1 Hire sari na pinaqahadi rina tie Livaeti pu turu kopu koari na sasadana sa Zelepade. Koasa puku butubutu te Kora, si e Meselemia tuna e Kore, pa pinodopodo te Asapa. 2 Ka zuapa koreo si tanisa, ta kubere luli gua pa dia vuaheni: E Zakaraea, Zediale, Zebadaea, Zatinieli. 3 Elami, Zehohanani, meke e Eliehoenai.

4 Se Opeti Edomu ba podo koreo tugo, ura mana nia Tamasa si asa meke ka vesu sari tuna koreo, ta kubere luli gua pa dia vuaheni: E Semaea, Zehozabadi, Zoa, Sakara, Netanela.[a] 5 Amieli, Isaka, meke e Peuletai.

6-7 Sa koreo kenuna te Opeti Edomu, se Semaea si ka onomo tuna koreo: E Oteni, Repaeli, Opeti, Elizabada, Elihu meke e Semakia. Tie arilaedi hola si hire pa dia puku butubutu koa gua pa dia binokaboka; sari karua mudidi si hinokara bokaboka hola.

8 Doduru arini si ta pododi koe Opeti Edomu, arini meke sari na tudia koreo meke sari turaṉadia; ka onomo ṉavulu rua tie bokabokadi hola pa dia tinavete.

9 Meke se Meselemia si koadia tuna koreo meke sari turaṉadia; ka manege vesu tie bokabokadi pa dia tinavete.

10 Koasa tatamana te Merari koa nana se Hosa, sapu ka made tuna koreo: Simiri, sapu vizatia sa tamana si asa pude tuturaṉa, ba lopu na koburu kenuna si asa. 11 E Hilikaea, Tebalia, meke e Zakaraea. Ka manege ṉeta pa pinodopodo te Hosa sina tie turu kopu pa Zelepade.

12 Sari na tie kopu pa Zelepade si tava hia luli gua pa hopeke puku tatamana meke ta poni tinavete si arini pa Zelepade, kekeṉoṉo gua mo ri kasa tasidia pule sari na tie Livaeti. 13 Meke hopeke tatamana, hiteke na lavata, si tavetavete nia sa mudumudukeda pude dogori sari na dia hopeke sasada kote kopu ni rini. 14 Se Selemaea vagia sa sasada pa kali gasa rimata, meke sa tuna koreo se Zakaraea, keke tie vari tokae hola pa binalabala leadi si kopu nia sa sasada pa kali gede[b]. 15 E Opeti Edomu ta hia nia sa sasada pa kali matao, meke sari na tuna si ta hia nia pude kopu ni sari na lose vekovekoana likakalae. 16 Ari Supimi meke Hosa si kopu nia sa sasada pa kali lodu rimata meke sa sasada Saleketi pa siraṉa kali sage. Sari na tie kopu hire si varivarihobei pa hopeke dia totoso tavetavete. 17 Pa kali gasa rimata, si ari ka onomo tie kopu si tavetavete pa hopeke rane. Pa kali matao si ari ka made pa keke rane, meke pa kali gede si ari ka made si kopu pa keke rane. Ka made si kopuni sari na lose vekovekoana likakalae pa hopeke rane, hopeke karua pa keke lose. 18 Koasa gogoena pa kali lodu rimata si ka made si kopu pa kali siraṉa, meke karua si pa korapana sa zokozokoroana. 19 Arini sari na pinaqahadi sari na tie kopu sasada koari na puku tatamana te Kora meke puku tatamana te Merari.

20 Kaiqa pule koari na turaṉadia rina tie Livaeti si palabatu ni sari na lose poata pa Zelepade, meke sari na lose vasina ta veko sari na vinariponi tava madidi la koe Tamasa. 21 Sarini pu podo goredi koe Ladana, keke tuna e Qerisoni, meke tuturaṉa koari na tatamana te Ladana si ari: E Zehiele, 22 karua tuna koreo e Zehieli, ari Zetamu meke e Zoili sa tasina koreo. Arini kopu ni sari na lose tadi na qolo na siliva na poata na gua pa Zelepade.

23 Ta poni tinavete tugo sarini pu podo goredi koari Amaramu, Izihara, Heboroni, meke Uzieli.

24 Se Subaele sapu tututi mae guana koasa tuna e Mosese, sapu e Qerisoni, si na palabatu nomana pa kinopudi rina poata pa Zelepade. 25-26 Sari na turaṉana Subaele pa tuti te Elieza si guahe: e Selomiti sina tuna e Zikiri, sa tuna e Zoramu, sa tuna e Zesia, sa tuna e Rehabia, sa tuna e Elieza sa tasina e Qerisoni. E Selomiti meke sari turaṉana si na tie kopu koari doduru vinariponi sapu va madi lani Devita sa baṉara koe Tamasa. Arini tugo kopu ni sari na vinariponi tava madi la koe Tamasa tadi na palabatu koari na tatamana, meke sari na koimata pu kopu koari na pukuna keke tina, meke koari na pukuna keke gogoto, meke sari kaiqa koimata pule pa vinaripera. 27 Kaiqa rina likakalae ta vagidi pa vinaripera si tava madi la koasa tinuvakana sa Zelepade. 28 Na kopu ni e Selomiti meke sari na turaṉana sa sari doduru tiṉitoṉa sapu tava madi pude tavetavete ni pa Zelepade, gua tugo sari na vinariponi sapu vekoi sa poropita Samuela, e Saula sa baṉara, e Abanad sa tuna e Neri, meke e Zoabi sa tuna e Zeruia.

29 Koari na tie pa tuti te Izihara si ta vizata se Kenania meke sari na tuna pude taveti sari na kinubekubere, meke va toṉoti sari na vinari toketokei tadi na tie Izireli.

30 Koari na tie pa tuti te Heboroni si e Hasabia meke ari ka keke tina zuapa gogoto turaṉana, si kopu pa Izireli pa kali lodu rimata pa Ovuku Zodani. Arini kopu ni sari doduru tinavete te Zihova pa vinahesi, meke gua tugo sari na tinavete tanisa binaṉara. 31 E Zeria sina koimata pa butubutu te Heboroni. Koasa vina made ṉavulu puta vuahenina sa binaṉara te Devita, si viliti hata tie se Devita pa butubutu te Heboroni, meke ta dogoro sari na tie varipera ṉiṉiradi na bokabokadi pa tatamana asa pu korapa koa pa Zazera, pa popoa Qileadi. 32 Vizati sa baṉara Devita si karua tina zuapa gogoto koimata pa tatamana koari na turaṉana e Zeria sapu bokabokadi hola meke vekoi sa pa kali lodu rimata pa Ovuku Zodani koari na popoa te Rubeni, Qadi, meke sa kukuru butubutu te Manase pude kopu ni sari doduru vina tana sapu la gua koe Tamasa meke sapu la gua koasa vina tanana sa binaṉara.

<- 1 Koronikolo 251 Koronikolo 27 ->