Sa Buka hie si na vivineidi rina kinaleana sapu kamo koasa vasileana nomana pa Zerusalema meke koari tiena totoso ta rapata si asa koari pa Babiloni pa vuaheni lima gogoto vesu ṉavulu zuapa sipu lopu ele podo se Zisu Karisito. La sa qeto minate pa Babiloni meke huara ia meke sulu pania sa vasileana nomana. Kabokabo ia meke vari padapada nia Zeremaea sa tinolava meke kinoa arilaena pukerane koasa tinasuna meke tinasigiti kamahire. Ba sa Kinabo te Zeremaea si na hinelahelae tugo. Va tabea sa sapu ele zama nia tu Tamasa bisa sapu kote huara pania Sa sa butubutu meke va kilasi sari tiena koa gua koari na kinaleadi sapu taveti rini meke sapu korodia va tabei sari Nana vina balau. Na hodahodaki sari pa Izireli sapu kote boka gua tu asa sa Tamasa, sapu ari tie karovodi si tavetavete ni e Tamasa pude va gorevura ia sa Nana zinama, meke vata dogoro nia sa Nana binugoro. Kamahire si loketoṉa sa butubutu baṉara, lopu koa sa binaṉara meke sa habohabotuana baṉara. Sa vina tatara te Tamasa koe Devita sapu kote turu hola ninae rane sa tuti binaṉara tanisa (2 Samuela 7:16) si lopu koa kamahire. Gua ba la sa Kinabo te Zeremaea meke zamai sari pude va manoto puleni koasa dia tinolava pukerane babe doṉo vata kenue la ia sa vugo repere totoso kote leana pule sa kinoa. Be vea toleṉe gua sa tinasigiti ba mani va nonoga ia sapu sa tataru nabuna te Zihova si loke vina betona, ba sapu vaqura sa tataru nabuna Tanisa doduru munumunu. Gua ke kote aqa mo si asa. Na vegua ke kaqu nominomi tu sa tie pana tava kilasa si asa koari nana sinea? gua si asa. Pa doduru vuaheni si hoke kerani rini sari na kinera hire koari na rane nomadi pa totoso hoke madi si arini pa ginanigani, meke balabala pule la i rini sari na tinasuna gua sapu ta evaṉa pa Izireli pa totoso arini.
Sari Ṉati Pinaqapaqahana sa Buka
Tinalotaṉa te Zerusalema. Hinia 1:1-22
Vina kilasana Zerusalema. Hinia 2:1-22
Linipulipu meke rinaṉeraṉe. Hinia 3:1-66
Ta huara sa popoa Zerusalema. Hinia 4:1-22
Sa vinaravara tinepa tinokae. Hinia 5:1-22
1
Sa Tinalotaṉa te Zerusalema
1 Kei, ivulu sa popoa Zerusalema,
sapu hoke siṉi ia na tie!
Namu gua tugo na naboko si asa,
sapu tatasana arilaena koari na butubutu baṉara!
Sa kalaho koari na vasileana nomadi
si na pinausu mo kamahire.
2 Pana boṉi si kabo sisigiti si asa,
sari kolomatana si koa mo pa paparana.
Koari doduru nana babaere
lopu keke si koa pude va manotia.
Qoraqora nia ri doduru nana baere si asa;
ura na kana ia tu rini kamahire.
3 Pa tinasigiti meke tinavete mamata,
vasina si ta raovo la se Ziuda.
La koa turaṉi sa sari butubutu karovodi;
loke nana vasina pude magogoso.
La kamoa ri doduru pu kana ia
na ta pusi ke lopu boka siba.
4 Sari siraṉa la pa Zaione si guari tie talotaṉadi,
ura loke tie si mae koari nana rane inevaṉa hopedi.
Doduru nana sasada nuquru si ivulu,
talotaṉa sari na hiama,
kabo sari na vineki,
meke Zaione si kuliusu.
5 Sarini pu kukiti nia si ta evaṉae na nana palabatu;
na bokabokadi sari nana kana.
E Zihova mo va kilasia si asa
koa gua koari soku sinea tanisa.
Sari nana koburu si ta raovo taloa,
la pinausu koari pa popoa seu.
6 Taloa beto sari tinolava
tanisa vasileana pa Zaione.
Sari tuna koreo sa baṉara si guana kurukuru dia
sapu lopu dogoro duduli;
pa inovia si govete si arini
koari na tie pu hukue ni.
7 Koari nana rane tinalotaṉa meke tinasigiti
si balabala pulei Zerusalema sari doduru nana tinagotago sapu tagoi sa pukerane.
Kamahire si pa limadia ri nana kana si asa,
loke tie si koa pude toka nia.
Doṉo la ia ri nana kana
meke hegere nia sa nana hinoqa na tinahuara.
8 Ele noma hola sa sinea te Zerusalema
meke boni si asa koari nana sinea.
Kamahire kilu ia ri doduru pu hoke va lavatia,
ura ele dogoria rini dodohona;
asa telena ba kurekure
ke tomea sa sa isumatana.
9 Sari nana sinea si guana boni sapu napiti pa nana poko;
sapu vugo repere si lopu balabala ia sa.
Sa hinoqa tanisa si kaleana hola,
meke loke tie si koa pude va manotia.
Zama se Zerusalema, “Kei Zihova, doṉo mae ia sa qua tinasigiti,
ura ele va kilasau sa qua kana.”
10 Sari limana sa nana kana si saputu vagi
sari doduru nana tinagotago;
dogori sa sari butubutu huporodi
sapu nuquru pa nana Zelepade hopena,
sarini pu hukati Agoi
pude somana pa Mua vinarigara hopena.
11 Doduru nana tinoni si kabokaboi
meke hata bereti;
vari hobeni ginani rini sari dia tinagotago pude toa dia.
Ke zama se Zerusalema, “Kei Zihova, doṉo mae. Mamu balabala au,
ura ta etulu si rau.”
12 “Vegua, loke ginuguana koa gamu sia, doduru gamu pu ene hola?
Doṉo vari likohae, mamu dogoria.
Vea, koa dia kaiqa vina kilasa sapu gugua taqarau,
sapu ta raza nia rau,
sapu e Zihova va kamo nau,
koasa rane sapu ta ṉaziri si Asa?
13 Panaulu tu garunu gore mae gunia Sa sa nika;
pa susuriqu garunu nuquru la nia Sa.
Ivara nama nia vaqara Sa sari nenequ
meke va taliri pule au Sa.
Doloviviriqu meke veko pani au Sa,
mabubulu doduruna sa rane.
14 Sari na qua sinea si ta pusi varigara meke mamata guana ioki;
pa Limana Sa ta tigisi varigara.
Mae hake si arini pa ruaqu
meke vagi pania e Zihova sa qua ṉiniraṉira.
Vala nau Sa koa rini pu ṉiṉira hola nau si arau.
15 Kilui e Zihova
sari doduru qua varane;
tioko va mae ia Sa si keke qeto minate pude mae raza au
pude va matei sari qua tie vaqura.
Pa Nana munamunalana vaeni si neti munalia Sa
sa popoa Zerusalema sapu tataru hola nia Sa.
16 Gua asa ke kabo si rau
meke titisi sa kolomata pa mataqu.
Loke tie si koa tata pude va manoto au,
loke tie pude va ṉiṉira pule ia sa maqomaqoqu.
Sari qua koburu si doloviviri
sina sa kana si ṉiṉira hola.”
17 Qaqama vurani Zaione sari limana,
ba loke tie si koa pude va manotia;
na ele tozia e Zihova koe Zekopi
sapu sari nana baere mo kote kana ia si asa;
na Zerusalema si ele ta evaṉae
keke tiṉitoṉa bonina koari nana kana.
18 Zama se Zerusalema, “Se Zihova si toṉotona,
ba arau mo sekei sari Nana tinarae.
Avoso mae, gamu doduru tinoni;
doṉo mae koari qua tinasigiti.
Sari qua koreo vaqura meke vineki vaqura
si ele ta raovo taloa.
19 Tioko la i rau sari butubutu pu tavete ni vinariva egoi rau
ba qoraqora nau rini.
Sari qua hiama meke qua koimata
si mate pa korapa vasileana nomana
totoso hata ginani rini
pude harupi sari dia tinoa.
20 Kei Zihova, doṉo mae ia sa tinasuna koa ia rau!
Ta sigiti hola qua,
meke ta duaṉa sa buloqu
ura na va gugue hola si arau.
Pa siraṉa si va mate tie sa vedara;
pa korapa vetu si na minate mo si koa.
21 Avosia mo ri na tie sa qua tinalotaṉa,
ba loke tie si koa pude va manoto au.
Doduru qua kana si ele avoso nia sa qua kinuliusu;
qetu nia rini gua sapu tavete mae nia Goi koa rau.
Mu va kamo mae ia sa rane tadirini sapu tozia Goi
pude madi tasuna gugua arau si arini.
22 Mamu dogori sari doduru dia kinaleana;
Mamu va kilasi gua sapu va kilasa guni nau Goi si arau
Languages