36
1 Hoda la sa zinama te Elihu:
2 “Va avoso hite mae, maqu va bakalani gamu
sari zinama pa kalina te Tamasa sapu kote zama ni rau.
3 Pa seu vagi mae nia rau sa qua ginilagilana;
maqu va sosodea sapu Asa pu tavete au si toṉoto.
4 Ura hinokara sapu sari qua zinama si lopu koha;
na keke tie lohina pa ginilagilana si zama gua hie.
5 Ṉiṉira sa Tamasa meke lopu etulu tie si Asa,
Ṉiṉira hola si Asa meke nabu koari Nana hiniva.
6 Lopu va toa seunae i Sa sari na tie kaleadi,
meke lopu ṉoṉovali Sa sari na tie pu koa tasuna, ba harupi Sa.
7 Sari matana si kopu totoko ni mo sari tie toṉoto,
va habotu turaṉa ni Sa koari na baṉara,
meke ninae rane si va lavati Sa.
8 Ba pude sari tie si ta pusi pa seni,
meke ta sipata vagi koasa kinoa va kaleana,
9 si tozi ni Sa sari na dia tinavete kaleadi pu evaṉi rini.
10 Tozi ni Sa pude avosi sari nana vina balau,
meke zama i pude hobe meke kekere koari hahanana kaleadi.
11-12 Be va tabea meke nabulu nia rini sa Tamasa,
si kote koa valeana si arini doduru rane pa dia tinoa,
meke doduru vuaheni si kote koa qetu si arini.
13 Arini pu lopu raṉea sa Tamasa si bugoro golomo pa bulodia,
totoso pusi Sa nenedi ba lopu kabo hata tinokae si arini.
14 Tie vaquradi si lopu toa gelenae meke mate,
mate turaṉae koari na tie pu variva kurekure dia hahanana.
15 Ba arini pu ta sigiti si harupi Sa koari dia tinasigiti;
zama i Sa sipu korapa koa pa dia tinasuna.
16 Tioko vura nigo Sa pa korapana sa mua tinasuna;
la pa vasina seu koari na ṉinoveoro,
la pa mua tevolo sapu siṉia ginani arilaedi.
17 Ba kamahire si ta mamata nia goi sa vinari pitui sapu kote kamo koari tie kaleadi;
na vinari pitui meke vina kilasa padana koari na mua tinavete si ele kamo atu koa goi.
18 Mu kopu pude mu lopu ta poni golomo pa poata;
babe ta tabara golomo pude tavetavete va sea.
19 Vegua boka sa mua tinagotago
babe doduruna sa mua binokaboka
pude toka nigo pude lopu tutuvu tinasuna si agoi?
20 Mu lopu okoro nia sa boṉi pude kamo,
na asa sa totoso hoke mate va hodaka sari tie.
21 Mu kopu pude lopu kekere la koari tinavete kaleadi,
ura qetu si goi pude zutua sa Tamasa hola nia pude helahela ni sari na mua sinea.
22 Na Tamasa si ululu hola koasa Nana ṉiniraṉira.
Esei boka va tumatumae gugua Asa?
23 Esei tozi lani koa Sa sari Nana siraṉa?
Babe zama koa Sa, ‘Sea si tavetia Agoi.’
24 Lopu muliṉi nia pude va lavati sari Nana tinavete,
pu kera ni sari kinera vinahesi.
25 Doduru tinoni ele dogoria si hie,
pa seu tu dogoro mae nia ri na tie.
26 Marilaena hola sa Tamasa, hola nia sapu gua gilana gunia gita!
Sari vuahenina si lopu pada ta hata vura.
27-28 Na vuga sagena sa kolo pa pepeso si vagi Sa,
meke va kolo i Sa pude va gavoro mae ruku koari na lei,
meke va ruku gore pule lani koari doduru tinoni.
29 Esei boka gilania sa siraṉa gua sapu repaha guni ni Sa sari na lei,
meke sa paka sapu lulusu gore gua pa maṉauru.
30 Variva dogoro sa kapi pa vari likohaena Sa,
va kalalasia Sa sa kolo lamana.
31 Gua asa poni guni ni Sa sari na butubutu,
meke va gavoro soku poni ni ginani Sa.
32 Va siṉi ni kapi Sa sari limana
meke taburu lani koari na vasidi pu garunu lani Sa.
33 Sa paka maṉauru tozia sapu raneboṉi si tata kamo,