12
Dijan preya blanga albumbat ola pipul blanga God
Preya blanga Deibid.
1 Album melabat YAWEI!
Ola gudwan pipul ol gon na.
Tudei yu kaan faindim pipul lagijat enimo hu jidan trubalawei.
2 Detlot nogudbala pipul dalim gija laiya.
En wen dei tok gija blanga enijing dei bilib gija du.
3 YAWEI yu meigim jidan kwait detlot pipul hu oldei tok laiyawei.
Yu jadimap mawus blanga ol detlot pipul hu tok praudwei.
4 Dei oldei tok lagijat, “Wi gin gedim enijing wi wandim,
en wi gin tok blanga enijing wi wandim.
Wi nomo garram bos.”
5 YAWEI im tok lagijat, “Wal ai garra gidap na.
Ola powan pipul en najalot pipul abumbat adtaim brom nogudbala pipul.
Aibin lisin olabat jingat langa mi,
en ai garra album olabat na.”
6 Ola pramis blanga YAWEI jidan trubala en ola pipul gin trastim tharran na.
Detlot pramis jidan trubala, nomo garram eni rong,
jis laik det gol ston weya deibin barnim brabliwei garram hotwan faiya blanga meigim im kamat klinwan.
7-8 Nogudbala pipul jidan ebriweya,
en ebribodi tok gudwei blanga ola brabli nogudbalawei.
YAWEI, kipum melabat seifwan, en andimwei detkain nogudbala pipul brom melabat.
<- Ola Saam 11Ola Saam 13 ->