1 Pa vina manege vesu vuahenina sapu koa baṉara se Zeroboami pa Izireli, si tava baṉara se Abaeza pa Ziuda, 2 meke ka ṉeta vuaheni si koa baṉara pa Zerusalema si asa. Sa tinana si e Ma'aka, sapu sa tuna vineki e Abusalamu. 3 Taveti sa sari doduru sinea saripu taveti sa tamana, meke lopu soto va leana sa bulona pa linulina e Zihova sa nana Tamasa, gugua sa bulona e Devita sa tamana sa tamana. 4 Ba sina koa gua sa laena e Devita, si lopu huara inetia e Zihova sa popoa Zerusalema meke lopu va matea Sa se Abaeza meke sari na tuna, ba va ṉiṉira ia Zihova sa Tamasa te Devita sa popoa Zerusalema meke ponia Sa koe Abaeza si keke tuna koreo, pude baṉara nia si pa Zerusalema.*1 Baṉ 11:36 5 Ura tavetia e Devita gua sapu toṉoto pa dinoṉo te Zihova meke lopu hite sekea sa si keke vasi Nana tinarae pa doduruna sa nana tinoa, ba sa sinea si koasa guguana mo e Uraea, sa tie pa butubutu Hitaiti.*2 Samuela 11:1-27 6 Sa vinariperai pa vari korapadia ri pa binaṉara te Rehoboami meke e Zeroboami si lopu hite makudo koasa doduruna sa tinoa te Abaeza. 7 Meke doduru ginugua pule saripu taveti e Abaeza, si ta kubere pa korapana sa Buka Tinozi Tadi na Baṉara pa Ziuda. 8 Mate se Abaeza, magogoso si asa somanae koari na tamana, meke ta pomunae koasa vasileana lavata te Devita, meke se Asa sa tuna koreo, si baṉara hobena si asa.
9 Koasa vina hiokona puta vuahenina sa binaṉara te Zeroboami sa baṉara pa Izireli, si tava baṉara se Asa pa Ziuda, 10 meke ka made ṉavulu eke vuaheni si koa baṉara si asa pa Zerusalema. Sa pozana sa tinana sa tinana si e Ma'aka, sapu sa tuna vineki e Abusalamu. 11 Tavetia e Asa gua sapu toṉoto pa dinoṉo te Zihova kekeṉoṉo gua tugo sapu tavetia e Devita, sa tutina. 12 Va rizu taloa betoi sa sari doduru tie pa popoa, saripu hoke taveti sari hahanana guana maqomaqota koari na vasidi vahesihesiana tadi na tamasa huporodi, meke va rizu taloa i sa sari doduru beku pu taveti rina tamana kenudi pukerane. 13 Va beto pania tugo sa sa tinana sa tinana sapu se Ma'aka, koasa nana tuturuana kalaho, sina tavetia sa si keke beku barikaleqe variva malederena, sapu se Asera, sapu boka va gavogavoro soku ginugua kaleadi. Maho gore nia e Asa sa beku meke sulu pania sa pa lolomo Kidoroni. 14 Lopu huara beto i e Asa sari doduru vasidi vahesihesiana beku koari na toqere, ba soto va nabu sa bulona koe Zihova pa doduruna sa nana tinoa. 15 Va nuquri sa pa korapa Zelepade, sari doduru tiṉitoṉa arilaedi saripu va madi sa tamana koe Tamasa, sari na qolo na siliva, meke sari na tiṉitoṉa pu va madi sa telena.
16 Se Asa sa baṉara pa Ziuda, meke se Basa, sa baṉara pa Izireli, si hoke vari varipera la mo pa varikorapadia, doduru totoso koasa dia binaṉara. 17 Sage la se Basa meke raza ia si pa Ziuda, meke podalae kuri va ṉiṉira ia sa sa vasileana pa Rama pude hukati sari doduru tie pu rizu nuquru meke vura la gua pa Ziuda, gua. 18 Ke vagi varigara ni e Asa sa baṉara sari doduru siliva na qolo saripu koa hola koasa lose poata pa Zelepade meke koasa vetu lavata tanisa baṉara, meke va paleke ni koari nana ṉati palabatu pa qavuna, meke garunu lani pa Damasikasi koe Beni Hadadi, sa baṉara pa Siria, sapu sa tuna koreo e Tabarimoni, meke sa tuna sa tuna koreo e Hezioni. Meke zama guahe: 19 “Mada tavetia si keke vinariva egoi tadigita kara, gua sapu tavetia rina tiatamada. Sari na siliva na qolo hire si na qua vinariponi atu koa goi. Ego, mamu kumatia sa mua vinariva egoi koe Basa sa baṉara pa Izireli, pude kaqu va rizu taloa i sa sari nana tie varipera koasa qua kali popoa,” gua si asa.
20 Va egoa e Beni Hadadi sa hiniva te Asa, meke garunu lani sa sari nana ṉati palabatu varipera meke sari na nana tie varipera, pude la razai sari na vasileana lavata pa Izireli. La vagi rini sari na popoa pa Izoni, Dani, Ebolo Beti Ma'aka, sari na popoa tata koa sa kopi Qaleli, meke sa doduruna sa kali popoa tanisa butubutu Napitalai. 21 Totoso avoso nia Basa sa baṉara gua sapu ta evaṉa, si noso si asa pa kinurina sa goba pa Rama meke la nana pa Tiriza.
22 Meke garunu lani e Asa sa baṉara sari doduru tie pa popoa Ziuda, pude la paleke taloa ni pa Rama sari na patu na labete. Sari na tiṉitoṉa arini si tavetavete ni Asa pude kuri va ṉiṉira i sari na vasileana pa Mizipa meke pa Qeba, keke vasileana lavata pa kali popoa te Benisimane.
23 Doduru ginugua pule saripu taveti e Asa sa baṉara, sari nana tinavete varane, meke sari na vasileana nomadi pu ta kuri va ṉiṉira, si ta kubere beto pa korapana sa Buka Tinozi tadi na Baṉara pa Ziuda. Koasa nana tinoa binarogoso, si raza ia keke minoho pa nenena, ke lopu boka ene va leana si asa. 24 Mate se Asa, meke ta pomunae si asa, koari na lovu tadi na baṉara, pa korapana sa vasileana lavata te Devita, meke sa tuna koreo, sapu se Zehosapati si baṉara hobea si asa.
27 Sa tuna koreo e Ahiza, sapu se Basa, koasa butubutu Isaka, si kuhana nia sa se Nadabi meke seke va matea sa si asa, sipu korapa raza ia Nadabi meke sari nana tie varipera sa vasileana lavata pa Qibetoni pa popoa Pilisitia. 28 Ta evaṉa sapu gua asa, koasa vuaheni vina ṉeta sipu koa baṉara se Asa pa Ziuda. Ke hobea Basa se Nadabi meke koa baṉara pa Izireli si asa. 29 Sipu tava baṉara tugo si asa, si va mate betoi sa sari doduru tiena sa puku tatamana te Zeroboami. Gua puta tugo asa sapu ele zama nia e Zihova koe Ahiza, sa poropita pa Saelo, sapu sa Nana nabulu. Sari doduru tatamana te Zeroboami si tava mate beto, loke tie si toa hola.*1 Baṉ 14:10 30 Ta evaṉa sapu gua asa, sina va bugoro sisigitia e Zeroboami se Zihova, sa Tamasa pa Izireli, koari na sinea saripu taveti sa, meke turaṉa va sea i tugo sa sari na tinoni Izireli.
31 Doduru ginugua saripu taveti e Nadabi, si ta kubere beto pa korapana sa Buka Tinozi tadi na Baṉara Izireli. 32 Se Asa sa baṉara Ziuda, meke se Basa, sa baṉara pa Izireli, si lopu makudo variperai pa varikorapadia, pa doduruna sa dia tinoa binaṉara.