3 “Gilania mua sapu sa tamaqu se Devita si ta raza ni sari na vinaripera koari na popoa pa vari likohaena pu kana la koasa. Gua ke lopu boka kuria sa sa Zelepade pude vahesia se Zihova sa nana Tamasa, osolae va kilasi tu e Zihova sari doduru nana kana. 4 Ba kamahire si ele poni nau e Zihova qua Tamasa sa binule koari doduru popoa pa vari kaliqu. 5 Kamahire si balabala ia rau pude kuria sa Zelepade asa, pude vahesia se Zihova sa qua Tamasa, gua sapu ele va tatara veko nia e Zihova koasa tamaqu Devita sapu guahe: ‘Sa tumu koreo sapu kaqu va hobe nigo Rau pude baṉara pa mudimu goi, si kaqu kuria sa Zelepade Taqarau!’ gua. [a]

6 Ke mamu garunu lani pa Lebanoni sari na mua tie pude maho poni au sari na huda sida. Sari na qua tie si kote tavetavete somanae koa rini, meke arau kote tabari sari na mua tie gua mo sapu tozia goi. Na gilania mua goi sapu sari qua tie si lopu tumae maho huda gua rina tie tamugamu pa Taea.”

7 Qetu hola se Hiramu totoso vagia sa sa inavoso hie koe Solomone meke zama si asa, “Mani tavahesi se Zihova pa rane ṉinoroi sapu boka ta poni koe Devita si keke tuna koreo gilagilana sapu hobea si asa pude koa baṉara koasa butubutu nomana asa!” gua si asa. 8 Beto asa si garunu la nia e Hiramu koe Solomone sa inavoso sapu guahe: “Ele vagia rau sa mua inavoso meke namanama si rau pude tavetia sapu gua tepa ia goi. Kaqu ponigo rau sari na huda sida meke sari na huda paeni. 9 Sari na qua tie kote va gore i sari na dekuru podalae pa Lebanoni meke kamo la pa masa kolo, meke kote pusi vari kapae ni, tavete ni bana, meke ale rarata la koasa vasina sapu vizatia goi. Meke vasina si kote rupahi ri na qua tie sari dekuru, meke sari mua tie kote lalae ni. Ego, koasa mua kalina, si hiva nigo rau pude va mae ginani mo si agoi koasa qua vetu baṉara,” gua si asa.

10 Ke doduru dekuru sida na paeni si poni la nia e Hiramu koe Solomone, gua sapu hiva nia sa, 11 meke pa hopeke vuaheni si ponia Solomone koe Hiramu keke gogoto onomo ṉavulu tina baika hiokona lima kilo[b] padana sa huiti, meke ka made gogoto tina lita padana sa oela olive sapu via valeanana.

12 Meke ponia e Zihova koe Solomone sa ginilagilana lohina gua sapu va tatara veko nia Sa. Meke sa binule si koa pa vari korapadi ri Hiramu meke Solomone meke tavetia ri karua si keke vinariva egoi.

13 Meke vizata vagi e Solomone sa baṉara si ka toloṉavulu puta tina tie pa doduruna sa popoa Izireli pude nana tie sapu kote zukuru ni tinavete ṉiṉiradi sa. 14 Meke garunia sa se Adoniramu pude kopu ni. Paqaha lani sa koari ka ṉeta pukuna sari na tie, manege puta tina tie pa keke pukuna meke garunu lani sa pa Lebanoni pude la tavetavete vasina, keke sidara pa Lebanoni meke pule koa karua sidara pa dia popoa.[c] 15 Tagoi tugo e Solomone si ka vesu ṉavulu puta tina tie pu koa koari na toqere pude peqo patu, meke ka zuapa ṉavulu puta tina tie pude paleki sari na patu, 16 meke vekoi sa si ka ṉeta tina ṉeta gogoto koimata pude totoli ni sari na dia tinavete. 17 Meke pa ginarunu te Solomone sa baṉara si peqo va memehi rini sari na patu nomadi lavata pude va habotu ia sa Zelepade. 18 Ke, sari na tie tavetavete te Solomone meke te Hiramu, meke sari na tie koasa vasileana lavata pa Bibilosi[d] si va nama i sari na patu meke sari na labete pude kuria sa Zelepade.

<- 1 Baṉara 41 Baṉara 6 ->