1 Beto asa si topue ene la koari na pezara pa Moabi, meke tiqe ene sage la pa batuna sa toqere Pisiqa pa kalina sa popoa Zeriko se Mosese; meke vasina si va dogoro nia e Zihova koasa sa doduruna sa popoa pa kali pinaqaha popoa pa Qileadi meke kamo la gua pa Dani; 2 meke koasa kali pinaqaha popoa lavata te Napitalai, meke sari na pinaqaha popoa tadi Iparemi meke se Manase, e Ziuda, meke kamo la gua koasa lamana lavata pa Meditareniani sapu koa pa kali lodu rimata. 3 Meke doṉo kamo la gua koasa popoa Neqevi, meke koasa doduruna sa pezara lavata sapu topue gua koasa lolomo pa Zeriko, sa vasileana lavata sapu koa ia na hudahuda pamu, meke kamo la gua pa Zoara. 4 Beto asa si zama koasa se Zihova, “Asa tugo sa popoa sapu ele va tatara nia Rau koasa Qua zinama tokotokoro koe Ebarahami, Aisake, meke Zekopi, sipu zama guahe si Arau, ‘Asa sa popoa sapu kaqu poni nia Rau koari na tudia ri na tumu.’ Ele va dogoro nigo Rau kamahire pa matamu soti, ba lopu kaqu kamo la ia goi si asa,” gua si Asa.[a]

5 Meke mate tugo vasina pa popoa Moabi se Mosese sa nabulu te Zihova, gua puta tugo sapu ele zama nia e Zihova koasa. 6 Meke ta pomunae tugo si asa koasa lolomo pa popoa Moabi varitotosi pa Betipeoro; ba loke tie gilana sotia sa vasina ta pomunae sa, kamoa ṉinoroi. 7 Keke gogoto hiokona puta vuahenina se Mosese meke tiqe mate si asa. Ba sari na matana si namu lopu hite ele rida, meke lopu hite malohoro tugo sa tinina. 8 Meke kaboa ri na tinoni Izireli se Mosese pa pezara Moabi koari ka toloṉavulu puta rane, osolae va hokoti rini sari na rane pu besu nia rini si asa.

9 Meke ta siṉie nia e Zosua, sa tuna e Nani, sa maqomaqo ginilae, sina ele va opo nia e Mosese koasa sa limana. Ke va avosia na va tabea ri na tinoni Izireli si asa, meke tavetia rini gua sapu zama nia e Zihova koe Mosese.

10 Seunae gua pa totoso asa, si namu lopu hite keke poropita pa popoa Izireli si turu vura mae, sapu kekeṉoṉo gua Mosese, sapu boka vivinei va tia ia se Zihova.[b] 11 Meke taveti Sa sari doduru vina gilagila na vinariva magasadi saripu garunu nia e Zihova koasa pude va gorevura i pa popoa Izipi, koe Pero, sa baṉara, meke koari doduru nana ṉiha na varane koasa nana popoa lavata sana. 12 Namu loke poropita pule sapu kekeṉoṉo asa, sapu boka taveti sari na tinavete nomadi na variva holoqorudi, saripu evaṉi Mosese pa matadia ri doduru tinoni Izireli.

<- Diutironomi 33