1 Kamo mae koa rau sa zinama te Zihova: 2 “Tuna na tie, korokorotae la i sari na sepati pa Izireli; korokorotae mamu zama la guahe koa rini: ‘Hiera gua si zama nia e Zihova sa Baṉara: Madi talotaṉa sari sepati pa Izireli pu kopu puleni teledia! Vea, lopu sa rovana sipi tu si kote kopuni ari na sepati? 3 Gamu si napo meleke, pokoni gamu sari poko vulu, meke va mate mia sari sipi ta vizatadi, ba sa rovana sipi si lopu kopuni gamu. 4 Lopu va ṉiṉira i gamu saripu malohoro babe salaṉi saripu moho babe hadei saripu bakora. Kopuni gamu meke poni tinavete mamatadi meke vari sigiti. Lopu la vagi puleni gamu saripu kekere sea babe hatai saripu muliuṉu. 5 Ke ta hurakatae si arini sina loke dia sepati, meke totoso ta hurakatae rini si ta evaṉae na ginani tadi doduru kurukuru pinomo si arini.*Nab 27:17; 1 Baṉ 22:17; Mt 9:36; Mk 6:34 6 Ke enea ri na Qua sipi sari na toa meke doduru toqere ululudi. Ta hurakatae la si arini pa doduruna sa popoa pepeso, meke loke tie hata vagi pule ni.

7 Gua ke, gamu na sepati, mi avosia sa zinama te Zihova: 8 Hinokara gua sapu toaqu si Arau, zama vura gua si Arau Zihova sa Baṉara, sina sa Qua rovana sipi si loke sepatina gua ke ta vagi taloa meke ta evaṉae na ginani tadi na kurukuru pinomo, meke sina lopu hata vagi pule ni ri na sepati sa Qua rovana sipi ba kopu puleni si arini meke lopu sa Qua rovana sipi, 9 gua ke, gamu na sepati, mi avosia sa zinama te Zihova. 10 Hiera gua si zama nia Arau Zihova sa Baṉara: Arau kana i sari na sepati meke kote pitu i Rau si arini koari na dia tinavete pa laedi ri na Qua sipi. Kote va rizu pani Arau si arini pude lopu kaqu kopu nia rini sa Qua rovana sipi, pude lopu kote boka vagi pule ginani ri na sepati koa rini. Kote harupia Rau sa Qua rovana sipi pa ṉuzu dia.

11 Ura hiera gua si zama nia Arau Zihova sa Baṉara: Arau telequ kote hatai sari Qua sipi meke kote kopuni. 12 Gua sa sepati sapu kopuni sari nana sipi ta hurakataedi meke koa turaṉi sa, si kote kopu gunini Arau asa sari Qua sipi. Kote harupu vagi Rau koari doduru vasina sapu ta hurakatae la si arini koasa rane sapu hupohuporona meke opoadumu ia na lei. 13 Kote turaṉa vurani Rau koari na butubutu meke varigarani koari na pinaqaha popoa, meke kote turaṉa lani Rau koasa dia popoa soti. Kote poni duduli Rau koari na toqere pa Izireli, pa tabahoara, meke koari doduru vasina sapu veko kinoa sari tie koasa popoa. 14 Kote kopuni Rau koari na duduli leanadi, sari na toqere ululudi pa Izireli si kote na dia vasina henahenana. Vasina si kote eko si arini koari na duduli leanadi, koari na toqere pa Izireli si kote henai rini sari duduli toa va leanadi. 15 Arau telequ kote kopu ni sari Qua sipi meke va eko magogosi, zama vura gua si Arau Zihova sa Baṉara. 16 Kote hata vagi Rau sapu muliuṉudi meke turaṉa puleni sapu ene va seu. Kote hade i Rau sapu bakora meke va ṉiṉira i sapu malohoro, ba sapu noboko meke ṉiṉira si kote va mate pani Arau. Pa ṉinoṉo kote kopu ni Arau sari Qua rovana sipi.

17 Sapu koa gamu Qua rovana sipi, si hiera gua si zama nia Arau Zihova sa Baṉara: Kote pitui Rau sari hopeke sipi, keke sipi la koasa keke, meke vari paqaha ni sari sipi koari na qoti. 18 Kaiqa gamu si deṉa nia sa hena duduli leanadi meke sapu lopu henai gamu si neti va kaleana pani tu gamu pa nene mia. Napoi gamu sari kolo viadi, ba neti va mulaki sapu koa holadi. 19 Lopu leana sisigiti pude henai ri na Qua rovana sipi sapu neti gamu meke napoi sapu va mulaki gamu pa nene mia.

20 Gua ke hiera gua si zama la nia Arau Zihova sa Baṉara koa rini: Doṉo mae, Arau telequ kote vari pitui ni sari sipi nobokodi meke sipi viviqedi. 21 Sina hodui gamu meke tupele ni avara mia, dutani kikiho mia sari na sipi malohorodi osolae hadu pani tu gamu si arini. 22 Arau kote harupia sa Qua rovana sipi, meke lopu kote ta saputu vagi pule si arini. Vinari pituidi ri keke sipi la pa keke si Arau kote tavetia. 23 Kote vekoa Rau si keke sepati, sa Qua nabulu Devita, pude kopuni, meke asa kote kopuni meke kote asa sa dia Sepati.*Rev 7:17 24 Arau Zihova si kote na dia Tamasa, meke se Devita si kote na koburu tavia pa korapa dia. Arau Zihova si ele zama.*Izk 37:24

25 Kote tavetia Rau si keke vinariva egoi pa binule koa rini meke va rizu pani sari na kurukuru pinomo, pude boka koa va bulebulei dia si arini pa soloso qega meke puta muliuṉu pa hiqohiqo. 26 Kote mana ni Rau si arini meke sari vasidi pa vari likohaena sa Qua toqere. Na ruku si kote garunu gore nia Rau pa dia totoso; na ruku sapu koa ia minana si asa. 27 Sari inuma vua huda si kote ari vuadi, meke sari linetelete pa pepeso si kote komiha vuadi; sari tie si kote nabu sa dia kinoa pa dia popoa soti. Pana mokui Rau sari hudadi ri dia ioki meke harupi koari na lima pu va pinausu i, si kote tumae nia rini sapu Arau tugo se Zihova. 28 Lopu kote ta saputu vagi pule si arini koari na butubutu, babe ta hena koari na kurukuru pinomo. Kote koa va bulei si arini meke loke tie kote va mataguti. 29 Kote poni ni Rau sa dia popoa sapu koa ia linetelete sapu ta avosaedi meke leleadi; lopu kote mate pule si arini pa soṉe koasa popoa, babe tava sisire pule koari na butubutu. 30 Pude madi tumae nia sapu Arau, se Zihova sa dia Tamasa, si korapa koa turaṉi si arini meke sapu arini sa butubutu Izireli, si na Qua tinoni, zama vura gua si Arau Zihova sa Baṉara. 31 Gamu, sa Qua rovana sipi, sa rovana sipi pa Qua inuma duduli, si na Qua tinoni, meke Arau tugo sa mia Tamasa, zama vura gua si Arau Zihova sa Baṉara.’ ”

<- Izikeli 33Izikeli 35 ->