2 Samuela 23

Sari na Zinama Vina Betobeto te Devita

1 Devita sa tuna Zese si na tie sapu va arilaena ia Tamasa, sapu ele ta vizatana koasa Tamasa Ululuna Hola te Zekopi pude na baṉara, meke asa sapu tavetedi sari na kinera arileadi tadi pa Izireli. Hire sari na zinama vina betobeto te Devita:

2 Sa Maqomaqona e Zihova si zama koa rau;

sa nana inavoso si koa mo pa beruqu rau.

3 Ele zama sa Tamasa pa Izireli;

sa tie kopu pa Izireli si ele zama koa rau:

“Sa baṉara sapu koa totoli pa tinoṉoto

sapu koa baṉara pa vinatabena sa Tamasa,

4 si kekeṉoṉo gua tugo sa rimata

sapu ṉedala vura mae koa sa vaqavaqasa bulebulena;

sa rimata sapu lovuru sagea duduli pa pepeso.”

5 Meke gua asa sapu kaqu mana guni sa Tamasa sari na tutiqu,

sina ele tavetia Sa si keke vinariva egoi koa holana koa rau,

na vinariva egoi sapu lopu kaqu boka ta kumata,

na vina tatara sapu lopu kaqu ta hobe.

Asa mo sa doduruna sapu okoro nia rau;

sa qua vinarane,

sapu kaqu va maea Tamasa.

6 Ba sari na tie huporo si kekeṉoṉo gua tugo sari na huda rakihi saripu ta oki palae;

loke tie si boka taṉini si arini pa limadi soti.

7 Kaqu tavetavete nia Goi si keke aeana babe na hopere;

kaqu ta sulu palae beto si arini.

Sari na Tie Varane te Devita

(1 Koronikolo 11:10-41)

8 Hire pozadi sari na tie varipera bokabokadi te Devita: vina keke si e Zosepa Basebeti pa Takemoni, sapu sa koimata koari “Ka Ṉeta”. Hiru nia sa sa nana hopere pa vinaripera koari ka vesu gogoto meke va mate betoi sa si arini. 9 Sa vina rua koari ka ṉeta tie bokabokadi si e Eleaza tuna koreo e Dodo, pa butubutu te Aho. Keke rane si tepatepai ri kara Devita sari na tie Pilisitia sapu mae varipera. Togolo pule sari na tie Izireli, 10 ba turu va nabu si asa meke razai sa sari na tinoni Pilisitia, osolae gogomo sa limana meke lopu boka taluarae sa magu varipera. Sa minataqara lavata si ponini e Zihova koasa rane asa. Mudina sapu hola sapu gua asa si pule la vasina koa se Eleaza sari na tinoni Izireli meke la va gore vagi rini sari na poko varipera koarini pu matedi.

11 Sa vina ṉeta koari ke ṉeta tie bokabokadi si e Sama tuna koreo e Agi, pa Hara. Varigara pa Lehi sari na tinoni Pilisitia, vasina koa sa inuma lenitili. Goveteni rina tinoni Izireli sari na tie Pilisitia, 12 ba turu va nabu se Sama koasa inuma, toketoke nia sa, meke va matei sa sari na tie Pilisitia. Sa minataqara lavata si poni nia Zihova koasa pa rane asa.

13 Tata koasa totoso tana pakepakete, ka ṉeta ṉati palabatu koari ka toloṉavulu puta tie varipera si gore la koasa bae pa Adulamu, vasina koa se Devita, sipu korapa koa pa lolomo Repaemi sari na tie Pilisitia. 14 Koasa totoso asa si koa ia Devita sa toqere ta barana, meke koa ia ri puku tie Pilisitia si pa Betilihema. 15 Balabala pule se Devita meke zama, “Kei be keke tie mo la utuvu poniau kolo napo koasa berukehe pa kali sasada pa Betilihema.” 16 Varipera nuquru la sari ka ṉeta tie varane koari na tinoni Pilisitia, meke la utuvu vagi kolo napo koasa berukehe, meke paleke pule la vala nia rini koe Devita. Ba korona napo ia sa; meke zoropo nia sa pude guana vinariponi la koe Zihova. 17 Meke zama si asa, “Zihova lopu boka napoa rau si hie! Kote guana napoi mo rau eharadi sari na tie pu tasuna pa dia tinoa!” Ke korona napoa sa. Arini sari na tinavete mataqaradi saripu taveti ri ka ṉeta tie varane.

18 Abisai sa tasina e Zoabi (sa tinadia si e Zeruia) sina koimata koari ka Toloṉavulu Puta Tie Varane. Nana hopere si varipera nia sa meke va mate betoi sa sari ka ṉeta gogoto tie, meke tava ululu pozana koari ka toloṉavulu puta tie varane sara. 19 Bokaboka holani sa sari ka Toloṉavulu Puta meke ta evaṉae na dia koimata, ba lopu bokaboka holani tugo sa sari ka ṉeta.

20 Benaea tuna koreo e Zehoiada pa Kabuzili, si keke tie bokabokana pa vinaripera. Soku tinavete mataqaradi si taveti sa, kekeṉoṉo gua koasa vina matedi ri karua tie varane pa Moabi. Keke totoso si nuquru gore la ia sa pa pou sapu koa ia laione koasa rane sipu sinou sa popoa meke va matea sa. 21 Keke tie Izipi tugo si va matea sa, na tie nomana hola si asa sapu tuqea nana hopere. Na kukuru huda moatana la seke nia sa, meke saputu vagia sa pa limana sa nana hopere, meke huma va matea nia sa koasa. 22 Arini sari na tinavete mataqaradi te Benaea tuna e Zehoiada, sapu keke tugo koari ka toloṉavulu puta. 23 Hola koari ka toloṉavulu puta sa vina lavata vagia sa, ba lopu bokaboka gua tugo ari ka ṉeta. Vekoa Devita si asa, pude na tie matamata koari nana tie kopu. 24-39 Kaiqa tie pule koari ka toloṉavulu puta pu somana si:

Asahele, tasina Zoabi.

Elehanana sa tuna koreo e Dodo pa Betilihema,

Sama meke Elika pa Harodi,

Helezi pa Peleti,

Ira tuna koreo e Ikesi pa Tekoa,

Abieza pa Anatoti,

Mebunai pa Husa,

Zalamoni pa Aho,

Maharai pa Netopa,

Helebi tuna koreo e Bana pa Netopa,

Itai tuna koreo e Ribai pa Qibea pa Benisimane,

Benaea pa Piratoni,

Hidai pa lolomo tata pa Qasi,

Abialaboni pa Araba,

Azamaveti pa Bahurimi,

Eliaba pa Salaboni,

sari na tuna koreo e Zaseni, si ari Zonatani sa tuna Sama pa Hava,

Ahiama tuna koreo e Sara pa Hara,

Elipeleti tuna koreo e Ahasibai pa popoa Ma'aka,

Eliami tuna koreo Ahitopeli pa popoa Qilo,

Hiziro pa Kameli,

Pa'arai pa Araba,

Iqala tuna koreo e Netani pa Zoba,

Bani pa Qadi,

Zeleki pa Amoni,

Naharai pa Biaroti, tie paleke poko varipera te Zoabi,

Ira meke Qarebi pa Zatiri,

Uraea sa tie Hitaiti.

Ka toloṉavulu zuapa vinarigaraedi sari na tie varipera bokabokadi.

<- 2 Samuela 22 2 Samuela 24 ->