7
Kamo pa Zerusalema se Ezara
1 Soku vuaheni hola gua, sipu baṉara lavata se Atazekisesi pa Pesia, si koa nana si keke tie pozana Ezara. Pitu luli pulea sa sa nana tututi sapu pule la koe Eroni, sa ṉati hiama kenukenue sapu guahe: Se Ezara si na tuna e Seraea, sa tuna e Azaraea, sa tuna e Hilikaea, 2 sa tuna e Salumu, sa tuna e Zedoki, sa tuna e Ahitubi, 3 sa tuna e Amaraea, sa tuna e Azaraea, sa tuna e Meraioti, 4 sa tuna e Zerahia, sa tuna e Uzi, sa tuna e Buki, 5 sa tuna e Abisua, sa tuna e Pinehasi, sa tuna e Eleaza, sa tuna e Eroni.
6-7 Se Ezara hie si keke tie sikulu valeanana meke tumae valeania sa ginuana sa tinarae sapu vala nia e Zihova, sa Tamasa pa Izireli koe Mosese. Meke ponia sa baṉara lavata se Atazekisesi koa sa sari doduru tiṉitoṉa saripu tepai sa, sina ele vagia Ezara sa minana te Zihova sa nana Tamasa. Meke koasa vina zuapa vuahenina sa hinabotu binaṉara te Atazekisesi, si taluarae pa Babiloni se Ezara meke la pa Zerusalema. Meke luli koa sa si keke puku tie Izireli, sapu luli somania rina hiama, na tie pa butubutu te Livae, na tie kerakera pa Zelepade, meke na tie kopu pa Zelepade, meke sari na tie tavetavete. 8-9 Taluarae si arini pa Babiloni koasa rane vina keke pa sidara kekenu, meke koasa tinokae te Tamasa, si kamo pa Zerusalema si arini, koasa rane kekenu pa sidara vina lima. 10 Vala beto nia Ezara sa nana tinoa koasa vina nonogana meke na tinirona sa tinarae te Zihova, pude tavetavete nia, meke pude va tumatumae ni sari doduru tinarae meke na vina turu tanisa koari na tie Izireli.
Sa Leta sapu Vala nia Atazekisesi Koe Ezara
11 Vala nia Atazekisesi sa leta hie koe Ezara, sa hiama, meke na tie tumatumaena, sapu gilana valeani sari na vina turu saripu ele vala ni e Zihova koari na tie Izireli:
12 “Sa leta hie si mae guana koa rau, Atazekisesi sa baṉara lavata, meke atu koa goi Ezara, sa hiama, meke na tie pu va tumatumae nia sa tinarae te Tamasa pa Maṉauru.
13 Hie sa qua zinama sapu zama nia rau koari doduru tinoni Izireli, na hiama, na tinoni pa butubutu te Livae, saripu koa pa doduruna sa qua binaṉara pu hiva pule, si kaqu tava malumu pude luli koa goi meke la pa Zerusalema. 14 Ta garunu si goi koa rau meke koari ka zuapa qua tie totoli varitokae, pude doṉo viliti sari na tinoa tadi na tinoni pa Zerusalema, meke Ziuda, pude dogori sapu vegugua luli valeana gunia rini sa tinarae tanisa mua Tamasa, sapu ele ronu atu nia Sa koa goi, si be korapa tava tabe valeana koa rini. 15 Kaqu paleki goi sari na vinariponi qolo, na siliva sapu arau meke sari na qua tie totoli varitokae okoro nia pude poni nia koasa Tamasa pa Izireli, sapu koa pa Nana Zelepade pa Zerusalema. 16 Kaqu paleki tugo goi, sari na siliva meke na qolo sapu vagi varigara ni goi pa doduruna sa pinaqaha popoa pa Babiloni, meke sari na vinariponi sapu sari na tie Izireli, meke sari na hiama pu vala moka ni koasa Zelepade tanisa dia Tamasa pa Zerusalema.
17 Kaqu kopu valeana nia goi sa mua hinoluholu koasa poata, pude holui sari na bulumakao kokoreo, na sipi kokoreo, na lami, meke na vaeni, mamu va vukivukihi ni koasa hope pa Zelepade tanisa mua Tamasa pa Zerusalema. 18 Kaqu tavetavete ni goi sari na qolo na siliva koa holadi pa tinavete gua sapu okoro nia goi, meke sari na turaṉamu pa korapa hiniva tanisa mia Tamasa. 19 Kaqu vala ni goi koe Tamasa pa Zerusalema sari doduru tiṉitoṉa saripu ele ta vatu koa goi pude tavetavete ni pa korapa Zelepade, koasa hahanana vinahesi. 20 Meke kaiqa tiṉitoṉa pule pu hiva ni goi pude tana Zelepade, si boka vagi goi koasa tie kopu poata tanisa baṉara.
21 Arau Atazekisesi sa baṉara, si garunu atu nia sa zinama hie koari doduru palabatu kopu poata, saripu koa koari doduru Pinaqaha Popoa pa Kali Lodu Rimata pa Iuparetisi. Mamu tuturei vala ni koe Ezara sari na tiṉitoṉa sapu gua tepai sa. Sa tie hie, si na hiama, meke na tie sapu variva tumatumae nia sa tinarae te Tamasa pa Maṉauru. 22 Kaqu ponia gamu podalae ka ṉeta tina made gogoto kilo siliva ka manege puta tina kilo huiti, karua tina lita vaeni, karua tina lita oela olive, meke soloti sokudi gua sapu ta hivae. 23 Kaqu kopu valeana si gamu, pude va hia i sari doduru tiṉitoṉa sapu hiva ni sa Tamasa pa Maṉauru pude tana Zelepade. Ke mamu kopu sisigiti nia, pude lopu kaqu bugoro nau Sa si arau, babe arini pu kaqu baṉara luli mae pa mudiqu rau. 24 Lopu tava malumu hokara si gamu, pude vagia si keke vasi takisi koari na hiama, meke koari na tie Livaeti, na tie kerakera, na tie kopu pa Zelepade, na tie tavetavete pa Zelepade, babe keke tie sapu ari nana ginugua pu soto la gua koasa Zelepade hie.
25 Agoi Ezara, si mamu tavetavete nia sa tinumatumae sapu ponigo sa mua Tamasa, pude vizati sari na palabatu va ene tinavete, na tie varipitui, pude totoli ni sari doduru tie pa tinoṉoto, saripu koa pa kali lodu rimata pa Iuparetisi saripu toa koasa Tinarae tanisa mua Tamasa. Kaqu va tumatumae nia goi sa Tinarae te Tamasa isa koari na tie, pu lopu ele tumae nia sa Tinarae. 26 Be sekea keke tie sa Tinarae tanisa mua Tamasa babe sa tinarae tanisa binaṉara taqarau, si kaqu tuturei tava kilasa si asa pa minate, babe ta raovo la pa votiki popoa, babe ta zau vagi sari nana tinagotago, babe ta veko pa vetu varipusi si asa,” gua sa leta.
Vahesia Ezara sa Tamasa
27 Zama se Ezara, “Mani tavahesi se Zihova, sa Tamasa tadi na tiatamada! Ele ponia se Zihova sa inokoro koasa baṉara lavata, pude va lavatia se Zihova koasa Zelepade pa Zerusalema. 28 Koasa minana te Tamasa, si ele tataru nau sa baṉara lavata si arau, meke sari na nana tie totoli varitokae, meke sari doduru nana palabatu arilaedi. Se Zihova sa qua Tamasa si ele poni nau sa minataqara, meke boka zama ososo ni rau sari na palabatu koari hopeke butubutu pa Izireli, pude somana luli pule koa rau,” gua.
<- Ezara 6Ezara 8 ->