9
1 Leana hola be na berukehe kolo mo sa batuqu
meke na bukaha si koari na mataqu,
pude qu kabo mo boṉi na rane,
kaboi sari na turaṉaqu pu ele ta seke va mate!
2 Kei, be koa qua pa qega
pa keke putaputana tadi na tie enene,
pude qu ta luarae koari na qua tinoni
meke rizu va seu qua koa rini!
Ura na doduru arini si na tie barabaratadi beto,
na puku tie qoraqoradi.
3 Va nama ni rini sari meadi;
guana bokala, pude gona ni sari koha;
lopu pa hinokara
si bokaboka si arini pa popoa,” gua se Zeremaea.
Zama se Zihova, “La pa keke tinavete va kaleana, beto si la pule pa keke, gua mo;
meke na lopu gilana Au tu rini.
4 Mu balau ni sari mua baere;
meke lopu raṉei sari tasimu.
Ura doduru tamatasi si na tie sekesekeidi
meke sari na baere si vari zama ṉoṉovali mo.
5 Keke baere si koha ia sa si keke nana baere
meke loke tie si zama nia sa hinokara.
Va tumatumae ni rini sari meadi pude kokoha;
va mabo puleni pa tinavete va kaleana.
6 Zeremaea, agoi si korapa koa pa korapa vinari kohai;
koari dia kinohakoha si korodia tumae Nau rini si Arau,”
zama vura gua se Zihova.
7 Gua ke, hiera gua si zama nia e Zihova Tadi na Qeto Minate:
“Doṉo la, kote va via i Rau pa nika sari tinoni pude podeki si arini,
ura sa pule si boka tavetia Rau
koa gua koasa sinea tadi na Qua tinoni?
8 Sari meadi rini si guana tupi variva mate;
na zama pa kinohakoha na sinekesekei si arini.
Pa ṉuzudia si zama va memehe si arini koasa turaṉadia;
ba pa bulodia si va nama ponia sipata mo rini si asa.
9 Vegua lopu kaqu va kilasi tu Arau sari?
Vegua lopu kaqu tubehe hobequ tu si Arau,
koa sa butubutu sapu gugua asa?” zama vura gua se Zihova.
10 Kote kaboi meke besu ni rau sari na toqere
meke kote tavetia rau si keke tinaruqoqo pa guguadi sari na vasidi pa qega.
Na vasidi popadi si arini, meke loke tie na enei,
meke sa kabodi ri na bulumakao ba lopu ta avoso.
Sari na kurukuru pa galegalearane si ele govete
meke sari kurukuru ṉame si ele taloa dia.
11 Zama se Zihova, “Kote tavete guni nia Arau na kobi remoremo sa popoa Zerusalema,
na tometomeana tadi na siki pinomo;
meke kote va evaṉae ni qega Rau sari na vasileana pa Ziuda,
pude loke tie kote boka koa i,” gua.
12 Na tie gilae veguguana si kote boka va bakalia si hie? Esei koa rini pu tava tumatumae koe Zihova kote boka tozi ni gita? Na vegua ke tava huara sa popoa meke tava eko palae guana qega sapu loke tie boka karovia?
13 Zama se Zihova, “Gua hire sari ginugua sina kilua rini sa Qua tinarae, sapu vekoa Rau pa kenudia; na lopu va tabe Au babe luli rini sari na Qua tinarae. 14 Ba lopu gua tu, luli tu rini sari bulodia sapu tasunadi; luli rini sari beku Beolo, gua sapu va tumatumae ni rina tiatamadia.” 15 Gua ke, hiera gua si zama nia e Zihova Tadi na Qeto Minate, sa Tamasa tadi pa Izireli: “Doṉo la, kote la Arau meke va hena ni ginani pasadi sari tie hire meke va napo ni kolo variva mate. 16 Kote va hurakatae i Arau la koa ri na butubutu sapu lopu gilani arini babe ari tiatamadia, meke kote hadu luli ni vedara Rau osolae va mate betoi Rau.”
17 Hiera gua si zama nia e Zihova Tadi na Qeto Minate:
“Mi kopu! Tioko mae ni sari barikaleqe pu hoke kabokabo pa haqohaqoana;
garunu maeni saripu tumaedi hola.”
18 Zama sari tinoni, “Va tuturei mae i
pude di mae kabo osolae honi kolo matamami
meke sari kolo si totolo pa opopo matamami.”
19 Na tinaruqoqo si ta avoso la pa Zaione:
“Ta huara si gita!
Noma hola sa kinurekure hie!
Kaqu rizu taloa si gita koasa nada popoa
sina sari nada vetu si ta huara gore,” gua.
20 Ego, gamu barikaleqe, avosia sa zinama te Zihova;
tukele lani taliṉamia koari Nana zinama.
Mi va tumatumae ni kabo sari tumia vineki;
vari totozi nia sa tinaruqoqo.
21 Na minate si ele haele nuquru gua koari nada vuida
meke ele nuquru koari nada vasileana ta gobadi;
ele va visavisa i sa sari na koburu koari na siraṉa
meke sari na tie vaqura koari na varivarigarana.
22 Mu zama guahe, “Hiera gua si zama vura nia e Zihova: ‘Sari tinidia rina tie matedi si kote eko lamae
gua rina ebasa pa inuma duduli,
guana huiti koa holadi mudina sa tie pakepakete,
meke loke tie pude pudiki vagi,’ ”
23 Hiera gua si zama nia e Zihova:
“Sa tie gilae si mani lopu zama nia sa nana ginilagilana lohina,
babe sa tie ṉiṉira si mani lopu vahesi pule nia koasa nana ṉiniraṉira,
babe sa tie tagotago si mani lopu vahesi pule nia koasa nana tinagotago,
24 ba asa pu hiva vahesi pule nia
* si mani vahesi pule nia mo pa ginugua hie eke mo;
sapu asa gilana Au meke tumae Nau,
sapu Arau e Zihova, si tataru va nabu ni na tokani sari na tie toṉoto,
meke vilavilasa va toṉoti pa ṉinoṉo koasa popoa pepeso.
Ura koa rina tinavete hire si qetuqetu si Arau,”
zama vura gua se Zihova.
25 “Sari rane si korapa mae, totoso kote va kilasi Arau sarini pu ta magu pa masa dia ba lopu pa maqomaqo dia: 26 sari pa Izipi, Ziuda, Edomu, Amoni, Moabi meke doduru pu koa koari na qega pa popoa seu. Ura sari doduru butubutu hire si hinokara lopu ta magudi, meke sa doduruna sa butubutu Izireli ba lopu ta magu pa bulodia si arini.”**
<- Zeremaea 8Zeremaea 10 ->
