1 Gua asa, ke kaqu kopu valeana si gita koari na vina tumatumae hinokaradi, pu ele avosi gita, pude mada lopu tapala taloa. 2 Sa inavoso sapu vala nia rina mateana koari na tiatamada pukerane si hinokara, meke asa sapu sekea, si vagia tugo sa koe Tamasa sa vina kilasa sapu garona. 3 Vea meke kote boka govete nia gita sa vinakilasa te Tamasa be doṉo pania gita sa tinaharupu nomana hie? Sa Baṉara telena si ele tozia, meke arini pu avosona sa, si tozia koa gita sapu hinokara tugo sa tinaharupu asa. 4 Tamasa ba va sosodea tugo koari na votivotiki tinavete variva magasadi. Meke ele hopeke poni ni tugo Sa koari Nana tie sari na vinariponi mae guana koasa Maqomaqo Hope, gua sapu hiva nia Sa.
Asa sapu Turaṉa Va Kamo Gita pa Tinaharupu
5 Sa tinoa koasa kasia popoa vaqura vugo repere sapu korapa vivinei nia gita he, si lopu ari na mateana si vizati Tamasa pude koa totoli nia si asa.
6 Ba koa nana keke vasina, si zama nia sa Kinubekubere Hope sapu guahe:
* “Nasa sa tie ke balabala sisigitia Goi,
meke na tie hokara ba kopu nia Goi?
7 Ura ele tavetia Goi sa tie pa kinehamu Goi,
pude koa pa kauruna sa Mua ṉiniraṉira, pa kaurudi sari na mateana.
Meke ele ponia ṉiniraṉira na vina lavata Goi koa rina tie pude koa totoli,
8 meke va boka ia Goi pude ṉati hiniva ni sari doduru tiṉitoṉa,” gua.
Totoso va boka ia Tamasa sa tie pude ṉati hiniva ni sari doduru tiṉitoṉa, si loketoṉa sapu lopu kaqu koa pa kinopu tanisa tie. Ba kamahire si lopu ele dogoria gita sapu koa ṉati hiniva ni sa tie sari doduru tiṉitoṉa.
9 Ba dogoria nada se Zisu pa keke totoso papakana visoroihe si ele tava pepekae holani sari na mateana si Asa, meke koa gua mo na tie hokara, pude pa korapa tataru vari harupi te Tamasa, si mate pae ni Sa sari doduru tie. Kamahire si va baṉaria pa tinolava na vinalavata Tamasa si Asa, sina koa gua koa sa Nana tinasigiti na minate pa korosi.
10 Sari doduru tiṉitoṉa si ta tavete pa limana sa Tamasa. Taveti Sa si arini pude Nana telena. Gua asa, ke padana tugo si pude va gotogoto ia Tamasa se Zisu, meke mae koa ta sigiti, pude va gorevura ia sa Nana hiniva, pude soku tie si madi boka ta evaṉae na koburu te Tamasa, meke pude madi boka somana tagoa sa Nana tinoa tolavaena. Ura e Zisu si kekenu ni si arini meke va kamoi pa tinaharupu.
11 E Zisu si va toṉoti sari na tinoa tadi na tie. Asa meke sari doduru pu ele va toṉoti Sa, si keke e Tamasa mo sa Tamadia. Gua asa ke lopu kurekure nia Sa pude poza ni tasina si arini. 12 Zama guahe si Asa:*
“Kaqu tozi vura nia Rau sa Pozamu koari na turaṉaqu,
kaqu vahesigo Rau pa vari korapana sa vinarigara tadi na tinoni.”
13 Meke hie si zama nia Sa:
* “Kote vala rau sa qua rinaṉeraṉe koasa Tamasa,” gua.
Meke guahe pule si zama nia Sa:
“Hiera si Rau, koa turaṉi Rau sari koburu pu poni Nau sa Tamasa,” gua si Asa.
14 Gita doduru sapu ta pozae na koburu Tanisa, si na tie hokara mo. Ke gua asa, si mae ta evaṉae na tie gua tugo mo gita se Zisu, pude gua tu asa si kote boka mate si Asa, pude va kilasia Sa se Setani, sapu tagona sa ṉiniraṉira tanisa minate, 15 pude boka vata rupahi Sa sarini pu koa ta pusi koe Setani pa minatagutuna sa minate. 16 Gilana valeania gita sapu lopu ari na mateana si mae nia Zisu pude harupi, ba gita na tie tu, sapu na tutina e Ebarahami. 17 Gua asa ke garo tugo pude mae ta evaṉae na tie hokara se Zisu, pude pa doduru ginugua, si koa kekeṉoṉo gua tugo ri Nana tie, meke pude boka ta evaṉae na Ṉati Hiama d kenukenue si Asa, meke pude na nabulu ta ronuena te Tamasa. Meke pa siraṉa gua asa si boka taleoso ni na vulasa pani Sa sari na sinea tadi na tie te Tamasa. 18 Meke pude boka toka ni Sa sarini pu ta toketoke, sina Asa ba ele ta toketoke na koa ta sigiti kekeṉoṉo gua tugo arini.
<- HIBURU 1HIBURU 3 ->
