1 Koasa vina manege vesu vuahenina sa binaṉara te Zehosapati sa baṉara pa Ziuda, si tava baṉara pa Izireli se Zoramu sa tuna koreo e Ehabi, meke kopu nia sa binaṉara Izireli ka manege rua vuaheni pa vasileana Sameria. 2 Tavete va kaleana pa kenuna Zihova si asa, ba lopu kaleana hola gugua sa tamana meke se Zezibelo sa tinana; huara gore nia sa sa beku sapu tavetia sa tamana tana vinahesina e Beolo. 3 Ba kopu ni sa sari hahanana kaleadi te Zeroboami sa tuna koreo e Nebati, meke turaṉa lani sa pa sinea sari na tie Izireli meke lopu noso ni sa sari nana kinaleana.

4 Na tie kopu sipi se Mesa sa baṉara pa Moabi, meke ta hia nia sa pude kaqu veko guana vinariponi doduru vuaheni koasa baṉara pa Izireli, keke gogoto tina lami, meke na vulu koari ka keke gogoto tina sipi. 5 Ba sipu mate se baṉara Ehabi pa Izireli, si korona koa kaurae pa binaṉara tadi pa Izireli se Mesa. 6 Koasa totosona tugo asa si taluarae pa Sameria sa baṉara Zoramu meke varigara ni sa sari doduru nana qeto minate varipera. 7 Meke garunu la inavoso si asa koasa baṉara Zehosapati pa Ziuda meke zama, “Sa baṉara pa Moabi si hiva vura taloa pa qua kinopu; boka toka nau goi pude raza ia?”

“Uve, boka si rau,” olaṉa gua sa baṉara Zehosapati. “Arau si koa mo pa mua hiniva, meke gua tugo sari na qua tie meke sari na qua hose. 8 Siraṉa savana si kote lulia gita meke la rapata?” gua se Zehosapati.

“Koasa siraṉa gelena si kote lulia gita, nuquru gua koasa soloso qega pa Edomu,” gua se Zoramu.

9 Ke taluarae sa baṉara pa Izireli, turaṉae koari na baṉara pa Ziuda meke sa baṉara pa Edomu. Na ene likoho si arini ke hola ka zuapa rane si paho ni na kolo, meke loketoṉa hokara si koa pude tadi na tie babe sari na puku kurukuru tadi kasa. 10 “Beto si gita!” zama gua sa baṉara Zoramu. “Veko varigara ni gita e Zihova si gita ka ṉeta baṉara pude variponi ni gita koasa baṉara pa Moabi!”

11 Ba nanasa se baṉara Zehosapati, “Vegua koa nana keke poropita tani sapu boka nanasa poni gita koe Zihova?” Olaṉa si keke palabatu koasa qeto minate te baṉara Zoramu, “Koa nana hie se Ilaisa sa tuna koreo e Sapati. Na tie varitokae te Ilaiza si asa.”

12 “Na poropita hinokara si asa,” gua sa baṉara Zehosapati. Ke la koe Ilaisa sari ka ṉeta baṉara.

13 Meke zama se Ilaisa koasa baṉara pa Izireli, “Nasa qua ginugua ke kote tokani gamu rau? La mamu nanasi sari na poropita saripu hoke nanasi ri na tiatamamu.” “Lokari!” Olaṉa gua se Zoramu. “Na e Zihova tu na varigara ni gami si gami ka ṉeta baṉara pude variponi ni gami koasa baṉara pa Moabi.”

14 Olaṉa se Ilaisa, “Gua sapu toana gua se Zihova Tadi na Qeto Minate sapu vahesia rau, si zama tokotokoro atu si arau, sapu na lopu kote doṉo atu igo babe liṉana atu igo arau si agoi be lopu pamaṉa nia arau se Zehosapati sa baṉara pa Ziuda. 15 Ego, va mae nia si keke tie mikemike,” gua si asa.

Sipu lopi ia sa tie mikemike sa nana hapu, si kamo koe Ilaisa sa ṉiniraṉira te Zihova, 16 meke zama si asa, “Gua hie si zama nia e Zihova, ‘Geli nia dereni sa doduruna sa lolomo popana hie. 17 Ura zama se Zihova: Lopu kote dogoro givusu babe na ruku si gamu, ba sa lolomo toqere popana hie si kote siṉia na kolo, meke gamu meke sari mia bulumakao, meke sari mia kurukuru palepaleke tiṉitoṉa si kote soku mia kolo tana napo.’ ” 18 Meke zama hoda la tu se Ilaisa, “Na mamahelona mo koe Zihova pude tavetia si hie; sari pa Moabi ba kote ade vatu nia mo Sa pa limamia gamu. 19 Kote raza i gamu meke vagi i sari doduru dia vasileana lavalavata leleadi meke ta baradi. Kote maho va gore ni gamu sari doduru dia huda vuvua, tuku i doduru dia tototolo kolo, meke ṉovali na tamunu ni patu sari doduru dia pepeso masurudi.”

20 Koivugona pana munumunu, koasa totoso sapu hoke va vukivukihi tugo, si totolo gore toṉoto mae gua pa Edomu sa kolo, meke va siṉi betoa sa sa popoa.

21 Sipu avoso nia rina tie pa Moabi, sapu ele mae sari ka ṉeta baṉara pude rapati, si ta tioko vura beto sari doduru tie saripu boka tuqe tiṉitoṉa varipera, podalae pa tie koadi kamo koari na tie vaqura, meke la aqa si arini koasa volosona sa popoa Moabi. 22 Sipu vaṉunu si arini pana munumunu koivugona si gona ia na rimata sa kolo, meke va ziṉara guni nia sa na ehara. 23 Meke zama si arini, “Na ehara si hie! Gina variperai sari ka ṉeta baṉara meke variva mate pulei! Aria mada la paleke vagi sari doduru dia likakalae veko hola ni arini pa dia ipi!”

24 Ba sipu kamoi rini sari dia ipi, si aqa rapati mo rina tie Izireli meke hadu pule ni meke seke va mate i rini sari na tie Moabi. 25 Meke huari rini sari dia vasileana lavalavata. Pude kamoa rini si keke pepeso masuruna, doduru ari na tie Izireli si oki la patu osolae tale patuna sa vasina; tukui tugo rini sari na tototolo meke maho gore ni rini sari na huda vuvua. Mumudi hokara si sa ṉati vasileana ta barana patu mo pa Kiri Hareseti si koa hola, meke vari likohae nia ri na tie gona kurukuru paqala meke rapata ia.

26 Sipu gilania sa baṉara pa Moabi sapu lopu boka si asa, si vagi sa si ka zuapa gogoto tie varipera vedara meke podekia rini pude zukuru nuquru gua pa kalina tanisa baṉara pa Edomu ba lopu boka. 27 Ke vagia sa sa tuna koreo kenuna, sapu kote hobena sa, koasa binaṉara, meke va vukivukihi nia pa kali gobana sa vasileana lavata. Sa tinaṉaziri la koa ri na tie Izireli si noma hola, ke togolo taloa pule koasa vasileana lavata si arini meke pule dia pa dia popoa.[a]

<- 2 Baṉara 22 Baṉara 4 ->