1 Mudina sapu ta raovo taloa nia e Nebukaneza sa baṉara pa Babiloni se Zehoiakini sa tuna e Zehoiakimi sa baṉara pa Ziuda, meke sari nana koimata, na tie tavetavete pa lima meke sapu bokabokadi pa tavete vetu na gua, si va dogoro nau e Zihova si karua huneke piqi pa kenuna sa Zelepade te Zihova.[a] 2 Keke huneke si koa ia na piqi leanadi, sapu gugua hoke tuturei sagana; meke keke huneke pule si koa ia na piqi kaleanadi, kaleana sapu lopu kote boka ta hena.

3 Meke nanasa au e Zihova si arau, “Zeremaea nasa si dogoria goi?” gua.

Olaṉa guahe si rau, “Na piqi, sapu leanadi si leana hola tu, ba sapu kaleanadi si lopu boka ta hena.”

4 Meke kamo mae sa zinama te Zihova koa rau: 5 “Hiera gua si zama nia Arau Zihova, sa Tamasa pa Izireli: Gua sari piqi hire, si na leanadi guni ni Arau sari pa Ziuda pu vata raovo taloa i Arau la pa popoa pa Babiloni. 6 Sari mataqu kote kopu ni pude leana si arini, meke kote turaṉa pule mae ni Arau koasa popoa hie. Kote kuri sage ni Arau meke lopu daku gore ni; kote lete i Arau meke lopu rabutu pani. 7 Kote poni Rau sa bulo pude gilanau rini, sapu Arau tugo se Zihova. Arini si kote Qua tinoni, meke Arau si kote dia Tamasa, ura pa doduru bulodia si kote pule mae si arini koa Rau.”

8 Zama pule se Zihova, “Ba sapu gua sari piqi kaleanadi sapu lopu boka ta hena, si kote va kilasia Arau se Zedekaea sa baṉara pa Ziuda, sari nana koimata, meke saripu koa hola pa Zerusalema, be koa pa popoa hie si arini babe pa Izipi. 9 Kote va doṉo hikare i Rau si arini, na kineha variva hakohako koari doduru butubutu pa popoa pepeso, na vina sisireana koari na vasidi pu hadu la ni Rau. 10 Kote garunu la nia Rau sa vedara, na soṉe, meke na oza koa rini osolae mate beto si arini koasa popoa sapu Arau poni la nia koarini meke sari tiatamadia.”

<- Zeremaea 23Zeremaea 25 ->