1 Ego, kaqu tavete poni nau ri na tinoni si keke Ipi Hopena. Ka manege puta kukuru poko lineni arilaedi, sapu ta tigisi vulu bulu, pepolo, meke ziṉara si kaqu tavete nia rini sa ipi, mamu tigisi ni mateana serubimi sari na poko. 2 Sari na gineledi ri na hopeke kukuru poko si ka manege rua mita geledi, meke karua mita labedi.*Ka manege ṉeta iadi geledi meke karua iadi labedi (keke ṉava). 3 Piti varihodaeni sari ka lima poko, meke gua tugo sari ka lima pule. 4 Mamu piti va sotoni kukuru poko bulu bobolokuhae sapu koai lopa pa huhukiridi sari na poko goba, pude boka sopele la nia sa labete sisigotoana. 5 Mamu piti va sotoi sari ka lima ṉavulu puta poko bulu bobolokuhae sapu koai lopa koari hopeke karua poko goba. 6 Beto mamu taveti ka lima ṉavulu puta qaqahere pude guana lozo, meke doṉo guana keke mo sari karua goba.

7 Beto mamu vagi ka manege eke kukuru poko kalu qoti, mamu tavetia keke ipi poko. 8 Sari padadi ri doduru si ka manege ṉeta mita geledi meke karua mita labedi.*15 iadi geledi meke 2 iadi labedi. 9 Mamu piti varihodaeni sari ka lima, meke gua tugo sari ka onomo pule; mamu tomo rua ia, sapu vina onomo kukuruna panaulu, pude nobia kenuna sa Ipi Hopena. 10 Beto mamu va soto i pule sari ka lima ṉavulu puta kukuru poko bulu bobolokuhae sapu koai lopa, pa hukihukiridi sari karua poko hire. 11 Beto mamu taveti pule ka lima ṉavulu puta qaqahere boronizi, mamu va sopele lani koari na kukuru poko bulu bobolokuhae sapu koai lopa, pude ta varihodae sari karua kukurudi, meke doṉo guana keke nobinobiana mo. 12 Totosona va turua gamu sa Ipi Hopena si va sigoto gorea sa kukuruna sa poko tomo rua meke nobia mudina sa Ipi Hopena. 13 Kaiqa lima ṉavulu sentimita pule*Kukuru iadi pule. saripu sigoto gore pa hopeke vari kalina hola nia sa poko lineni arilaena, si pude va paeria sa ipi.

14 Mamu taveti pule karua nobinobiana tanisa Ipi Hopena. Keke si na kapu sipi kokoreo, sapu tava ziṉarana, meke keke pule si na kapu rumu, pude tana sada.

15 Mamu va turu varibarani kaiqa huda barabara akesia pude tanisa Ipi Hopena. 16 Kaqu ka made mita geledi*Manege lima piti geledi sari hopeke huda barabara, meke sa huda varihodae pilivarata si ka 27 inisi labedi. meke onomo ṉavulu onomo sentimita labedi. 17 Hopeke karua barabara hire si kaqu turu koasa vovoina siliva. 18 Mamu taveti ka hiokona puta hopeke karua huda barabara tana kali mataona*Kali saoti.. 19 Meke ka made ṉavulu puta vovoina siliva vasina tava turu sari na barabara; hopeke karua vovoina pa keke huda barabara, pude tuqe va nabui sari karua. 20 Mamu taveti pule ka hiokona puta hopeke karua huda barabara pude tana kali gede*Kali gede be tia la pa kali lodu rimata. sa Ipi Hopena, 21 meke ka made ṉavulu vovoina siliva, hopeke karua vovoina pa hubina keke barabara huda. 22 Meke pa mudina sa ipi pa kali lodu rimata, si mamu taveti ka onomo hopeke karua huda barabara; 23 mamu taveti pule karua hopeke barabara huda, koari na iio pa mumudi. 24 Sari karua barabara huda koari hopeke iiona sa Ipi Hopena, si kaqu ta varihodae varigara meke ta tuqe varigarae koa ke riṉi boronizi, panapeka meke kamo panaulu. 25 Gua asa, ke kaqu ka vesu sari doduru hopeke karua barabara huda pa mudina sa Ipi Hopena, meke kaqu ka manege onomo sari doduru voivoina siliva, karua vovoina pa kaurudi ri hopeke karua barabara huda.

26 Ego, mamu taveti sari na huda akesia, pude tana gaso pilipilivarata, pude va ṉiṉirai sari na huda tuturu koari na barabara tana Ipi Hopena. Ka lima gaso si pude tuqe varigarani sari na barabara pa keke kalina. 27 Meke ka lima pule si pude tuqe varigarani sari na barabara pa keke kalina. Meke ka lima pule pilipilivarata, pude tuqe varigarani sari na barabara pa mudina sa Ipi Hopena. 28 Sa huda gaso pa kokorapadi rina barabara, si kaqu kamo la gua koari karua vina betobeto barabara. 29 Vekoni riṉi qolo sari na barabara huda, mamu va lopoto la i sari na gaso koari na riṉi, mamu pokoni qolo sari na barabara, meke sari na huda gaso.

30 Mamu podalae tavetia meke kuri va hokotia sa Ipi Hopena koasa kineha, sapu va dogoro nigo Rau pa batu toqere Saenai. 31 Mamu tavete nia poko lineni arilaena si keke goba poko, mamu piti nia lozi bulu, pepolo meke ziṉara. Beto mamu piti la nia kineha mateana serubimi si asa. 32 Beto mamu va sigotia sa poko goba koari na qaqahereana qolo saripu sotodi koari ka made dedegere huda akesia saripu turudi koari ka made vovoina meke ta pokoe qolo. 33 Va sigotia sa poko goba pa kaurudi ri na qaqahereana qolo; mamu vekoa sa bokese tanisa vinariva egoi, sapu koa ia ri karua patu labelabe pa mudina sa poko goba pa lose hopena pa hopena. Sa poko goba hie si kaqu varipaqaha nia sa lose hopena koasa hopena pa hopena.*Hib 6:19, 9:3-5 34 Mamu tukua sa Bokese Vinariva Egoi koasa tukutukuna, vasina pu koa ia tinaleosae na vinulasadi sari na sinea. 35 Mamu vekoa sa tevolo pa sadana sa poko goba pa kali gede*Kali gede be tia la pa kali lodu rimata. koasa Ipi Hopena, meke sa tuturuana zuke pa kali matao.

36 Ego, koasa nuqunuquruana tanisa Ipi Hopena, si kaqu va sigoto nia poko goba ta tavetena pa poko lineni arilaena, sapu ta pitie lozi bulu, pepolo, meke ziṉara; meke kaqu piti nia vinasari tugo gamu si asa. 37 Meke kaqu taveti gamu sari ka lima dedegere huda akesia sapu ta pokoe qolo, pude tanisa poko goba asa, mamu va sotoi pa qaqahere si arini; mamu taveti tugo ka lima vovoina boronizi, pude tadi na dedegere arini.

<- Ekisidasi 25Ekisidasi 27 ->