Link to home pageLanguagesLink to all Bible versions on this site

Brabli Gudwan Song
Detlot Song Dubala Sing Wen Dubala Laigim Gija
Wal dijan buk garram detlot song weya wan gel en wan boi tok hau dei laigim gija detmatj. Samtaim det gel tok langa det boi en samtaim det boi tok langa det gel. Samtaim dubala tok langa najalot pipul.

1
Brabli Gudwan Song
1 Dijan na detlot brabli gudwan song blanga King Salaman. Im mowa gudwan langa ola najalot song.[a]
Feswan song
Det gel im sing.
2 Wal yu kiskisbat mi na.
Dumaji yu laigim mi detmatj,
im mowa switwan langa ebrijing.
3 Ebritaim yu kaman langa mi yu smel brabli gudwan.
Wen mi irrim yu neim mi jinggabat det brabli gudsmel blanga yu.
Ai sabi ol detlot najalot gel oldei wandimbat yu du.
 
4 Yu garra deigim mi na, en yunmi garra ranawei.
Yu garra jidan main king, en yu garra abum mi langa yu kemp.
Yunmi garra jidan hepiwan na,
en yunmi garra abumbat gudbala taim mijamet.
Dumaji ai sabi ol detlot najalot gel oldei wandimbat yu du.
 
5 Ol yumob gel brom Jerusalem, irrim mi na.
Mi blekwan, en mi brabli purdiwan.
Mi brabli blekwan wulijim detlot tent blanga detlot deset pipul,
en mi brabli purdiwan wulijim detlot ketin langa det haus blanga Salaman.
6 Nomo rabishim main kala.
Det san bin barnim mi en meigim mi brabli blekwan,
dumaji main braja olabat bin wail langa mi,
en deibin meigim mi adwek langa det greip fam,
en ai nomo bin abum taim blanga lukaftumbat miselp gudwei.
 
7 Wal yu dalim mi na, main olmen.
Wujei yu garra deigim detlot ship blanga fidimbat?
Wujei yu garra abum spel brom det hotwan san?
Ai nomo wandim lukabat yu ebriweya.
Ai wandim kaman streit langa yu.
Ai nomo wandim gaburrumap main feis garram heinggitjif,
dumaji det najalot stakmen mait luk langa mi.
 
Det men im sing.
8 Main purdiwan gel, yu bulurrum det ship trek,
en faindim gras blanga detlot gout blanga yu,
gulijap langa detlot tent blanga ola stakmen.
Deya na yu garra faindim mi.
9 Yu sabi langa Ijip dei pudum fetha en najalot ting blanga meigim ola hosis blanga det king purdiwan,
bat yu na, main olgamen, yu mowa brabli purdiwan.
10 Det heya blanga yu im brabli shainiwan,
en det nekben raidaran langa yu nek,
dubala meigim yu brabli purdiwan.
11 Ai garra meigim blanga yu golwan tjein garram loda purdiwan silbawan sheip langa det tjein.
 
Det gel im sing na.
12 Aibin jinggabat wen main king bin leidanbat saidwei,
det gudsmelwan medisin blanga main bin spredat ebriweya.
13 Jis laik detlot gudsmelwan purdiflawa jidan langa lilwan beig langa main nek,
wal main olmen leidanbat langa main tjes.
14 En im jis laik det gudsmelwan purdiflawa weya gro langa springwoda kantri.
 
Det men im sing na.
15 Yu luk brabli purdiwan, main olgamen,
en det dubala ai blanga yu brabli braitwan.
Dei shoum mi yu laigim mi brabliwei.
 
Det gel im sing na.
16 Wal main olmen, yu brabli purdiwan du.
Yu meigim mi brabli gudbinji.
Det grin gras garra jidan yunmi bed,
17 en detlot paintri olabat na det rufpat blanga yunmi,
en detlot bushis gibitbat yunmi sheid.

Brabli Gudwan Song 2 ->