke be avoso nia sa Qavuna sa ginugua asa, si kote podekia gami pude zama ia si asa, sapu lopu sea si gamu, ke lopu kaqu kamo pa tinasuna si gamu,” gua si arini. 15 Ke vagia rina solodia sa poata, meke lulia tugo rini gua sapu tozi ni rina ṉati hiama koa rini. Ke sa inavoso gua tu asa si ene koari na tie Ziu, kamo pa rane ṉinoroi.

Vura koari Nana Disaepeli se Zisu

(Maka 16:14-18; Luke 24:36-49; Zone 20:19-23; Tinavete 1:6-8)

16 Meke topue la sari na disaepeli koasa toqere pa Qaleli, vasina sapu tozi ni Zisu pude la.*Mt 26:32; Mk 14:28 17 Totoso dogoria rini se Zisu, si vahesia rini si Asa, ba kaiqa arini si korapa nunala dia tugo. 18 Meke tata la koa rini se Zisu, meke zama, “Doduru ṉiniraṉira pa Maṉauru, meke pa pepeso si ele ta poni ni Rau. 19 Mi la gamu koari doduru butubutu pa ninae vasina. Mi va evaṉae ni Qua disaepeli si arini. Mi papitaiso i pa korapa pozana sa Tamada, na Tuna meke sa Maqomaqo Hope.*TTA 1:8 20 Mi va tumatumae ni si arini pude va tabei sari doduru gua saripu tozi ni gamu Rau; meke kaqu koa somana koa gamu si Rau, osolae kamoa na kamoa,” gua se Zisu.

<- Matiu 27