29
1 Zama hoda la se Zobi,
2 “Va gulea i rau sari na sidara visoroihe,
sari na rane na totoso pu kopu nau sa Tamasa,
3 totoso zuke va bakalia sa Tamasa sa qua tinoa,
meke pa Nana kalalasa si enea rau sa huporo.
4 Arini sari na rane leadi pa qua tinoa,
totoso baere au sa Tamasa meke mana nia Sa sa qua vetu,
5 totoso koa turaṉau sa Tamasa pu tagoi sari doduru ṉiniraṉira,
meke koa vari likohae nau ri qua koburu,
6 totoso tamanae sari qua qoti meke bulumakao
meke poni va soku nau meleke pa qua siraṉa,
meke bukaha vura koari na patupatu sa oela olive,
7 totoso la si rau pa sasada koasa vasileana,
meke vagia qua habohabotuana pa vasina varivarigarana,
8 sari na tie vaqura si hoke va talevara totoso dogorau rini,
sari tie komihadi si hoke turu pa pinamaṉa pana kamo rau.
9 Sari na koimata si hoke noso paki zama,
vekoi ri limadia pa ṉuzudia pude lopu zama.
10 Sari ṉati palabatu si turu noso;
lopu kulu na pamaṉa dia.
11 Be esei avosia zamaqu ba hoke qetu hola nau rini,
arini pu dogorau si hoke zama valeana mae,
12 sina harupi rau sari na malaṉa pu kabo hata tinokae,
meke saripu loke tamadia.
13 Sari na habahuala ba hoke mana nau,
sari naboko si va qetu pulei rau.
14 Sa tinoṉoto si va sage ia rau guana qua poko;
ṉinoṉo si hadehade nia rau pa tiniqu meke na qua toropae.
15 Sari pu behu si turaṉi rau,
meke tokani rau saripu ike.
16 Na tamadia ri na tie malaṉa si rau,
meke toka ni rau sari na tie karovodi pa vinaripitui.
17 Huari rau sari ṉiniraṉira tadi tie kaleadi,
meke harupi rau sari tie koa rini pu ṉoṉovali si arini.
18 Meke balabala si arau, ‘Kote mate si rau pa qua vetu soti,
sari qua rane si kote sokudi guana onone.
19 Guana huda si rau sapu sari karosoqu si kamo la pa kolo,
meke sari lelaṉaqu si bobosi na puni pana boṉi.
20 Doduru tie si hoke vahesi au rini si arau,
meke hoke tava ṉiṉira lamo si rau.’
21 Sari tie si edi hiva va avosau rini,
aqa va avosia rini sa si kote zama nia rau.
22 Mudina zama arau si loke dia zinama pule,
sari qua zinama si va manoti si arini.
23 Aqa nau rini pude zama guana aqa dia ruku,
qua zinama si napoi rini guana inuma sapu va kamo ruku.
24 Totoso komolo la i rau si lopu va hinokara si arini,
sa dinoṉo va bakala pa isumataqu si arilaena hola koa rini.
25 Arau vizata poni sari binalabala meke habotu guana dia palabatu,
turaṉi rau guana baṉara sapu turaṉa nana qeto minate,