10
1 Sa Tinarae te Mosese si na vina titila mo tadi na tiṉitoṉa hinokaradi pu korapa mae, lopu arini sari na tiṉitoṉa hinokara. Sari na vina vukivukihi pu taveti rini si kekeṉoṉo mo pa doduru vuaheni. Gua asa ke lopu boka pude va toṉotia sa Tinarae te Mosese pa ginugua vina vukivukihi, sa tinoa tadi na tie pu mae koe Tamasa.
2 Be ele boka tava via pa dia sinea sari na tie pu vahesia sa Tamasa, si lopu kote va gilagila pulea rini sa sinea, meke lopu kote voriti nia rini si pude la va vukivukihi pilipule.
3 Ba gua sapu ta evaṉa, si doduru vuaheni mo va vukivukihi si arini, ke balabala pule lai rini sari na dia sinea.
4 Ura sa ehara bulumakao, na qoti, si loke dia ṉiniraṉira pude vagi pani sari sinea tana tie.
5-6 Pa ginugua asa si zama guahe sa Karisito koe Tamasa totoso mae si Asa pa popoa pepeso:*
“Lopu hiva nia Goi sa vina vukivukihi meke na vinariponi pa hope,
sa vina vukivukihi vina uququ
babe na vina vukivukihi vinulasa sinea si lopu qetu ni Goi,
ba ele va nama vekoa Goi si keke tini taqarau.
* 7 Gua asa ke zama si Rau:
‘Hiera si Rau Qua Tamasa;
mae si Rau pude tavetia sapu gua hiva nia Goi,
gua sapu ta kubere sa guguaqu Rau koasa buka ta viqusuna,’ ” gua si Asa.
8 Kekenu si zama guahe si Asa: “Sari na vina vukivukihi na vinariponi, meke sa vina uququ kurukuru, na vina vukivukihi vinulasa si ele tava egodi pa Tinarae te Mosese si arini ba lopu qetu ni Goi,” gua.
9 Beto asa si zama pule si Asa: “Hiera si Rau Qua Tamasa, mae si Rau pude tavetia sapu gua hiva nia Goi,” gua si Asa. Gua asa ke huara pania Tamasa sa hahanana vina vukivukihi koasa vinariva egoi te Mosese, meke vala hobea Sa sa vina vukivukihi te Karisito.
10 Gua asa ke, koasa hiniva te Tamasa, si tava via sari nada sinea sipu va vukivukihi nia Karisito koe Tamasa sa Tinina soti kekeke totoso mo koari doduru.
11 Sari na hiama tadi na tie Ziu si hoke taveti sari vina vukivukihi koari hopeke rane, meke hoke kekeṉoṉo mo doduru totoso sari na vina vukivukihi pu taveti rini, ba sari na vina vukivukihi sara si lopu boka vagi pani sari na sinea tadi na tie.* 12 Ba Zisu si keke totoso mo mae tavetia sa vina vukivukihi sapu va vulasa pani sari na sinea tana doduru tie ninae rane ka rane, beto asa si la habotu si Asa pa kali mataona sa Tamasa pa Maṉauru.* 13 Vasina si la koa si Asa osolae vekoi Tamasa sari Nana kana pa kauru Nenena. 14 Ura pa keke vina vukivukihi mo sapu tavetia Sa, si tava gotogoto ninae rane ka rane sarini pu va vulasa pani Sa sari dia sinea. 15 Ele va dogoroni gita sa Maqomaqo Hope sapu hinokara si gua asa, ura ele zama kenu gua he si Asa:
16 “Hiera sa vinariva egoi sapu kote tavetia Rau koasa butubutu Izireli
mudina sa totoso asa,” zama vura gua se Zihova.
* “Kaqu va gilana ni Rau pa bulodia sari na Qua tinarae,
meke kaqu va nonoga ni Rau pa dia binalabala,” gua.
17 Meke zama gua pule he sa Baṉara: “Lopu kote balabala pule i Rau sari doduru dia sinea na tinavete kaleadi pu evaṉi rini,” gua si Asa.
* 18 Ke pana taleosae sari na sinea, si lopu kote ta hivae sari na vina vukivukihi vinulasa.
Mada Tata Mae koe Tamasa
19 Kasa tasiqu, sa eharana e Karisito si ele poni gita sa minataqara pude nuquru kamo la ia sa Lose Hopena pa Hopena.
20 Totoso ta rikata sa poko goba si ele tukelia Zisu kamahire si keke siraṉa vaqura meke toana, sapu sa tinina soti.
21 Kamahire si koa Nana nada Ṉati Hiama Kenukenue sapu kopu nia sa Zelepade te Tamasa pa Maṉauru.
22 Gua asa ke mada tata la koe Tamasa pa bulo viana, meke pa rinaṉeraṉe hinokara, koari na buloda pu ele tava viadi koari na binalabala seadi, meke sari na tinida pu ele tava via pa kolo viana.
* 23 Mada tuqe va nabua sa rinaṉeraṉe sapu tarae nia gita, ura ta ronuena sa Tamasa sapu ponini gita sa Nana vina tatara.
24 Mada vari balabala i, na vari tokae pude vata dogoro nia sa tataru meke pude tavete valeana.
25 Mada lopu luara pania sa hahanana binaere varigara pa vinahesi gua ari kaiqa pu ele luara pania. Gita si mada variva ṉiṉirai la tu, sina gilania nada sapu sa rane tanisa Baṉara si tata mae.
26 Ura be gilania nada gita sa hinokara, ba tavete nono la i tu gita sari na kinaleadi, si loketoṉa pule keke vina vukivukihi si kote boka tavetia gita pude va via i sari na nada sinea. 27 Ba sapu korapa koa si na minatagutuna tu sa vinaripitui, meke sa nika maṉinina sapu kote sulu pani sarini pu kana ia sa Tamasa.* 28 Pa Tinarae te Mosese, si be sea si keke tie, si loke tinaleosaena, ba kaqu tava mate mo si asa, be guana koa dia si karua babe hola ni karua tie va sosode pu dogoro sotia si asa.* 29 Ego, arini pu va karia sa Tuna Tamasa, meke balabala va loke laena ia sa eharana Zisu sapu va vukivukihi nia Tamasa pude taleoso ni sari nada sinea, meke arini pu zama ṉoṉovalia sa Maqomaqo tataru vari harupi te Tamasa, si kote noma hola la tu sa vina kilasa pu kote vagia rini.* 30 Gilania gita si Asa sapu zama guahe: “Arau si kote tubehi; kote hobei Rau si arini,” gua. Meke zama gua pule hie si Asa: “Sa Baṉara telena si kaqu varipitui ni sari Nana tie,” gua.* 31 Keke tiṉitoṉa variva matagutu hola si pude hoqa la si keke tie pa limana sa Tamasa toana.
32 Mi balabala pule la ia sa totoso pu tiqe tagoa gamu sa kalalasa te Tamasa. Koari na totoso arini si turu va nabu pa tinasigiti si gamu koari soku ginugua. 33 Koari na totoso arini si hoke ta ṉoṉovala si gamu pa kenudi rina tie, meke kaiqa totoso si hoke hiva somana si gamu koari na tie te Karisito turaṉa mia pu ta ṉoṉovala kekeṉoṉo gua gamu. 34 Hoke tataru ni na toka ni gamu sari na tie ta pusidi, meke be zau vagi rina mia kana sari doduru mia likakalae, ba koa ṉoṉo si gamu, sina gilania gamu sapu sari mia tinagotago sapu leadi hola, si koa hola ninae rane ka rane. 35 Gua ke mi koa varane pa mia rinaṉena sa Tamasa. Mi tumae nia sapu noma hola sa pinia sapu kote ta poni nia gamu. 36 Ta hivae pude koa va ṉoṉo si gamu pa tinasigiti koa rina kana te Karisito, pude mi boka va gorevura ia sa hiniva te Tamasa, meke kaqu poni gamu Sa sa pinia pu ele va nama vekoa Sa. 37 Ura guahe si zama nia sa Kinubekubere Hope:*
“Lopu seunae meke kote mae mo si Asa, lopu kaqu va sasanae.
38 Sari na Qua tie toṉoto si kote toa pa rinaṉeraṉe;
ba be keke arini si kekere pule la pa nana tinoa koana,
si lopu kote qetu nia Rau si asa,” gua sa Tamasa.
39 Ba gita si lopu gua rina tie pu kekere pule la pa dia tinoa koana, meke muliuṉu, ba na tie ta harupuda pa korapa nada rinaṉeraṉe.
<- HIBURU 9HIBURU 11 ->
