1 Sipu kamo sa rane pude vata dogoro pule ni pule pa kenuna Zihova sari na mateana pa Maṉauru, si somanae nana tugo se Setani koa rini. 2 Nanasia Zihova si asa, “Pavei si koa mae gua agoi?”

Meke olaṉa se Setani, “Arau si ene lamae mo, vilorae ia mo sa kasia popoa,” gua si asa.

3 “Vegua dogoria tugo goi sa Qua nabulu, se Zobi?” nanasa gua se Zihova. “Loke tie pa pepeso sapu toṉoto na leana gua asa. Vahesi Au sa si Arau, meke sapu pamaṉa Nau sa meke kopu sisigiti nia sa pude lopu tavete va sea. Sovutu Au goi pude va malumu igo pude la raza ia, pa ginugua hoboro, na loke nana sinea, ba e Zobi si koa va ṉoṉo eko nana mo.”

4 Olaṉa se Setani, “Boka veko pani na tie sari nana likakalae pude kopu nia sa nana tinoa soti. 5 Ba mu va sigitia tu sa tinina ba Goi, kote hinokara zama va kaleana Igo sa pa Kenumu si Goi!”

6 Ke zama se Zihova koe Setani “Leana, koa pa limamu si asa, ba mu lopu va matea mo.”

7 Ke taluarae se Setani koe Zihova, meke la va raza nia minoho tubu sa sa doduru tinina e Zobi. 8 La habotu pa eba se Zobi meke vagia sa si keke kukuru vide raro patu meke repi nia sa koari na tubuna. 9 Zama la sa nana barikaleqe koa sa, “Na korapa koa va ṉoṉo eko la mua tu si agoi? Vea ke lopu zama va kaleana ia mo goi sa Tamasa, mamu mate mua?”

10 Olaṉa se Zobi, “Zamazama gua tugo na barikaleqe duviduvili si agoi! Be garunu mae ni Tamasa sari ginugua leadi, si va kamo i gita. Vea ke kaqu qumiqumi tu si gita totoso garunu mae tinasuna si Asa?” Pa korapadi ri doduru tinasuna pu raza koe Zobi, si lopu hite zutua Zobi sa Tamasa.

11 Ka ṉeta baere te Zobi si ari Elipazi na tie pa vasileana nomana pa Temani, e Bilidadi, sa tie mae guana pa popoa Sua, meke e Zopara sapu mae guana pa popoa Neama. Totoso avoso nia arini sari doduru tinasuna sapu raza koe Zobi, si variva ego nia rini pude topue la meke va manotia si asa. 12 Sipu korapa ene mae tu pa seu si arini si dogoria rini se Zobi, ba lopu doṉo gilania tu rini si asa. Ba totoso gilania arini si podalae kabo va ululae si arini, daku rikati rini sari dia poko pa tinalotaṉa, meke va vuvusu la kavuru pa batudia. 13 Meke tiqe habotu turaṉia rini si asa vasina pa pepeso koari ka zuapa rane meke zuapa boṉi. Loke tie hite zama la nia si keke zinama koasa, sina dogoria arini sapu noma hola sa tinasigiti tanisa.

<- Zobi 1Zobi 3 ->