1 Wal dijan wed shoum ola neim blanga detlot pleis weya ola Isreil pipul bin kemp, afta wen olabat bin libum Ijip, wen Mosis en Eran bin jidan lida. 2 Mosis bin raidimdan neim blanga ebri pleis weya deibin pudumap kemp, dumaji YAWEI bin dalim Mosis.

3 Wal detlot Isreil pipul bin libum Ijip langa det namba 15 dei langa det feswan manth, det dei afta det feswan Pasoba. Wal YAWEI bin maindimbat olabat wen olabat bin libum det taun gulum Remasis, nomeda ola Ijip pipul bin lukinat olabat. 4 Detlot Ijip pipul bin berrim olabat feswan san weya YAWEI bin kilim ded. YAWEI bin dum dijan blanga shoum olabat im garram mowa pawa oba langa detlot drimin blanga Ijip.

5 Wal detlot Isreil pipul bin libum Remasis, en deibin kemp langa Sukoth. 6 Det neks kemp bin langa Itham, gulijap langa det deset kantri. 7 Brom deya olabat bin tenbek langa Paiyahairoth sanraisaid langa Beilsefan en olabat bin kemp gulijap langa Migdal. 8 Olabat bin libum Paiyahairoth en olabat bin go thru langa det solwoda gulum Redsi langa det Shuya deset, afta deibin wokabat thrideis en deibin kemp langa Mara. 9 Brom deya olabat bin go langa Ilim, en deya na deibin kemp langa det pleis weya bin abum 12 spring en 70 pamtri.

10 Afta na olabat bin libum Ilim en olabat bin kemp gulijap langa det solwoda gulum Redsi. 11 Det nekswan kemp bin langa det deset kantri gulum Sin, 12 en afta olabat bin kemp langa Dofka, 13 en brom deya langa Elash. 14 Olabat neks kemp bin langa Refadim, en deya na dei nomo bin abum eni woda blanga dringgim.

15-37 Wal olabat bin kipgon langa det wei brom Refadim raidap langa det hil gulum Hora en deibin kemp langa ol dislot pleis na. Deibin kemp deya langa det deset gulum Sainai, Kibrathataba, Heiseroth, Rithma, Rimanperes, Libna, Risa, Kehelatha, hil gulum Shefa, Herada, Makeloth, Teihath, Tera, Mithka, Hashmana, Mosarath, Benajakan, Horagidged, Jotbatha, Ebrona, Esiyangeba, Keidish, deya langa det deset gulum Sin, en bambai deibin kamat langa det hil gulum Hora, gulijap langa det kantri gulum Idam.

38-39 Wal wen YAWEI bin gibit oda, Eran det serramonimen bin galimap langa det hil gulum Hora. Imbin 123 yiya ol en imbin dai deya na, langa det feswan dei langa det namba 5 manth langa det namba 40 yiya afta detlot Isreil pipul bin libum Ijip.[a]

40 Wal det king brom Erad hubin jidan langa det sauthpat langa Keinan bin irrim ola Isreil pipul bin kaminap.[b]

41-49 Wal langa det wei brom det hil gulum Hora raidap langa det plein kantri blanga Moweb deibin kemp langa ol dislot pleis, deya langa Seilmana, Punon, Oboth, Ebarim, deya langa det kantri gulum Moweb, Diban Ged, Elmadiblathaiyim, detlot hil kantri gulum Ebarim gulijap langa det hil gulum Neibo raidap deibin kamat langa det plein kantri blanga Moweb, en deya na najasaid langa det Jodan Riba brom Jeriko deibin kemp brom Bethjeshimoth raidap langa Akeisha.

50 Orait, deya na langa det plein kantri blanga Moweb, najasaid langa det Jodan Riba brom Jeriko, YAWEI bin gibit langa Mosis 51 najawan wed blanga ola Isreil pipul, “Wen yu krosim det Jodan Riba en go langa det kantri gulum Keinan, 52 yumob garra andimwei ol detlot pipul hu jidan deya langa det kantri. Yu garra binijimap ola ston en aiyan drimin sheip, en ola pleis weya olabat oldei weshipbat. 53 Yumob garra teikoba det kantri en jidan deya, dumaji ai garra gibit langa yumob. 54 Yumob garra kadimat sambala kantri langa ola difrin klen en femili, en tharran na yumob garra yusum detlot speshalwan ston, en yumob garra gibit bigiswan kantri langa bigiswan klen, en lilwan kantri langa lilwan klen.[c] 55 Bat if yumob nomo andimwei detlot pipul hu oldei jidan deya langa det kantri, wal olabat garra meigim trabul rait deya langa yumob, en olabat garra fait langa yumob igin. 56 If yumob nomo andimwei olabat, wal ai lafta binijimap yumob seimwei laik wen aibin jinggabat blanga binijimap detlot najalot pipul.” Lagijat na YAWEI bin tok.

<- Nambas 32Nambas 34 ->