2 Koronikolo 16

Tinasuna Koari pa Izireli

(1 Baṉara 15:17-22)

1 Koasa vina toloṉavulu onomo vuahenina sa binaṉara te Asa, si sage la se Basa meke raza ia si pa Ziuda, meke podalae kuri va ṉiṉira ia sa sa vasileana pa Rama pude hukati sari doduru tie pu rizu nuquru meke vura la gua pa Ziuda, gua. 2 Ke vagi e Asa sari na siliva meke na qolo koari na lose vekovekoana poata pa Zelepade te Zihova meke pa vetu baṉara meke va garunu lani sa pa Damasikasi, koe Beni Hadadi, sa baṉara pa Siria, meke zama la guahe si asa: 3 “Mada tavetia si keke vinariva egoi tadigita kara, gua sapu tavetia rina tiatamada. Sari na siliva na qolo hire si na qua vinariponi atu koa goi. Ego, mamu kumatia sa mua vinariva egoi koe Basa, sa baṉara pa Izireli, pude kaqu va rizu taloa i sa sari nana tie varipera koasa qua kali popoa,” gua si asa.

4 Va egoa e Beni Hadadi sa hiniva te Asa, meke garunu lani sa sari nana ṉati palabatu varipera meke sari na nana tie varipera pude la razai sari na vasileana pa Izireli. La vagi rini sari pa Izoni, Dani, Ebolo Beti Ma'aka, sari doduru popoa pa butubutu Napitalai meke sari na vasileana lavata vasina si ta kopue sari na ginani na likakalae. 5 Totoso avoso nia e Basa sapu gua asa, si noso si asa pa kinurina sa goba pa Rama, meke noso tugo sa nana tinavete. 6 Meke tiqe varigara ni e Asa, sa baṉara, sari doduru tie pa doduruna sa popoa Ziuda, meke tozi ni sa pude paleke rizu taloa ni sari na patu meke na labete sapu tavetavete ni e Basa, pa Rama. Arini si tavetavete ni sa pude kuri sagei sari na vasileana pa Qeba meke Mizipa.

Sa Poropita Hanani

7 Pa totoso asa si la se Hanani, sa poropita, koe Asa, sa baṉara, meke zama gua hie koasa, “Sina kalavarae ia agoi sa baṉara pa Siria meke lopu kalavarae ia goi se Zihova, sa mua Tamasa, ke sa qeto minate tanisa baṉara pa Siria si govete taloa koa goi. 8 Vea sari pa Itiopia meke Libia, lopu nomana lavata tu sa dia qeto minate, meke soku dia totopili varipera meke na tie koidi pa hose? Ba sipu kalavarae si goi koe Zihova, si poni nigo vinarane mo Sa, meke va kilasi goi si arini. 9 Sa Tamasa kopu totoko nia sa doduruna sa kasia popoa, pude va ṉiṉira i sarini pu soto va nabu bulodia koe Tamasa. Ele tavete va kaleana hola si agoi, ke podalae kamahire si kote koa varipera lamo si agoi.” 10 Koasa ginugua hie si bugoro nia Asa sa poropita, ke veko ia sa pa vetu varipusi. Podalae pa totosona asa si ṉoṉovali e Asa sari kaiqa tinoni.

Sa Vina Betona sa Binaṉara te Asa

(1 Baṉara 15:23-24)

11 Sari doduru tinavete sapu evaṉi Asa totosona sapu baṉara si asa, podalae pa pinodalaena kamo pa vina betona si ta kubere beto pa korapana sa Buka Tinozi tadi na Baṉara pa Ziuda meke Izireli. 12 Pa vina toloṉavulu sia vuaheni sipu koa baṉara si asa, si kamoa keke minoho kaleana sa nenena. Gua asa ba lopu hite hata tinokae la tugo si asa koe Zihova, ba koari na dokita mo. 13 Meke pa vina made ṉavulu eke vuaheni pa nana binaṉara si mate si asa, 14 meke ta pomunae si asa pa lovu patu, sapu ta peqo nama vekona, pa vasileana te Devita. Na pauda humaṉa lea na oto huda humaṉa lea meke na oela humaṉa lea si vala i rini pude nama ia sa tinina pude ta pomunae, meke tavetia rini si keke nika nomana pude besu nia sa nana minate.

<- 2 Koronikolo 15 2 Koronikolo 17 ->