1 Koasa vina hiokona eke rane pa vina zuapa sidara, si kamo gua koe poropita Haqai sa zinama te Zihova: 2 “Mu zama la ia se Zerubabele sa tuna koreo e Silitili, sa qavuna, koe Zosua sa tuna koreo e Zehozadaki, sa ṉati hiama kenukenue, meke koari ka visavisa tinoni koa holadi isara. Nanasa i, 3 ‘Esei si koa hola koa gamu sapu dogoria sa tinolava tanisa Zelepade kekenu? Vea doṉo gua si asa koa gamu kamahire? Hokara doṉo guana keke vetu hoborona mo sia?*Ezr 3:12 4 Ba agoi Zerubabele, kamahire si mu va ṉiṉirae,’ zama vura gua se Zihova. ‘Agoi Zosua, tuna koreo e Zehozadaki, sa ṉati hiama, mu va ṉiṉirae. Mi va ṉiṉirae, gamu doduru tinoni koasa popoa,’ zama vura gua se Zihova, ‘mamu tavetavete. Ura Arau korapa koa turaṉa gamu si gamu,’ zama vura gua se Zihova Tadi na Qeto Minate. 5 ‘Hierana sapu variva ego nia Arau koa gamu totoso vura si gamu pa Izipi. Meke koa koa gamu sa Maqomaqoqu Arau. Mi lopu matagutu.’*Ekd 29:45-46

6 Hiera gua si zama nia e Zihova Tadi na Qeto Minate: ‘Pa vasi totoso hite si kote niu ia Rau sa galegalearane meke sa popoa pepeso, sa kolo lamana meke sa pepeso popana.*Hib 12:26 7 Kote niu i Arau sari doduru butubutu, meke sari tinago tadi doduru butubutu si kote mae tani, meke kote va siṉi nia tinolava Rau sa Zelepade hie,’ zama gua se Zihova Tadi na Qeto Minate.

8 ‘Na siliva si Qua meke na qolo si Qua tugo,’ zama vura gua se Zihova Tadi na Qeto Minate.

9 ‘Sa tinolava tanisa Zelepade hie si kote hola nia sa tinolava tanisa Zelepade koana, meke koasa vasina hie si kote veko ia Rau sa binule,’ zama vura gua se Zihova Tadi na Qeto Minate.”

10 Koasa hiokona made rane pa vina sia sidara, koasa vina rua vuahenina sa binaṉara te Dariasi, si kamo mae koe Haqai sa poropita sa zinama te Zihova: 11 “Hiera gua si zama nia e Zihova Tadi na Qeto Minate: ‘Nanasi sari hiama sapu sa gua sa tinarae: 12 Be guana hade vagi ia keke tie si keke masa, sapu tava madina, pa nana poko meke tiqu hola ia sa poko tanisa si keke bereti babe ginani kinana, na vaeni, na oela babe kaiqa ginani pule, si vea kote karovo sa vina madi asa meke madi tugo sapu ta tiqu?’ ”

Olaṉa pule sari hiama, “Uve, kote boni si asa,” gua.

14 Meke zama se Haqai, “Zama vura guahe se Zihova, ‘Kote gua tugo asa sari tie hire meke sa butubutu hie pa Kenuqu. Be nasa si tavetia rini meke be nasa si vukivukihi nia rini vasina, si kote boni tugo, sa tinavete meke sa vinukivukihi.’

15 ‘Ego, podalae pa rane ṉinoroi si mu viliti ia si gua hie, vilitia sapu vegua sa mia ginugua sipu lopu ele vari hakei la sari patu koa sa Zelepade te Zihova hie. 16 Totoso la pudiki si keke tie koa keke kobi ginani sapu hiokona puta koa ia, si manege puta mo si boka ta vagi. Meke totoso la si keke tie pude vagi ia si keke gogoto lita vaeni si made ṉavulu puta lita mo si koa. 17 Arau seke pani sari doduru tinavete pa limamia pa minoho, nokinoki, meke givusu, na kabukabue aesi, gua ba lopu hite kekere mae si gamu koa Rau, zama vura gua si Arau Zihova. 18 Podalae koasa rane hie, koasa hiokona made rane pa vina sia sidara, si mi vilitia sa rane sapu tavetia gamu sa sinokiraena sa Zelepade te Zihova. Viliti va leana ia gamu: 19 Vea, koa dia kaiqa kiko koa holadi pa vetu vekovekoana ginani? Ura kamo kamahire si loketoṉadi sari vua koari na inuma vaeni meke huda piqi, sari pomeqaraneti, meke huda olive.

Podalae koasa rane hie si kote mana ni gamu Arau si gamu,’ gua se Zihova.”

20 Kamo pule mae sa Zinama te Zihova koe Haqai pa vina rua totoso koasa rane tugo asa, vina hiokona made rane pa vina sia sidara: 21 “Tozi nia se Zerubabele sa qavuna pa Ziuda sapu kote niu ia Rau sa galegalearane meke sa popoa pepeso. 22 Kote va betoi Arau sari habohabotuana binaṉara meke kote huari Rau sari ṉiniraṉira tadi butubutu baṉara sapu karovodi. Kote va opo i Rau sari na totopili varipera meke sari tie koidi; sari hose meke sari tie koidi si kote hoqa, teledia kote vari seke va matei.

23 Koasa rane asa, zama vura gua si Arau Zihova Tadi na Qeto Minate, si kote vagi igo Arau si agoi, Qua nabulu Zerubabele sa tuna koreo e Silitili, zama vura gua si Rau Zihova, meke kote tavete igo Rau pude guana Qua riṉi binaṉara pa kakarutuqu, ura na ele vizata igo Arau si agoi, zama vura gua si Rau Zihova Tadi na Qeto Minate.”

<- Haqai 1