73
God garra gibit ebribodi feyago
Song blanga Eisaf.
1 Trubala YAWEI im brabli gudbala langa ola Isreil pipul,
en langa detlot pipul hu jidan trubalawei langa im.
2 Bat aibin gulijap nomo bilib na, jis laik aibin gulijap buldan,
3 dumaji aibin jelas langa detlot praudbala en nogudbala pipul wen aibin oldei luk ebrijing bin oldei go gudwei blanga olabat.
4 Olabat nomo ardimbat olataim.
Olabat jidan strongbala en gudwei.
5 Olabat nomo abumbat detlot trabul laik najalot pipul abumbat.
6 Ebridei olabat jidan brabli praudbala,
en ebridei olabat oldei faitabat jis laik ebridei dei werrimon klos.
7 Brom insaid olabat adwan hat ol detlot nogudwan ting kamat,
en olabat oldei jinggabat nogudwan ting olataim.
8 Olabat oldei laflafbat en toktok nogudwei blanga pipul.
Dei jidan praudbala en dei oldei meigimbat plen blanga ardimbat najalot pipul.
9 Olabat tok nogudbalawei blanga YAWEI hu jidan deya langa hebin.
En olabat oldei bosobabat ebribodi iya langa graun,
10 en ola pipul blanga YAWEI bin bulurrum olabat,
en bilib wanim olabat bin tok.
11 Olabat oldei tok, “YAWEI det Haibalawan God nomo sabi enijing en im kaan faindat wanim wi dumbat.”
12 Lagijat na ola nogudbala pipul jidan.
Olabat oldei abum blendibala ting, en dei gedimbat mowa en mowa enijing weya dei oldei wandimbat.
13 Maitbi fo najing aibin kipum miselp klinbala en nomo bin dumbat ola nogudwan ting.
14 God, yubin meigim mi abumbat det pein oldei,
en ebri ailibala yubin oldei panishimbat mi.
15 If ai bina tok ola nogudbala ting, wal ai nomo bina jidan laik yu pipul olabat.
16 Aibin trai jinggabat blanga sabi ebrijing blanga ola gudbala pipul en ola brabli nogudbala pipul, bat najing. Imbin brabli adwan.
17 Bat wen aibin go langa yu Serramoni Pleis, deya na aibin sabi wanim garra hepin langa ol detlot brabli nogudbala pipul.
18 Yu na YAWEI garra meigim olabat buldan en olabat garra ol binijap.
19 Streidawei olabat garra binij. Olabat kaan dai gudwei.
20 Olabat jidan jis laiga drim weya gowei wen yu gidap ailibala. YAWEI wen yu gidap, olabat binij du, jis laik det drim.
21 Wen aibin oldei jinggabat ola nogud ting, en aibin oldei ardimbat,
22 aibin jidan brabli siliwan wulijim wailwan enimul.
Ai nomo bin sabi langa yu.
23 Bat stil aibin jidan gulijap langa yu,
en yu holdim main bingga.
24 Yu shoumbat mi wujei blanga go garram yu wed,
en bambai yu garra welkam mi deya weya yu jidan garram yu pawa en shainiwan lait.
25 YAWEI, oni yu na ai garram deya ontop langa hebin.
Dumaji ai garram yu, ai kaan wandim enijing langa dijan kantri na.
26 Maitbi main bodi en main garra jidan wikwan,
bat yu na God meigim mi jidan strongbala,
en oni yu na mi wandim olagijawan.
27 Ol detlot pipul hu gibit bekboun langa yu garra binijap.
Yu garra binijimap ol detlot hu nomo jidan trubalawei langa yu.
28 Bat im brabli gudwan blanga mi blanga jidan gulijap langa yu God.
Mi jidan seifwan garram yu, YAWEI det boswan God.