Daniela 3

1 Tavetia e Nebukaneza sa baṉara si keke beku qolo sapu ka hiokona zuapa mita ululuna meke tata ṉeta mita labena,[a] meke va turu ia sa koasa pezara pa Dura koasa pinaqaha popoa pa Babiloni. 2 Meke tioko vagi sa sari na koburu tavia, palabatu tinavete, qavuna, tie roverove, palabatu poata, tie varipitui, tie totoli meke sari doduru palabatu tuturaṉa koari na hopeke pinaqaha popoa pule, pude mae koasa vina madina sa beku sapu va turu ia sa. 3 Ke varigara beto sari na koburu tavia, palabatu tinavete, qavuna, tie roverove, palabatu poata, tie varipitui, tie totoli meke sari doduru palabatu tuturaṉa koari na hopeke pinaqaha popoa, pude va madi ia sa beku sapu va turu ia e baṉara Nebukaneza. Meke la turu si arini pa kenuna sa beku. 4 Meke velavela vura sa palabatu tinavete, “Gamu na tiedi ri doduru butubutu meke tiedi ri doduru vinekala, hiera gua si ta garunu nia gamu pude tavetia: 5 Pana avosi tugo gamu sari kabodi ri na buki, ivivu, mike, lohe, meke doduru kineha miuziki, si kaqu hoqa todoṉo si gamu meke vahesia sa beku qolo sapu va turu ia e baṉara Nebukaneza. 6 Asa sapu lopu hoqa todoṉo meke vahesi, pa totoso tugo asa, kaqu ta gona la pa nika huruṉuna.” 7 Gua ke, totoso avosi tugo rini sari kabodi ri na buki, ivivu, mike, lohe, meke doduru kineha miuziki, si hoqa todoṉo sari doduru tinoni, butubutu meke tiedi ri doduru vinekala, meke vahesia rini sa beku qolo sapu va turu ia e Nebukaneza sa baṉara.

Seke Tinarae sari ka Ṉeta Baere te Daniela

8 Pa totoso asa si mae sari kaiqa tie soti pa Babiloni meke zutui sari tie Ziu. 9 La zama si arini koe Nebukaneza sa baṉara, “Kei baṉara, mu toa hola ninae rane! 10 Baṉara, ele va turu ia goi sa tinarae, sapu sari doduru pu avosi sari kabodi ri na buki, ivivu, mike, lohe, meke doduru kineha miuziki, si kaqu hoqa todoṉo meke vahesia sa beku qolo, 11 meke asa pu lopu hoqa todoṉo meke vahesia si kaqu ta gona la pa korapa nika huruṉuna. 12 Ba koa dia sari kaiqa tie Ziu sapu ele va palabatu tinavete i goi koa sa pinaqaha popoa pa Babiloni, sari Sedareki, Misake, meke Abedeniko, arini sapu lopu hiva va avoso atu koa goi. Kei baṉara, lopu hiva va nabulu atu si arini koari na tamasa tamugoi meke lopu hiva vahesia rini sa beku qolo sapu va turu ia goi.”

13 Ta ṉaziri hola se Nebukaneza meke va garunu la tie si asa pude va mae i sari Sedareki, Misake, meke Abedeniko. Ke ta turaṉa mae si arini pa kenuna sa baṉara, 14 meke zama la i Nebukaneza si arini, “Vea, hinokara sia, ta Sedareki, Misake, meke Abedeniko, sapu gamu si koromia va nabulu la koari na qua tamasa meke lopu hiva vahesia gamu sa beku qolo sapu va turu ia rau? 15 Ego, pana avosi gamu sari mamalaiṉidi sari na buki, ivivu, mike, lohe, meke sari doduru kineha miuziki, be va nama pude hoqa todoṉo si gamu pude vahesia sa beku qolo sapu tavetia rau, si kote leana hola mo. Ba be pana lopu vahesia gamu si kote hinoqa ta gona nuquru la si gamu pa korapa nika huruṉuna. Pana gua si, na tamasa savana kote boka harupu gamu koasa limaqu?”

16 Olaṉa la sari Sedareki, Misake, meke Abedeniko koasa baṉara, “Kei baṉara Nebukaneza, lopu kote va lavelave puleni gami si gami pa kenumu koasa ginugua hie. 17 Kei baṉara, be ta oki nuquru la si gami koasa nika halalana, si sa Tamasa sapu nabulu nia gami si boka harupu gami koasa nika, meke kote harupu gami Sa pa limamu goi. 18 Ba be guana lopu harupu gami Sa, ba hiva nia gami pude tumae nia goi, baṉara, sapu lopu kaqu va nabulu la tugo si gami koari mua tamasa babe vahesia sa beku qolo sapu va turu ia goi.”

Hiva Va Matei Rini sari ka Ṉeta Baere te Daniela

19 Ta dogoro pa isumatana sapu ta ṉaziri hola ni e Nebukaneza sari Sedareki, Misake, meke Abedeniko. Ke garuni sa pude va ṉiṉira ia sa nika ka zuapa totoso pule, hola nia sapu hoke gugua, 20 meke tozi ni sa sari kaiqa tie ṉiṉiradi koasa nana qeto minate pude pusi sari Sedareki, Misake, meke Abedeniko meke gona nuquru lani koasa nika halalana. 21 Ke sari ka ṉeta tie hire pu pokoni sari na dia poko gele, pokonene, pusi batu, meke kaiqa poko pule, si ta pusi meke ta gona nuquru la pa korapa nika halalana. 22 Sina sa ginarunu tanisa baṉara si ṉiṉira hola meke sa nika si maṉini hola ke la sa huruṉuna sa nika meke va matei sari varane totoso la gonani rini sari Sedareki, Misake, meke Abedeniko pa nika, 23 meke hoqa nuquru la sari ka ṉeta tie hire, sapu ta pusidi va leana, pa korapa nika huruṉuna.

24 Meke hodahodaka se Nebukaneza meke gasa turu meke nanasi sa sari nana tie totoli, “Vea, lopu ka ṉeta tie tu si pusi gita meke gona nuquru ni pa nika?”

Meke olaṉa si arini, “Uve, gua tugo, baṉara.”

25 Zama si asa, “Doṉo la! Ka made tie tu si dogori rau ene lamae dia pa korapa nika, lopu ta pusidi meke lopu ta sigiti dia, meke sa vina made si guana tudia rina tamasa,” gua si asa.

Sari Ka Ṉeta Tie si Ta Rupaha meke Tava Ululu Sage pa Dia Tinavete

26 Ke ene tata la se Nebukaneza pa sadana sa nika meke kukili la, “Sedareki, Misake, meke Abedeniko, gamu na nabulu tanisa Tamasa Ululuna Hola, vura mae! Mae tani!”

Ke vura koasa nika sari Sedareki, Misake, meke Abedeniko, 27 meke la sari koburu tavia, palabatu tinavete, qavuna, tie roverove, palabatu poata, tie varipitui, tie totoli, meke vari likohae ni rini sari ka ṉeta. Dogori rini sapu lopu tiqui sa nika sari tinidia, meke sari kaludia ba lopu uqu; sari dia poko ba lopu ṉadai, meke lopu hite humaṉa maratuṉaha si arini.

28 Zama sa baṉara, “Mani tavahesi sa Tamasa tadi Sedareki, Misake, meke Abedeniko, sapu garunu mae nia sa Nana mateana pude harupi sari Nana nabulu! Raṉea rini si Asa meke va karia rini sa vina turu tanisa baṉara. Malumu si arini pude mate, pude lopu va nabulu la babe vahesi sari kaiqa tamasa pule; ba dia Tamasa eke mo si kaqu vahesia rini.

29 Gua ke va turu ia rau kamahire sapu be esei sari tie, nasa sa dia butubutu na vinekala, sapu zama ṉoṉovalia sa Tamasa tadi Sedareki, Misake, meke Abedeniko, si kaqu ta magu va umumu, meke sari dia vetu si kote ta evaṉae na kobi remoremo; ura na loke tamasa pule si kote boka variharupi gugua hie.”

30 Meke va rizu sage lani sa baṉara Nebukaneza sari Sedareki, Misake, meke Abedeniko pa tuturuana ululudi, koasa pinaqaha popoa pa Babiloni.

<- Daniela 2 Daniela 4 ->