1 Loke tie ta puzalana babe ta magu palae totona si kaqu koa somanae koari na tinoni te Zihova. 2 Loke tie sapu podo hoboro pa siraṉa[a] babe podo gore mae koasa tie gua asa si kaqu koa somanae koari na tinoni te Zihova, be kamoa ka manege puta sinage, ba lopu kaqu somanae tugo koari na tinoni te Zihova. 3 Loke tie Amoni babe Moabi babe kaiqa pule tutidia, be kamoa ka manege puta sinage, ba lopu kaqu somanae koari na tinoni te Zihova.[b] 4 Ura lopu galagalani gamu rini pude poni gamu ginani na kolo, koasa mia inene sipu taluarae si gamu pa popoa Izipi; meke tabaria tu rini se Belami sa tuna koreo e Beoro, koasa vasileana lavata pa Petoro pa popoa Mesopotemia pude leveni gamu.[c] 5 Ba korona avosia e Zihova sa mia Tamasa se Belami, ba iliri nia tinamanae tu Sa sa tinalevei, ura tataru va sisigitini gamu Sa. 6 Namu lopu kaqu toka ni gamu sari na butubutu hire pude koa valeana babe vata evaṉae ni na mia baere si arini ninae rane ka rane. 7 Lopu kaqu etuli na va kari gamu sari na tinoni Edomu. Na turaṉamia mo si arini, meke gua tugo sari na tinoni pa popoa Izipi. Ura koa gua mo na tie karokarovo mia pa dia popoa si gamu. 8 Sari na dia pinodopodo podalae koasa vina ṉeta sinage meke hola la, si boka koa somanae koari na tinoni te Zihova.

9 Pana koa varigara pa keke vasina si gamu pa totoso varipera si lopu kaqu va malumia gamu keketoṉa pude va boni puleni gamu pa dinoṉo te Zihova. 10 Be va kolo hola sa tie pa nana pinutagita pana boṉi, meke boni si asa, si kaqu vura taloa si asa pa sadana sa vasina koa varigara gamu meke kaqu koa paki vasina. 11 Pana veluvelu si kaqu huve va via si asa, meke pa totoso lodu rimata si kaqu pule mae vasina koa varigara gamu si asa.

12 Kaqu koa nana si keke vasina, pa sadana sa vasina sapu koa varigara gamu, vasina si boka la turu vale si gamu. 13 Kaqu palekia goi si keke huda tava nagona, meke pana hiva turu vale goi si mamu gelia si keke pou, beto asa si mamu tamunia. 14 Mamu kopu nia pude via sa vasina koa varigara gamu, ura na madina si asa. Se Zihova sa mia Tamasa si korapa koa somanae koa gamu koasa vasina asa, meke korapa kopuni gamu Sa. Kaqu va kilasi Sa sari na mia kana meke poni gamu sa minataqara. Lopu va boni puleni gamu koa keke hahanana kaleana, pude gua asa si kote hiva luara pani gamu Zihova si gamu.

15 Be govete atu koa gamu si keke pinausu tanisa nana palabatu pude ta kopue nana gua, si mi lopu garunu pule nia. 16 Kaqu koa si asa koa keke rina mia vasileana sapu vizatia sa. Lopu kaqu ṉoṉovalia gamu si asa.

17 Loke tie, barikaleqe, babe vineki Izireli si tava malumu pude holuholuni tinidia pude vagi poata koasa inokoro sea pa zelepade tadi na tamasa huporo.[d] 18 Meke loke poata sapu ta vagi koasa siraṉa gua asa, si kaqu ta paleke la pa korapa Zelepade te Zihova sa mia Tamasa, pude va gorevura ia si keke vina tatara nabuna. Hakohako ni e Zihova sa mia Tamasa sari na hahanana vagi poata koasa tinavete inokoro sea pa vinahesi beku.

19 Pana ponia poata babe ginani babe kaiqa toṉa goi si keke tie Izireli turaṉamu, si lopu tepa tomo nia goi gua sapu ele ta poni nia sa koa goi.[e] 20 Koasa tie karovona tu si kote boka tepa nia goi pude tomoa gua sapu poni nia goi koasa, ba lopu koasa tie Izireli sapu ponia goi. Kaqu lulia gamu sa tinarae hie, meke kaqu koa tamanae si gamu koe Zihova sa mia Tamasa koari doduru mia tinavete koa sa popoa sapu kaqu la koa ia gamu.

21 Pana va tatara si gamu koe Zihova sa mia Tamasa, si mamu tavete gua sapu ele va tatara ni gamu; meke kaqu kopuni gamu Sa koari na mia vina tatara. Be lopu taveti gamu, si na mia sinea si asa.[f] 22 Be lopu va tatara si gamu koe Zihova si lopu kaqu evaṉia gamu sa sinea. 23 Ba be va tatara si goi pa mua hiniva soti, si mu va balau; mamu tavetia si asa.

24 Pana enea goi sa siraṉa sapu la gua pa korapa inuma vaeni tadi na turaṉamia, si boka vagi meke henai gua sapu bokaia goi, ba lopu kaqu voi i goi si kaiqa pa mua vovoina meke paleke taloani. 25 Pana enea goi si keke siraṉa sapu la gua pa korapa inuma huiti tadi kaiqa tie, si boka rarusu vagi goi si kaiqa vua huiti pa limamu; mamu henai gua sapu bokaia goi, ba lopu kaqu kotoa goi pa kotokotoana sa nana inuma huiti.

<- Diutironomi 22Diutironomi 24 ->