QALESIA 4

1 Sapu gunia rau si guahe: Totoso hitekena sa koburu tavia sapu kote tagodi sari doduru tinago tanisa tamana, si lopu votikaena si asa koa sa pinausu, be vea tago guni sa sari doduru tinago arini. 2 Totoso korapa koburu vaqura si asa, si kaiqa tie tu kopu nia, na vatanai sari nana tinavete, osolae kamo sa totoso garona pu vizatia sa tamana. 3 Gita ba kekeṉoṉo gua tugo asa. Visoroihe si guana koburu si gita, meke ele tava pinausu si gita koari na tinarae pu totoli ni gita pa doduruna sa kasia popoa. 4 Ba sipu ele kamo sa totoso garona, si garunu mae nia Tamasa sa Tuna, meke mae podo pa barikaleqe, meke koa pa vina tabena sa Tinarae te Mosese, 5 pude harupi saripu ta pusi koasa Tinarae sana, pude da ta pausu, meke pude na koburu soti te Tamasa si gita.[a]

6 Ura na tuna Tamasa si gita, gua asa ke garunu mae nia Tamasa pa korapa buloda sa Maqomaqona sa Tuna, meke va boka gita Sa, pude zama koasa Tamasa: “Tamaqu, Tamaqu” gua. 7 Gua asa ke lopu na pinausu si goi kamahire, ba na tuna. Meke sina na tuna Sa si goi, ke kaqu ponigo Tamasa gua saripu va nama ni Sa koari na tuna.

Balabala Hola i Paula sari na Tie Qalesia

8 Visoroihe si lopu gilania gamu sa Tamasa, ke koa tava pinausu si gamu koari na maqomaqo kaleadi pu lopu na Tamasa. 9 Kamahire sapu gilania gamu sa Tamasa, babe maqu zama guahe, ta gilana koe Tamasa si gamu; si na vegua ke hiva kekere pule la si gamu koari na tinarae koadi saripu malohoro meke loke laedi? Na vegua ke hiva koa tava pinausu pule tu koa rini si gamu? 10 Ke hoke kopuni gamu sari kaiqa rane, na sidara, meke sari na totoso inevaṉa, na vuaheni pa Tinarae tadi na tie Ziu. 11 Talotaṉani gamu rau si gamu! Guana kote ta oki palae hoboro mo sari na qua tinavete koa sa tinupiti mia gamu.

12 Kasa tasiqu, tepa zoṉazoṉa gamu rau, pude mi keha luli au pa kinopuna sa Tinarae te Mosese, sapu gua ele keha luli gamu rau si gamu na tie Zenitailo. Loke kinaleana si ele tavete mae nia gamu koa rau. 13 Gilania mia gamu sapu gua meke boka atu tarae nia rau sa Inavoso Leana pa qua totoso kekenu koa gamu. Na koa gua sapu mohoqu si rau. 14 Be vea ta podeke gua si gamu koasa minoho pa tiniqu, ba lopu hite etulau na kilu pani au gamu si rau. Guana vina kamona keke mateana, ba be e Zisu Karisito si tavete guni nau gamu. 15 Noma hola sa mia qinetuqetu pa totoso asa, ba vegua kamahire? Ura guahe si boka va sosodea rau koa gamu: Sapu be guana hoke boka gugua, si be ele lobiti poni nau mo gamu sari na matamia. 16 Vegua, sina tozini gamu rau sa hinokara, ke ta evaṉae na mia kana si arau kamahire?

17 Sari na tie pu paleke va sea ia sa Inavoso Leana, si okoro holani gamu rini, ba sa dia hiniva si seana. Ura sapu gua hiva nia rini si pude vagi va ilolo gamu koa rau, meke pude sa mia inokoro si kaqu soto koa rini, gua sapu soto koa gamu sa dia inokoro. 18 Ego, leana hola si pude tagoa sa inokoro nabuna gua asa, be leana sa ṉatina sa inokoro asa. Hinokara si hie doduru totoso, meke lopu tale totoso koa somana mo koa gamu si rau. 19 Kasa tuqu, gua tugo sa barikaleqe pu koa ta sigiti pa totoso vagi koburu sa, si gua tugo sapu pa totoso vina rua hie, si koa ta sigitini gamu rau si gamu, osolae kaqu koa koa gamu sa tinoa te Karisito. 20 Oqu hiva koa somana hola koa gamu si rau, pude maqu gilania gua sapu kote zama nia rau koa gamu. Ba kamahire si nunala ni gamu rau si gamu kasa sara.

Sa Vina Padapadaedi ri Hega e Sera

21 Ego, maqu nanasa paki gamu si gamu, sapu korapa hiva pude ta turaṉa koasa Tinarae te Mosese; vegua, lopu avosia tu gamu sapu gua zama nia sa Tinarae? 22 Ta kubere sapu karua sari na koburu te Ebarahami, keke si na tuna sa barikaleqe pinausu, meke keke pule si na tuna sa barikaleqe sapu lopu na pinausu.[b] 23 Sa tuna koreo sapu ta podona koasa barikaleqe pinausu, si ta podo pa siraṉa kekeṉoṉo gua mo ari doduru tie. Ba sa tuna koreo sapu ta podona koasa barikaleqe sapu lopu na pinausu, si ta podo pa vina tatara te Tamasa. 24 Ego, sari karua barikaleqe hire meke sari tudia, si na vina padapadae koari karua vinariva egoi: E Hega si pa kalina tanisa vinariva egoi te Mosese sapu ta tavete pa toqere Saenai. Na pinausu si asa, ke sari koburu podoi sa si na pinausu tugo. 25 E Hega si na vina gilagilana sa toqere Saenai pa Arebia, meke na vina padapadaena sa popoa Zerusalema sapu sari na tiena sa si koa tava pinausu, meke ta turaṉa koasa Tinarae te Mosese. 26 Sa popoa Zerusalema panaulu pa Maṉauru, si guana tinada si asa, sapu e Sera pu lopu na pinausu. 27 Ura guahe si zama nia sa Kinubekubere Hope koasa guguana sa popoa Zerusalema:

“Agoi, na barikaleqe tigemu;

mu kukili pa qinetuqetu!

Agoi pu lopu hite ta sigiti pa pinodopodo.

Ura kaqu soku sari koburu tanisa barikaleqe sapu ta luarana

hola nia sa barikaleqe pu koa turaṉa loana,” gua.[c]

28 Ego, kasa tasiqu, gamu si na tuna Tamasa saripu ta podomia pa vina tatara, kekeṉoṉo gua tugo e Aisake sapu ta podona pa vina tatara. 29 Pa totoso pukerane, si asa sapu ta podona pa hiniva tana tie, si ṉoṉovalia si asa sapu ta podona pa ṉiniraṉira tanisa Maqomaqona Tamasa; meke gua puta tugo asa si korapa ta evaṉa kamahire.[d] 30 Meke hie mo sapu zama nia sa Kinubekubere Hope: “Mu hitu pania sa barikaleqe pinausu, meke sa tuna koreo. Ura sa koburu tanisa barikaleqe pinausu, si lopu kaqu somana vagia si keketoṉa koasa tamana, ba sa tuna tu sa barikaleqe pu lopu na pinausu, si kaqu vagi betoi sari doduru tinago tanisa tamana.”[e] 31 Ke gua asa, kasa tasiqu, gita si lopu na tuna sa barikaleqe pinausu, ba na tuna tu sa barikaleqe pu lopu na pinausu.

<- QALESIA 3 QALESIA 5 ->