Zeremaea 11

Se Zeremaea meke sa Vinariva Egoi

1 Hie sa zinama sapu vala nia e Zihova koe Zeremaea: 2 “Mu avosi sari vina toṉoto pa korapana sa vinariva egoi. Mu tozini sari na tinoni pa Ziuda meke sarini pu koa pa Zerusalema. 3 Tozini sapu hiera gua si zama nia e Zihova, sa Tamasa pa Izireli: ‘Mani ta levei sa tie pu lopu va tabei sari vina toṉoto koasa vinariva egoi hie, 4 sari vina toṉoto pu garunu ni Arau koari na tiatamamia totoso turaṉa vurani Arau si arini pa Izipi, vura taloa koasa tina sigitina sa nika lerana sana.’ Zama si Rau, ‘Va tabe Au meke taveti sari doduru gua pu garunu ni Rau koa gamu, meke gamu si kote na Qua tinoni, meke Arau si kote mia Tamasa. 5 Gua meke kote tiqe va gorevura i Arau sari na vina tatara pu tokotokoro ni Arau koari na tiatamamia, sapu pude poni gamu sa pepeso masuruna sapu sokua na ginani na zipale,’ gua. Asa sa popoa sapu tagoa gamu ṉinoroi.”

Olaṉa si rau, “Mani gua tugo, Zihova.”

6 Zama se Zihova koa Rau, “Mu zama vura ni sari zinama hire koari na vasileana pa Ziuda meke koari na siraṉa pa Zerusalema: ‘Mi avosi sari na vina toṉoto koasa vinariva egoi hie; mamu luli i. 7 Podalae pa totoso sapu turaṉa vurani Rau sari na tiatamamia pa Izipi kamo ṉinoroi, si va balau pilipule i Arau si arini, “Mi va tabe Au,” guni ni Arau. 8 Ba lopu hite va avoso babe va taliṉa mae si arini; na luli tu arini sari bulo kaleanadi sapu tasunadi hola. Ke va kamoni Rau koarini sari lineveleve pu koa koasa vinariva egoi sapu garunu nia Rau koarini pude lulia gua ba lopu lulia tu arini.’ ”

9 Ke zama guahe se Zihova koa rau, “Kaiqa tie si va gugue pa vari korapadi ri na tinoni pa Ziuda meke koarini pu koa pa Zerusalema. 10 Ele pule la si arini koari na sinea tadi na tiatamadia; arini pu korodia avosi sari Qua zinama. Ele luli rini sari votiki tamasa. Sa butubutu pa Izireli meke sa butubutu pa Ziuda si ele sekea rini sa vinariva egoi pu tavetia Rau koari na tiatamadia. 11 Gua ke hiera gua si zama nia e Zihova: ‘Kote va kamo ni Rau si keke tinasuna sapu lopu kote boka govete nia rini. Be kabo mae si arini koa Rau ba lopu kote avosi Rau. 12 Sari vasileana pa Ziuda meke sari na tinoni pa Zerusalema si kote kabo la koari na tamasa pu va uququ ni oto huda humaṉa lea rini, ba lopu kote boka ta tokae hokara ni rini pana kamo sa dia totoso tasuna. 13 Agoi Ziuda, sari tamasa tamugoi si soku gua tugo sari mua vasileana agoi; meke sari na hope pu taveti goi pude va uququ oto huda humaṉa lea la koe Beolo sa tamasa variva kurekurena sana, si soku gua tugo sari na siraṉa pa Zerusalema.’

14 Mu lopu varavara poni sari tie hire babe kabo i babe tepatepa poni si arini, sina lopu kote va taliṉa la si Arau pana kabo mae si arini koa Rau pa dia totoso tasuna.

15 Na sa si tavetia rina tinoni Izireli pu tataru ni Rau pa Qua Zelepade

sipu korapa taveti tugo rini sari soku dia tinavete kaleadi?

Vegua boka tava leseve pa tinasuna si gamu sina va vukivukihi si gamu?

Ura totoso taveti tu gamu sari mia tinavete kaleadi

si tiqe qetuqetu hola si gamu.”

16 Izireli, na huda olive masiqarana poza nigo e Zihova si goi,

sapu variva dogoro meke vua va leana.

Ba koasa kurumuna sa raneboṉi nomana

si kote va katu nia nika Sa,

meke va moku pani sari lelaṉana.

17 Se Zihova Tadi na Qeto Minate, pu letemu si goi, si ele garunu atu nia sa tinasuna koa goi, sina sa butubutu Izireli meke sa butubutu Ziuda si ele taveti sari hahanana kaleadi meke va gevuru Au pude bugoroni sari na vina uququ oto huda humaṉa lea la koe Beolo.

Sa Kinuhana pude Va Matea se Zeremaea

18 Va dogoro nau e Zihova sapu kuhana nau rini si rau ke gilania rau, meke dogoria tugo rau sapu nasa si korapa tavetia rini. 19 Na guana lami mo si arau sapu ta turaṉa la pude tava mate; lopu rovea rau sapu ele kuhana nau rini si arau, ba sa dia zinama si guahe,

“Mada huaria sa huda meke sari vuana;

mada seke pania gana koasa popoa tadi tie toadi,

pude mani lopu tava nonoga sa pozana sa,” gua.

20 Ba, Zihova Tadi na Qeto Minate, Agoi pu pitu pa tinoṉoto meke podeki sari bulo na binalabala tadi na tie, maqu dogoro Igo tubehi Agoi sari tie hire, sina koa Goi mo si veko atu nia rau sa qua ginugua hie.

21 Gua ke, hiera gua si zama nia e Zihova pa guguadi ari tie pa Anatoti pu hata ia pude vagi pania sa mua tinoa meke zama guahe, “Beto, mu lopu korokorotae pa Pozana e Zihova, pude lopu gua si kote mate si agoi pa lima mami,” gua. 22 Ke hiera gua si zama nia Arau Zihova Tadi na Qeto Minate: “Kaqu va kilasi Arau si arini. Sari dia tie vaqura si kote mate pa vedara meke sari dia koreo na vineki si kote mate pa soṉe. 23 Lopu kaqu keke arini si kote koa hola, ura na tinahuara si kote va kamo ni Arau sari tie pa Anatoti pana kamo sa dia totoso pude tava kilasa.”

<- Zeremaea 10 Zeremaea 12 ->