5
Adam tititi-nonosi nara losa Noh
1-2 Leleꞌ Lamatualain naꞌadadadꞌiꞌ atahori, Ana tao mata nara, onaꞌ Eni mata na boe. Naꞌadadadꞌiꞌ se, touꞌ no inaꞌ. Ana noꞌe se, nae “atahori”, ma fee se papala-babꞌanggiꞌ.
Atahori fefeu na, nara na, Adam. Ia, Adam tititi-nonosi nara:
3 Adam too natun esa telu nulu ma, ana hambu ana touꞌ esa, mata na onaꞌ e boe. Ana babꞌae e, Set. 4 Basa ma, Adam feꞌe nasodꞌa too natun falu, de hambu seluꞌ ana touꞌ no inaꞌ fai. 5 Ana too natun sio telu nulu ma, ana mate.
6 Set too natun esa lima ma, ana hambu ana touꞌ esa, naran Enos. 7 Basa ma, Set feꞌe nasodꞌa too natun falu hitu, de hambu seluꞌ ana touꞌ ma inaꞌ fai. 8 Ana too natun sio sanahulu rua ma, ana mate.
9 Enos too sio nulu ma, ana hambu ana touꞌ esa, naran Kenan. 10 Basa ma, Enos feꞌe nasodꞌa losa too natun falu sanahulu lima, de hambu seluꞌ ana touꞌ ma inaꞌ fai. 11 Ana too natun sio lima ma, ana mate.
12 Kenan too hitu nulu ma, ana hambu ana touꞌ esa, naran Mahalalel. 13 Basa ma, Kenan feꞌe nasodꞌa losa too natun falu haa nulu, de hambu seluꞌ ana touꞌ ma inaꞌ fai. 14 Ana too natun sio sanahulu ma, ana mate.
15 Mahalalel too nee nulu lima ma, ana hambu ana touꞌ esa, naran Yared. 16 Basa ma, Mahalalel feꞌe nasodꞌa losa too natun falu telu nulu, de hambu seluꞌ ana touꞌ ma inaꞌ fai. 17 Ana too natun falu sio nulu lima ma, ana mate.
18 Yared too natun esa nee nulu rua ma, ana hambu ana touꞌ esa, naran Henok. 19 Basa ma Yared feꞌe nasodꞌa losa too natun falu, de hambu seluꞌ ana touꞌ ma inaꞌ fai. 20 Ana too natun sio nee nulu rua ma, ana mate.
21 Henok too nee nulu lima ma, ana hambu ana touꞌ esa, naran Metusalak. 22 Henok nasodꞌa ralaꞌ esa no Lamatualain losa too natun telu. De ana hambu seluꞌ ana touꞌ ma inaꞌ fai. 23-24 Ana nasodꞌa ralaꞌ esa nakandoo no Lamatualain. Ana too natun telu nee nulu lima ma, mopo e, huu Lamatualain soꞌu botiꞌ e.
25 Metusalak too natun esa falu nulu hitu ma, ana hambu ana touꞌ esa, naran Lamek. 26 Basa ma, Metusalak feꞌe nasodꞌa losa too natun hitu falu nulu rua, de hambu seluꞌ ana touꞌ ma inaꞌ fai. 27 Ana too natun sio nee nulu sio ma, ana mate.
28 Lamek too natun esa falu nulu rua ma, ana hambu ana touꞌ esa. 29 Ana nae, “Dei fo anaꞌ ia tao namahoꞌo hita rala nara, mia ue-taos sofeꞌ no doidꞌosoꞌ sia rae fo Lamatualain huku-dokiꞌ a.” De ana babꞌae e, Noh (lii na naeꞌ a onaꞌ dedꞌeat esa, sosoa na nae, ‘nendi nemehoꞌot’). 30 Basa ma, Lamek feꞌe nasodꞌa losa too natun lima sio nulu lima, de hambu seluꞌ ana touꞌ ma inaꞌ fai. 31 Ana too natun hitu, hitu nulu hitu ma, ana mate.
32 Noh too natun lima ma, ana hambu ana touꞌ telu ena, nara nara, Sem, Yafet ma Ham.*Ham, ana mana matea susu oeꞌ. Mete Dudꞌuit Fefeuꞌ a 9:24-25.
<- Dudꞌuit Fefeuꞌ a 4Dudꞌuit Fefeuꞌ a 6 ->- a Ham, ana mana matea susu oeꞌ. Mete Dudꞌuit Fefeuꞌ a 9:24-25.