3 Koasa vuaheni kekenu sapu tava baṉara se Hezikaea, koasa sidara kekenu, si tukele pule i sa sari na tukutukuna sa sasadana pa Zelepade meke tuvaka pule i sa. 4 Varigara ni sa sari na puku hiama meke sari na tie Livaeti koasa varivarigarana pa kali gasa rimatana sa Zelepade, 5 meke zama i sa vasina, “Avoso mae, gamu na tie Livaeti; mamu va madi puleni gamu kamahire, mamu va via ia sa Zelepade te Zihova, sa Tamasa tadi na tiatamamia. Va rizu taloai sari doduru likakalae pa korapana sa Zelepade sapu va bonina. 6 Sari na tiatamada si vahesi votiki tamasa, meke tavete va kaleana pa kenuna e Zihova sa nada Tamasa. Kilua rini si Asa, meke va mudi la ia arini sa vasina pu koa si Asa. 7 Tukui rini sari na sasadana sa Zelepade, meke va matei rini sari na zuke. Meke lopu la va uququ oto huda humaṉa lea babe va vukivukihi si arini koasa Zelepade te Tamasa pa Izireli. 8 Gua asa ke sa tinaṉaziri te Zihova si gore koari pa Ziuda meke Zerusalema, meke gua sapu tavete la nia Sa koa rini si va hodahodaki meke va mataguti sa sari doduru tie. Gilana va leana ia gamu sapu gua asa. 9 Sari tamada si mate pa vinaripera, meke sari nada barikaleqe meke na koburu si ta vagi taloa, na tie ta pusidi.

10 Qua hiniva kamahire si pude tavetia si keke vinariva egoi koe Zihova, sa Tamasa pa Izireli, pude noso sa tinaṉaziri Tanisa koa gita. 11 Gamu na tuqu, mamu lopu avoso pania si hie. Ele ta vizata si gamu koe Zihova pude turu pa kenuna meke va uququ oto huda humaṉa lea la koa Sa, taveti sari na vina vukivukihi, meke turaṉi sari na tie pa vinahesina.”

12-14 Hire sari na tie pa butubutu Livaeti sapu podalae tavetavete:

18 Meke la sari na tie Livaeti koe Hezikaea sa baṉara meke totozi: “Ele va hokotia gami sa vina madina sa doduruna sa Zelepade te Zihova, kamo koasa hope tana vinukivukihi va uququ, sa tevolo tanisa bereti madina, meke sari doduru tiṉitoṉa madidi pu tavetavete ni pa Zelepade. 19 Paleke pule beto ni tugo gami sari na tiṉitoṉa madidi tanisa Zelepade saripu vagi taloa ni e Ehazi, sa baṉara, totosona sapu seke tinarae sa meke vahesi sa sari na beku. Ele va madi beto pulei gami si arini, meke kamahire si koa dia pa kenuna sa hope te Zihova.”

20 Munumunu hokara, pa koivugona, si varigara ni e Hezikaea sa baṉara sari na tie tuturaṉa koasa vasileana Zerusalema, meke la pa Zelepade si arini. 21 Meke turaṉa mae ni rini si ka zuapa bulumakao kokoreo, ka zuapa sipi, zuapa tuna sipi, meke zuapa qoti pude va vukivukihi vulasa pani sari na sinea tanisa tatamana baṉara, tadi na tinoni pa Ziuda, meke pude va madia tugo sa Zelepade. Tozi ni sa baṉara sari na hiama pa tutina e Eroni, pude va vukivukihi ni sari na kurukuru pa hope. 22 Ke va mate kekenu i rini sari na bulumakao, meke vagi ri na hiama sari eharadi meke siburu lani koasa hope; beto si va matei rini sari na sipi meke vagi ari na hiama sari eharadi meke siburu lani koasa hope; beto asa si va matei rini sari na tuna sipi, meke vagi ri na hiama sari eharadi meke siburu lani koasa hope. 23 Vina betona si tiqe turaṉa lani rini sari na qoti koasa baṉara meke koari na tie sapu somana pa vinahesi, meke va opo ni limadia rini. 24 Meke tava mate sari na qoti meke zoropo lani rini sari eharadi pa hope pude na vinukivukihi vinulasadi sari na sinea tadi na tinoni pa Izireli, sina ele garunu nia sa baṉara pude sa vinukivukihi va uququ meke sa vina vukivukihi vinulasa sinea si pude tadi na tinoni pa doduruna sa popoa Izireli.

25 Meke vekoi sa baṉara sari na tie Livaeti pa Zelepade te Zihova pude tuqei sari na hapu, mike, meke na sibolo, gua sapu ele tozi veko ni e Zihova koe baṉara Devita, e Qadi sa tie dodogorae tanisa baṉara, meke koe poropita Netani. 26 Ke sari na tie Livaeti si turu nama turaṉi sari na tiṉitoṉa mikemike te Devita sa baṉara meke sari na hiama si turu tugo, tuqei rini sari na buki. 27 Vala Hezikaea sa zinama pude tavetia sa vinukivukihi vina uququ koasa hope; meke totoso podalae sa vinukivukihi, si podalae kera vahesia rini se Zihova, meke podalae ivui rini sari na buki meke lopi rini sari na tiṉitoṉa tana kerakera te Devita sa baṉara pa Izireli. 28 Doduruna sa vinarigara si somana pa vinahesi, meke lamo sari na kinerakera meke lopidi sari na tiṉitoṉa kerakera osolae hokoto sa vinukivukihi vina uququ. 29 Sipu ele beto sari na vinukivukihi si kokotuṉu gore sa baṉara Hezikaea meke sari doduru tie meke vahesia rini sa Tamasa. 30 Sa baṉara Hezikaea meke sari na koimata si tozi ni sari na tie Livae pude kera lani koe Zihova sari na kinera vinahesi sapu kuberi e Devita, meke e Asapa sa poropita. Ke doduru tinoni si kera qetuqetu meke kokotuṉu si arini meke vahesia rini sa Tamasa.

31 Meke zama la i e Hezikaea sari na tinoni, “Kamahire si ele va madi puleni gamu si gamu, ke paleke mae ni sari na vinukivukihi vinariponi na zinama leana la koasa Zelepade te Zihova.” Ke paleke lani rina tinoni sari na vina vukivukihi meke sari vinukivukihi zinama leana meke arini sapu malumu bulodia si paleke la vinukivukihi va uququ. 32 Paleke lani rini si ka zuapa ṉavulu puta bulumakao kokoreo, keke gogoto sipi kokoreo, meke karua gogoto tuna sipi kokoreo pude tana vukivukihi va uququ la koe Zihova. 33 Paleki tugo rini si ka onomo gogoto bulumakao kokoreo meke ka ṉeta tina sipi pude na vinukivukihi henahena tadi na tie. 34 Sina lopu soku sari na hiama pude va matei sari doduru kurukuru, ke la toka ni ari na tie Livaeti si arini osolae hokoto sari na tinavete. Soku pule ari na hiama si va via puleni pa totoso asa. Ari na tie Livaeti si kopu va leana nia arini sa hahanana vina via pule ni, holani sari na hiama. 35 Hola toa sari na vinukivukihi va uququ, gua tugo sa deana tanisa vinukivukihi binaere meke sari na vinari poni napo sapu ta vala turaṉae koasa vinukivukihi va uququ.

Pa siraṉa gua asa si podalae pule sa vinahesi pa Zelepade. 36 Qetu sa baṉara Hezikaea meke sari doduru tinoni, sina e Tamasa tokani pude tavete tuturei i sari na vina tana hire.

<- 2 Koronikolo 282 Koronikolo 30 ->