1 Meke sipu va hokotia ri Saula e Devita sa dia vivinei, si podalae tataru sisigiti nia e Zonatani sa tuna Saula se Devita, kekeṉoṉo gua sapu tataru pule nia si asa telena. 2 Heki nia Saula se Devita podalae tugo koasa rane asa meke lopu va malumia sa pude pule la pa nana vasileana soti. 3 Va tatara va nabu nia Zonatani koe Devita sa nana binaere loke vina betona sina koa gua koasa nana tataru lohina koa sa. 4 Va gorea sa sa koti sapu va sagea sa meke vala nia sa koe Devita, meke sa nana poko varipera meke gua tugo sa nana magu varipera, bokala, meke na belete.

5 Bokaboka hola se Devita pude taveti sari doduru tinavete pu garunu ni Saula koa sa, meke vizatia tugo Saula si asa pude keke palabatu pa nana qeto minate. Qetu nia ri doduru tie na palabatu te Saula sa ginugua hie.

6 Sipu pule se Devita totoso ele va matea sa se Qolaea meke korapa pule mae tugo sari na tie varipera koa rina dia vasileana soti, si vura mae sari doduru barikaleqe pa doduru vasivasileana pa Izireli pude tutuvia sa baṉara Saula gua. Kera ni rini sari na kinera qetuqetu, peka meke lopi ni rini sari na tabarini na mike laera. 7 Koa sa dia qinetuqetu si kera guahe si arini, “Saula va matei sari na tina tie, ba e Devita sari ka manege tina tu.”*1 Samuela 21:11, 29:5 8 Lopu qetu nia Saula sapu gua asa, meke podalae bugoro sisigiti si asa. Zama si asa, “Koe Devita kera nia rini sari ka manege tina tu, ba koa rau kaiqa tina mo. Namu na kote tava baṉara mo si asa!” 9 Gua asa ke konokono nia na kopu tokotoko nia sa se Devita podalae tugo pa totoso asa.

10 Keke rane si mae nuquru va hodaka koe Saula si keke tomate kaleana mae guana koe Tamasa, meke ititu si asa pa nana vetu guana tie pekipekina. Ke sipu korapa mikea Devita sa nana mike hapu, gua tugo sapu hoke tavetia sa doduru totoso, si taṉini vagia Saula si keke hopere. 11 Meke zama guahe telena se Saula, “Maqu hopere turaṉae nia gana pa kapagoba,” meke hopere la nia sa koa sa sa hopere karua totoso; ba va hola i mo Devita si arini.

12 Matagutu nia Saula se Devita sina koa koe Devita se Zihova ba kilua Zihova se Saula. 13 Ke garunu taloa nia Saula si asa, meke va palabatua sa koari ka keke tina tie varipera. Turaṉi Devita pa vinaripera sari nana tie, 14 meke bokabokana si asa koari doduru tinavete sina koa koa sa se Zihova. 15 Meke sipu gilania Saula sa binokaboka te Devita, si noma lalanana tu sa minatagutu tanisa. 16 Ba sari doduru tie pa Izireli, meke butubutu Ziuda si tataru nia se Devita sina na keke tie tuturaṉa bokabokana si asa.

17 Meke zama se Saula koe Devita, “Hie sa tuqu vineki kenuna se Merabi. Kaqu vatua rau si asa koa goi pude na loamu koa gua sapu nabulu nau goi guana tie varipera varane na ta raṉemu, na varipera ni goi sari na vinaripera te Zihova.” Balabala ia Saula sapu koasa siraṉa gua asa si kaqu va matea rina tie Pilisitia se Devita gua, meke lopu kaqu tavetia sa telena sapu gua asa.

18 Olaṉa se Devita, “Esei si arau meke na sa sa qua tatamana pude ta evaṉae na roana sa baṉara si arau?” 19 Ba sipu kamo sa totoso pude ta vala koe Devita se Merabi, si vala nia tu Saula koa ke tie pozana e Adireli pa Mehola si asa.

20 Ba sa tuna vineki Saula se Maekolo, si hivahiva nia pule sa se Devita, meke sipu avoso nia Saula sapu gua asa, si qetu si asa. 21 Zama golomo telena si asa, “Kaqu vala nia rau se Maekolo koe Devita. Kaqu tozi nia rau si asa pude sekesekei nia, meke kaqu va matea ri na tie Pilisitia si asa, gua.” Ke pa vina rua totoso si zama se Saula koe Devita, “Kaqu na qua roroto rau si goi.” 22 Garuni sa sari nana palabatu pude zama ekea se Devita meke pude tozi nia tugo sapu, “Qetu nigo sa baṉara si goi meke sari doduru nana palabatu kekeṉoṉo gua agoi. Ke hie mo sa totoso leana tamugoi pude haba ia sa tuna vineki.”

23 Ke tozia rini koe Devita sa ginugua hie, meke olaṉa si asa, “Arilaena hola si pude ta evaṉae na roroto tanisa baṉara, ba lopu garoqu; na tie habahuala meke loke laequ si rau.”

24 Meke tozia rina palabatu koe Saula gua sapu zama nia Devita, 25 meke garuni Saula si arini pude tozi nia se Devita, “Sapu doduru pu gua hiva nia sa baṉara koa goi pude na hinoluna sa barikaleqe si ka keke gogoto kapudi*Sa kapu toto si gunia sa. rina tie Pilisitia matedi, pude guana hinobe koari nana kana.” Pa siraṉa gua asa si va turua Saula pude va matea rina tie Pilisitia se Devita gua. 26 La tozia ri na nabulu te Saula koe Devita gua sapu ele zama ni Saula, meke qetu nia Devita sa binalabala pude ta evaṉae na roroto tanisa baṉara si asa, gua. Sipu lopu ele kamo sa rane pude ta muti sa vinarihaba, 27 si la se Devita meke sari nana tie meke seke va matei si karu gogoto tie Pilisitia. Paleke lani sa koa sa baṉara sari na kapudia meke nae lani sa koasa si arini, pude mani ta evaṉae na roroto tanisa gua. Ke vala nia Saula sa tuna vineki se Maekolo pude haba ia Devita.

28 Sipu bakala meke gilana valeania Saula sapu se Zihova si koa somana koe Devita meke sa tuna tugo ba tataru nia si asa, 29 si noma hola lalanana tu sa minatagutuna e Devita, meke kana ia sa si asa pa doduruna sa nana tinoa.

30 Hoke mae sa qeto minate tadi na tie Pilisitia pude varipera gua, ba koari doduru vinaripera si mataqara hola ni Devita sari na koimata varipera te Saula. Gua asa ke ta gilana valeana se Devita koari na tie.

<- 1 Samuela 171 Samuela 19 ->