Zosua 15

Sa Voloso Popoa Ta Poni koasa Butubutu Ziuda

1 Ta poni pepeso sari na puku tatamana koasa butubutu te Ziuda sapu guahe:

Sa popoa si kamo koasa voloso pa Edomu sapu kamo la gua tu koasa soloso qega sapu ta pozae Zini. 2 Sa voloso pa kali matao hie, si podalae pa kali gasa rimata koasa popoa pa kali gorena sa Kolo Matena, 3 meke ene sage hola la gua pa karovoana koasa siraṉa pa toqere sapu ta pozae Karovoana Akarabimi meke hola la pa soloso qega sapu ta pozae Zini. Ene hola latu pa kali la gua pa Izipi koasa vasileana Kadesi Banea. Beto asa si hola latu pa vasileana Hezironi meke ene sage la pa Ada, meke Karaka, 4 la kamo pa Azimoni. Beto asa si ene toṉoto la koasa voloso pa Izipi sapu sa volosona Izipi, meke beto pa kali lodu rimata pa Kolo Meditareniani. Asa tugo sa voloso pa kali mataona sa pepeso tanisa butubutu Ziuda.

5 Sa voloso pa kali gasa rimata si na Kolo Matena, sage hola la gua tu kamo koasa sadana sa Ovuku Zodani. 6 Sa voloso pa kali gede*Kali gede be tia la pa kali gasa rimata. koasa popoa Ziuda si podalae vasina pa sadana sa Ovuku Zodani, meke sage la gua pa Beti Hoqola, meke ene luli koasa teqoteqolona sa toqere sapu doṉo gore la gua pa lolomo Zodani. Meke sage la gua koasa patu te Bohani sa tuna koreo e Rubeni. 7 Vasina sa voloso si taluarae pa Lolomo Tinasuna meke sage la gua pa Debiri, meke tiqe kekere toṉoto la gua pa Qiliqali, sapu tia la ia sa Karovoana Adumimi pa kalina la koasa taba varikali. Vasina si ene hola la gua tu koasa kolo pa Enisemesi, vura la gua pa Eniroqeli. 8 Meke beto asa si nuquru sage gua koasa Lolomo Hinomu, koasa kalina sa toqere vasina koa sa vasileana lavata tanisa butubutu Zebusaiti pa Zerusalema. Sa voloso si hola la gua tu pa batuna sa toqere koasa kali lodu rimata pa Lolomo Hinomu, koasa hukihukirina sa kali gede*Kali gede be tia la pa kali gasa rimata. koasa Lolomo Repaimi. 9 Topue vasina meke la gua koasa bukaha pa Neputoa meke beto asa si la koari na vasileana tata pa toqere Eporoni. Podalae vasina si tia la gua pa Ba'ala sapu ta pozae Kiriati Zearimi. 10 Taluarae pa Ba'ala si ene likoho gua pa kali lodu rimata la gua koasa toqere Seira, meke ene pa kali lodu rimata koasa toqere Zearimi sapu hoke ta pozae Kesaloni. Beto asa si gore la gua pa Beti Semesi si asa, meke ene hola gua pa Timina. 11 Beto asa sa voloso si ene la gua koasa toqere pa kali gede*Kali gede be tia la pa kali gasa rimata. koasa vasileana Ekoroni, meke ene la pa Sikeroni, hola nia sa toqere Ba'ala, meke hola la gua pa Zamunia, meke kokoi pa kolo Meditareniani si asa. 12 Sa kolo Meditareniani sina voloso pa kali lodu rimata.

Pa korapadi rina voloso hire si koa sari na tinoni tadi na tatamana tanisa butubutu Ziuda.

Va Kilasi meke Vagi e Kelebi sari na Vasileana pa Heboroni meke pa Debiri

(Zazi 1:11-15)

13 Gua sapu ele tozi nia e Zihova koe Zosua, kukuruna hite sa popoa tanisa butubutu Ziuda si ta vala koe Kelebi sa tuna koreo e Zepune. Vagia sa sa vasileana Heboroni, sa vasileana lavata te Aba, tamana e Anaki,*Zaz 1:20 14 Hadu vura taloa ni e Kelebi sari tutina e Anaki koasa vasileana Heboroni, sari butubutu te Sesai, Ahimani, meke Talamai. 15 Taluarae vasina si asa meke la rapati sa sari na tinoni pu koa pa Debiri. Pa totoso asa si ta pozae Kiriati Sepa sa vasileana lavata asa. 16 Zama se Kelebi, “Kaqu vala nia rau sa tuqu vineki se Akasa pude haba ia sa tie bokabokana pa vinaripera pu vagia si pa Kiriati Sepa,” gua. 17 Otinieli sa tuna koreo e Kenazi, sa tasina koreo e Kelebi si vagina sa vasileana lavata, ke vala nia e Kelebi se Akasa sa tuna vineki meke haba ia sa. 18 Koasa rane vinarihaba, si tepa sisigitia e Otinieli se Akasa pude tepa pepeso koasa tamana, meke sipu gore koasa nana doṉ'ki si asa si nanasia e Kelebi sapu na sa si hiva nia sa. 19 Olaṉa si asa, “Hivani rau si kaiqa bukaha kolo tototolo. Sa pepeso sapu ele poni nau goi si koa pa popoa popana pa popoa Neqevi.” Ke poni nia e Kelebi sa pepeso sapu koa ia na bukaka kolo tototolo, keke pa kali sagena meke keke pa kali gorena.

Sari na Vasileana Tanisa Butubutu Ziuda

20 Hire sari na popoa pu tagoi rina tatamana koasa butubutu Ziuda. 21 Sari na vasileana sapu koa seu la gua pa popoa Neqevi pa kali la gua pa Edomu si Kabuzili, Edera, Zaqura, 22 Kina, Dimona, Adada, 23 Kedesi, Hazo, Itinana, 24 Zipi, Telemi, Bealoti, 25 Hazo Hadata, Kerioti, Hezironi, (sapu ta pozae Hazo tugo), 26 Amama, Sema, Molada, 27 Haza, Qada, Hesimoni, Betipeleti, 28 Haza Suala, Biasiba, Biziotia, 29 Ba'ala, Limi, Ezemu, 30 Eletoladi, Kesili, Homa, 31 Zikilaqi, Madimana, Sanisana, 32 Lebaoti, Silihimi, Aini, meke Rimoni: sa ninaedi si ka hiokona sia vasileana nomadi, turaṉae la tugo sari na vasivasileana hitekedi pa vari likohaedia.

33 Sari na vasileana lavata koari na hubi toqere pa kali lodu rimata si Esitaolo, Zora, Asana, 34 Zanoa, Eqanimi, Tapua, Enami, 35 Zamuti, Adulamu, Soko, Azeka, 36 Saraimi, Aditaimi, Qedera, meke Qederotaimi: ka manege made vasileana lavata, turaṉae la sari na vasileana hitekedi pu koa pa vari likohaedia.

37 Somana la dia tugo si pa Zenani, Hadasa, Miqidalaqadi, 38 Dileani, Mizipa, Zokotili, 39 Lakisi, Bozikati, Eqiloni, 40 Kaboni, Lamami, Sitilisi, 41 Qederoti, Betidaqoni, Neama, meke Makeda: ka manege onomo vasileana lavata, turaṉae la tugo sari na vasileana hitekedi pu koa vari likohae koarini. 42 Somanae tugo sari na vasileana Libina, Eta, Asani, 43 Ipita, Asana, Nezibi, 44 Keila, Akizibi, meke pa Maresa: ka sia vasileana lavata, turaṉae la tugo sari na vasileana hitekedi pa vari likohaedia.

45 Ekoroni tugo meke sari na vasileana nomadi na hitekedi sapu koa kapae koasa, 46 meke sari doduru vasileana lavata na hitekedi kapae pa Asidodi, podalae pa Ekoroni meke kamo la pa kolo Meditareniani.

47 Somanae sari vasileana pa Asidodi meke Qaza, turaṉae sari na dia vasileana nomadi na hitekedi, kamo la gua koasa ovuku koasa voloso pa Izipi meke sa raratana pa kolo Meditareniani.

48 Koasa popoa toqetoqere si koa sari na vasileana Samiri, Zatiri, Soko, 49 Dana, Kiriati Sepa sapu ta pozae Debiri tugo. 50 Anabi, Esitemoa, Animi, 51 Qoseni, Holoni, meke Qilo: ka manege eke vasileana lavata, turaṉae la sari na vasileana hitekedi pa vari likohaedia.

52 Somanae tugo sari na vasileana Arabi, Duma, Esani, 53 Zanimi, Beti Tapua, Apeka, 54 Humuta, Heboroni, meke Zioro: ka sia vasileana lavata turaṉae sari na vasileana hitekedi pa vari likohaedia.

55 Somanae tugo sari na vasileana Maoni, Kameli, Zipi, Zuta, 56 Zezireli, Zokodeami, Zanoa, 57 Kaini, Qibea, meke Timina: ka manege puta vasileana lavata, turaṉae sari na vasileana hitekedi pa vari likohaedia.

58 Somanae la tugo sari na vasileana Halahulu, Betizuru, Qedoro, 59 Ma'arata, Betanoti, meke Eletekoni: ka onomo vasileana lavata, turaṉae sari na vasileana hitekedi pu koa pa vari likohaedia.

60 Somanae tugo sa vasileana Kiriati Beolo sapu ta pozae Kiriati Zearimi meke Raba: karua vasileana lavata, turaṉae sari na vasileana hitekedi pa vari likohaedia.

61 Koa pa korapa soloso qega sari na vasileana Beti Araba, Midini, Sekaka, 62 Nibisani, sa vasileana soloti, meke Eqedi: ka onomo vasileana lavata turaṉae sari na vasileana hitekedi pa vari likohaedia.

63 Ba lopu boka hadu vurani rina tinoni pa butubutu Ziuda sari na tinoni Zebusaiti pu koadi pa Zerusalema. Ke korapa koa turaṉae dia koari na tie pa butubutu Ziuda.*Zaz 1:21; 2 Samuela 5:6; 1 Koron 11:4

<- Zosua 14 Zosua 16 ->