Zeremaea 48

Sa Kinorokorotae pa Guguana Moabi

1 Pa guguana Moabi:

Hiera gua si zama nia e Zihova Tadi na Qeto Minate, sa Tamasa pa Izireli:*

“Mani ta levei sa vasileana Nebo, ura kote ta huara si asa.

Kiriataimi si kote tava kurekure meke kote ta vagi pa vinaripera;

sa vasina ta gobana si kote tava kurekure meke ta huara.

2 Kote noso sa vinahesina Moabi;

pa Hesiboni kote kuhana nia ri na tie pude huaria si asa meke zama:

‘Mae, mada va beto pania sa butubutu sana,’ gua.

Agoi tugo, tie duviduvilimu, si kote tava mokomoko;

sa vedara kote hadu luli igo.

3 Mi va avoso la koari na kinabo tadi pa Horonaimi,

kabo, na kamoi tinasuna.

4 Moabi si kote tava kilasa;

sari nana koburu hitekedi si kote kabo vura.

5 Lulia rini sa siraṉa sage la pa Luhiti,

kabokabodi meke ene la gua;

pa siraṉa gore la pa Horonaimi

si ta avoso sari na kinabo matagutu tana tinahuara.

6 Tuturei! Haqala taloa pude mi toa;

la tome pa soloso qega.

7 Sina raṉei goi sari mua tinavete meke tinagotago,

ke agoi ba kote ta paleke taloa,

meke sa beku Kemosi ba kote ta raovo vagi,

turaṉae sari nana hiama meke koimata.

8 Sa tie huhuara si kote kamo la pa doduru vasileana,

lopu keke vasileana sapu lopu kote ta huara.

Sa lolomo si kote ta ṉovala

meke sa pezara ululuna si kote ta huara,

sina e Zihova si ele zama.

9 Kei be tago tatapuru se Moabi,

pude mani tapuru taloa;*

sari nana vasileana si kote ivulu,

meke loke tie koa i.

10 Mani ta levei si asa pu lopu ṉaliṉali pa tinavete te Zihova!

Mani ta levei si asa pu tuqe pule nia sa vedara pa vinaripera!

Ta Huara sari Vasileana pa Moabi

11 Moabi si magogoso podalae tie vaqurana,

guana vaeni sapu tava naqiti eko mo,

lopu ta zoropo la koari na hopeke zagi,

lopu ele tava raovo taloa si asa.

Gua asa ke liṉiliṉi lea eko mo si asa

sa nana lomoso si lopu hobe.”

12 Ba zama vura guahe se Zihova, “Sari rane si korapa mae,

totoso kote garunu tie si Rau pude zozoropo vura pa zagi

meke kote zoropo vura nia rini se Moabi pa zagi;

kote va kokoba i rini sari nana zagi

beto meke poraka pani rini sari zagi arini.

13 Meke kote kurekure nia Moabi sa beku Kemosi,

gua sapu kurekure sa binaṉara Izireli

totoso raṉea rini sa beku pa Betolo.

14 Vegua meke kote boka zama guahe si gamu,

‘Gami sina varane, na tie ṉiṉira pa vinaripera, gua’?

15 Moabi si kote ta huara meke sari nana vasileana si kote ta vagi;

sari nana tie vaqura ta ronudi si kote mate beto,”

zama vura gua sa Baṉara, e Zihova Tadi na Qeto Minate sa Pozana Sa.

16 “Sa tinahuara te Moabi si tata mo;

sa tinasuna tanisa si kote tuturei kamo mae nana.

17 Mi kabo ia, gamu pu koa pa vari likohaena sa,

doduru pu tumae nia sa vinalavata tanisa;

mi zama guahe, ‘Namu moku va kaleana sa kolu binaṉara,

namu ilasa sa hodu leleana!’ mi gua.

18 Gore mae koasa mua vinalavata,

mamu habotu gore pa pepeso popana.

Kei, gamu pu koa mia pa Diboni,

ura Asa pu huaria si pa Moabi

si kote kamo atu koa gamu

meke kote daku goreni Sa sari mia vasileana ta gobadi.

19 Turu pa vale siraṉa mamu kopu,

gamu pu koa pa Aroere.

Nanasia sa tie haqala meke sa barikaleqe govetena,

nanasa guahe, ‘Nasa sia sapu korapa ta evaṉa?’

20 Kote olaṉa si arini, ‘Moabi si ele hoqa.’

Mi kabo ia na variva kurekurena.

Mi tozi vura nia pa taqele Ovuku Anoni

sapu ta huara palae sa popoa Moabi!

21 Na vinaripitui si ele kamo koasa pezara ululuna,

koari na vasileana pa Holoni, Zaza, meke Mepata,

22 pa Diboni, Nebo, Beti Dibilataimi,

23 pa Kiriataimi, Beti Qamulu, meke Betimeoni,

24 pa Kerioti, meke Bozira,

kamo la koari doduru vasileana te Moabi seu na tata.

25 Sa ṉiniraṉira te Moabi si ta ilasa;

sa limana si moku,”

zama vura gua se Zihova.

26 “Va viviri ia,

sina va gugue la si asa koe Zihova.

Vekoa se Moabi mani eko koasa luana telena;

vekoa mani tava sisirei.

27 Vegua, lopu e Izireli tu sapu va sisire nia gamu?

Vegua, somana ta tuqe vagi sia koari tie hikohiko,

ke hiruhiru batu si gamu meke hegere

pana poza ia gamu sa pozana?

28 Luara pani sari mia vasileana, mamu la koari na kauru patu haqihaqiri,

gamu pu koa pa Moabi.

Mi guana kukuva sapu tavete nana vori

pa batu huda.

29 Doduru tie si ele avoso nia sa vinahesi pule te Moabi,

na noma hola sa vinahesi pule tanisa meke sa vina titie,

sa vinahesi pule meke sapu doṉo va gore tie,

meke sa bulona sapu va sisireni sari tie.

30 Arau tumae nia Qua sa nana hahanana vinahesi pule,

meke sapu loketoṉa va gorevura i sari nana vinahesi pule.

31 Gua ke kaboi Rau sari pa Moabi,

kuliusu ni Qua sari doduru pa Moabi,

kuliusu ni Qua sari tie pa Kiri Hareseti.

32 Kabo igo Arau, gua sapu kabo sari na tie pa Zazera,

kei, na vaeni pa Sibima.

Sari lelaṉamu si araha kamo latu pa Kolo Matena;

kamo latu si arini koasa kolo pa Zazera.

Sa tie huhuara si ele huari

sari mua vuvua saganadi meke mua qurepi.

33 Sa qinetuqetu si ele taloa

koari na inuma pa Moabi.

Arau ele va nosoa sa totolona sa vaeni koasa munamunalana;

loke tie ene pulei pa kinukili qinetuqetu.

Na kukili tugo sari kaiqa,

ba lopu pa qinetuqetu.

34 Na mamalaiṉi kabo tadirini si sagesage nana

pa Hesiboni kamo pa Eleale meke Zahazi,

pa Zoara kamo la pa Horonaimi meke Eqalati Selisia,

ura sa tototolo pa Nimirimi ba popa taloa mo.

35 Pa Moabi si kote va noso i Rau

sari vinariponi tadi kasa koari na vasidi ululudi

meke sari vina uququ humaṉa lea la koari dia tamasa,”

zama vura gua se Zihova.

36 “Ke sa buloqu si kaboa sa se Moabi guana ivivu;

guana ivivu totoso taruqoqo sari tie pa Kiri Hareseti.

Sari na tinagotago va gavori rini si taloa beto.

37 Doduru batu si ta neri herodalo beto

meke sari gumi si ta koto palae;

sari lima si ta magu va bakora

meke va sage poko baika beto si arini.

38-39 Pa doduru batu vetu pa Moabi

meke koari na varivarigarana

si loketoṉa ba na kabo mo,

ura ele porakia Rau se Moabi

guana zagi sapu loke tie hiva nia.

Kei, na ilasa sa sia ta kasa! Ke avoso la sa kinabo!

Na kurekure ke mudi mae bisa!

Moabi si ta evaṉae na tiṉitoṉa ṉoṉovalana,

na tiṉitoṉa variva matagutu koarini pu koa vari likohae nia,”

zama vura gua se Zihova.

Lopu Boka Govete se Moabi

40 Hiera gua si zama nia e Zihova:

“Dotu! Na atata* si tedoro gore sana,

repahi sa tatapuruna panaulu koe Moabi.

41 Sa vasileana pa Kerioti si kote ta tuqe vagi

sari vasileana ta gobadi ba kote gua tugo.

Pa rane asa si sari bulodi rina varane te Moabi

si kote gua sa bulona sa barikaleqe podopodona.

42 Moabi si kote ta huara koasa nana butubutu baṉara

sina va gugue la si asa koe Zihova.

43 Na hinoloqoru, na pou, meke sipata si aqani gamu,

gamu na tinoni pa Moabi,”

zama vura gua se Zihova.

44 “Asa pu govete pa minatagutu

si kote hoqa nuquru pa pou,

asa pu haele vura pa pou

si kote ta sipata vagi;

ura kote va kamo la nia Rau pa Moabi

sa vuaheni tana vina kilasa tanisa,”

zama vura gua se Zihova.

45 “Pa Hesiboni si aqoro

sari tie govetedi si turu hoboro mo,

ura sa nika pa Hesiboni si araha,

halala vura pa vari korapana Sihoni;

sulu ia sa sa raena Moabi,

meke sari herahera batudi ri na tie vahesi puleni.

46 Mani ta levei si agoi, Moabi!

Sari tie vahesina sa beku Kemosi si ta huara;

sari tumu koreo si ta raovo

meke sari tumu vineki si ta turaṉa taloa.

47 Ba kote veko pulei Rau sari tinagotago te Moabi

koari na rane pu korapa mae,”

zama vura gua se Zihova.

Tani beto sa kinorokorotaena sa vinaripitui sapu tozia e Zihova koasa guguana Moabi.

<- Zeremaea 47 Zeremaea 49 ->