1 Baṉara 3

Tepaia Solomone sa Ginilagilana Lohina pa Vinaravara

(2 Koronikolo 1:3-12)

1 Meke tavetia Solomone si keke vinariva egoi koasa baṉara pa Izipi meke haba ia Solomone sa tuna vineki sa baṉara Izipi, meke turaṉa la nia sa si asa pude koa koasa vasileana lavata te Devita, osolae tavete va hokotia sa sa nana vetu baṉara, meke sa Zelepade, meke sa vari likohaena sa goba pa Zerusalema. 2 Sa Zelepade te Zihova si lopu ele ta kuri, ke sari na tie si hoke va vukivukihi koari soku votivotiki hope koari na toqere. 3 Ura tataru nia Solomone se Zihova meke luli sa sari na vina turu na tinarae tanisa tamana sapu se Devita. Ba va mate kurukuru made nene tugo si asa pude va vukivukihi va uququ koari na votivotiki hope pa toqere.

4 Keke totoso si la si asa pa Qibione pude va vukivukihi va uququ, sina asa sa ṉati vasina vahesihesiana pa toqere. Meke vasina si ele keke tina hola vina vukivukihi va uququ si ele taveti sa koasa hope vasina. 5 Pa Qibione si vura koasa se Zihova pana boṉi pa pinutagita, meke nanasia Tamasa si asa, “Nasa si hiva nia goi pude Maqu ponigo?” gua si Asa.

6 Meke olaṉa se Solomone, “Doduru totoso si va dogoro nia Agoi sa Mua tataru lavata koe Devita sa tamaqu, sa Mua nabulu, sina luli va hinokara igo sa pa tinoṉoto meke pa ṉinoṉo pa bulona. Meke lopu hite makudo sa Mua tataru lavata koasa, meke ele poni nia Goi koasa si keke tuna pude habotu koasa nana habohabotuana baṉara. 7 Ke Zihova qua Tamasa, ele va malumau Goi pude hobea sa tamaqu pude na baṉara. Na tie vaqura sisigiti tugo si rau, meke lopu tumae nia rau sa tinavete tana baṉara. 8 Meke hiera si rau sapu koa pa korapadi rina tinoni, saripu ele vizati Goi pude na Mua tie soti; soku hola meke lopu boka ta nae si arini. 9 Gua asa, ke mamu poni au sa ginilagilana lohina d sapu ta hivae pude boka kopu valeana ni arau sari na Mua tinoni pa tinoṉoto, meke tumae gilania rau sa vinotikaena koasa sapu leana meke kaleana. Ura na esei kaqu boka baṉara valeana ni sari na Mua tinoni hire?” gua si asa.

10 Meke qetu nia e Zihova sapu gua tepa ia e Solomone koa Sa. 11 Ke zama la sa Tamasa koasa, “Sina tepa ia goi sa ginilagilana lohina pude boka totoli va toṉoto, ba lopu sa tinoa va gelenae na tinagotago babe na vina matedi ri mua kana, 12 ke kaqu tavetia Arau gua sapu tepa ia goi. Kaqu poni nigo ginilagilana lohina Arau, sapu namu loke tie pukerane ele tagoa, meke loke tie pule si kote gugua asa. 13 Ba kaqu ponigo tugo Arau sapu gua lopu tepa ia goi. Kaqu na tie tagotago na ta pamaṉaemu si goi pa doduruna sa mua tinoa, hola ni sari doduru baṉara pule. 14 Meke pana va tabe Au na kopuni goi sari na Qua tinolitolie na tinarae, kekeṉoṉo puta gua sapu tavetia sa tamamu se Devita, si kaqu ponigo tinoa va gelenae tugo Arau si goi,” gua si Asa.

15 Meke vaṉunu se Solomone meke gilania sa sapu e Tamasa si zama koasa pa pinutagita.

Beto asa si topue pule la pa Zerusalema si asa, meke la turu pa kenuna sa Bokese Vinariva Egoi te Zihova, meke taveti sa sari na vina vukivukihi va uququ meke sari na vina vukivukihi hinenahena binaere koe Zihova. Beto asa si tavetia sa si keke inevaṉa tadi doduru nana palabatu nomadi koasa nana qinavuna.

Pitua e Solomone si Keke Ginugua Tasunana

16 Keke rane si mae vura gedi si karua maqota koe Solomone sa baṉara. 17 Keke ri karua si zama, “Kei qua baṉara, sa barikaleqe hie meke arau si koa mo pa keke vetu, meke podoa rau si keke koburu koreo pa vetu sipu korapa koa nana si asa vasina. 18 Meke sipu karua ranena sa qua koburu, si podoa tugo sa si keke koburu koreo. Meke gami karua mo si koa pa vetu asa meke loke tie pule. 19 Ego, keke boṉi si topili sa barikaleqe meke naqoto va mate hola ia sa sa nana koburu. 20 Korapa boṉi si tekulu si asa, meke ovulu vagia sa sa qua koburu koreo pa kaliqu sipu korapa puta si rau, meke paleke la nia sa pa nana teqe; beto asa si mae vekoa sa pa qua teqe sa koburu matena. 21 Meke pana munumunu sipu vaṉunu si rau pude ponia sa qua koburu gua, si dogoria rau sapu na mate tu si asa. Ba sipu doṉo viliti valeania rau si dogoro valeania arau sapu lopu asa sa koburu sapu podoa arau.”

22 Ba zama sapu keke ri karua, “Lokari! Sa koburu toana si taqarau meke sapu matena si tamugoi!” gua si asa. Ba olaṉa pule la sa barikaleqe kekenu, “Lokari! Sapu matena si tamugoi, ba sapu toana si taqarau!” gua si asa. Gua meke varitokei gedi sari karua pa kenuna sa baṉara.

23 Meke tiqe zama se Solomone sa baṉara, “Hopeke zama si gamu kara sapu sa koburu toana si nana, meke sapu matena si nana tu sapu keke, gua.” 24 Meke garunu sa baṉara pude vagi la nia si keke magu varipera meke sipu kamo la sa magu varipera, 25 si zama si asa, “Ego, magu viqala rua ia sa koburu toana sana meke vala nia keke kukuruna koasa keke barikaleqe meke sa keke kukuruna koasa keke.” 26 Meke sa tinana soti sa koburu si tataru hola nia sa sa koburu, ke zama la koasa baṉara si asa, “Kei qua baṉara, vala nia mo koasa sa koburu toana sana, mu lopu va matea!” gua si asa. Ba sapu keke ri kara si zama, “Ego tu, viqala rua ia sa koburu, pude lopu keke gami karua kote tagoa,” gua si asa.

27 Meke olaṉa se Solomone, “Mu lopu va matea sa koburu! Mamu vala nia koasa barikaleqe kekenu; na asa sa tinana soti,” gua si asa. 28 Totoso avoso nia ri na tinoni Izireli sa vinilasa sapu tavetia e Solomone, si pamaṉa hola nia rini si asa, sina gilania rini sapu ele ponia Tamasa koasa sa ginilagilana lohina pude va toṉoto valeani sari na ninominomi pa butubutu.

<- 1 Baṉara 2 1 Baṉara 4 ->