Link to home pageLanguagesLink to all Bible versions on this site

Leminteishans
Brabli Soriwan Song Blanga Jerusalem
Wal wanbala speshalwan mesinja bin raidimdan ol dislot brabli soriwan song blanga det bigwan taun gulum Jerusalem. Detlot Isreil pipul bin reken Jerusalem garra oldei jidan gudwei, dumaji God bin oldei jidan deya langa det Serramoni Pleis. Bat detlot pipul bin brabli nogudbala en deibin gibit bekboun langa God, en imbin larram detlot enami brom Bebalon bidim olabat en binijimap Jerusalem en det Serramoni Pleis. Det speshalwan mesinja bin sabi haumatj trabul deibin abum. Imbin brabli nogudbinji bat imbin oldei trastimbat God. Imbin sabi if detlot pipul libum olabat nogudbalawei en tenbek langa God, wal God garra jidan gudbinji en kain langa olabat igin.

1
Jerusalem im jidan soriwan
1 Det speshalwan mesinja im tok,
“Wal Jerusalem bin abum detmatj pipul basdam,
bat tudei im nomo garram enijing na, najing.
Wantaim imbin brabli haibala langa dijan wel,
bat tudei na im jidan jis laiga wido olgamen.
En det taun bin jidan brabli gudwan taun,
bat tudei im oldei jidan jis laiga prisana na.
2 Ebrinait im oldei kraikraibat, nomo abum spel.
Nomo eni fren brom najawan kantri bin kaman en meigim im jidan strongbala, najing,
dumaji deibin jidan enami blanga im.
 
3 “Detlot Juda pipul bin oldei jidan prisana en detmob bin tridimbat olabat adbalawei,
Olabat enamimob bin deigim olabat langa najawan pleis blanga wekwekbat.
Deibin oldei jidan langa najawan kantri, dumaji olabat nomo bin abum ronwan kantri.
Bigismob enami bin deya en dei nomo bin larram olabat ranawei.
4 Wal nobodi kaman langa det Serramoni Pleis na en weshipbat ebri seikridwan dei.
Detlot roud langa Jerusalem jidan emtiwan,
en nobodi nomo oldei gowei brom det taun en nobodi kaman deya, najing.
Ol detlot gel hubin oldei singsingbat, olabat garram brabli nogudwan trabul,
en detlot serramonimen kraikraibat du.
5 Detlot enami bin binijimap det taun en olabat jidan brabli boswan langa det taun.
YAWEI det trubala God bin panishim detlot Isreil pipul brom dumbat nogudbalawei,
en deibin deigidawei ola biginini blanga olabat.
6 Ola brabli purdibala ting langa det taun Jerusalem, deibin binij na.
Detlot boswan blanga det taun jidan jis laik detlot enimul weya detlot hanta oldei ranimapbat olabat ebriweya.
Dei nomo garram seifwan pleis blanga abum spel.
7 Jerusalem im oldei jidan miselp kantri,
en ola pipul deya oldei jinggabat det gudwan laif weya deibin oldei abumbat bifo.
Wen loda enami bin kaman nobodi bin deya blanga album olabat.
Detlot hubin bidim olabat bin oldei laflafbat langa olabat.
 
8 “Jerusalem im nomo haibala. Im najing na.
Im jis laiga gel weya jidan neigidbala dumaji imbin dum brabli nogudbala ting,
en detlot najalot pipul oldei mokimbat im.
Im brabli nogudbinji en im oldei haidim miselp feis, dumaji im oldei sheim miselp.
Jerusalem im jidan jis laik im brabli dardiwan,
dumaji detlot pipul deya bin dumbat loda nogudbala ting bifo.
 
9 “Basdam detlot pipul langa Jerusalem bin dumbat nogudbala ting,
bat dei nomo bin wori blanga tharran,
en wanim garra hepin langa olabat.
En wen detlot enamimob bin kaman en bidim olabat brabliwei, deibin jidan brabli nogudbalawei.
Nobodi kaan album olabat.
Detlot enami bin bidim olabat,
en tudei olabat oldei jingat langa YAWEI,
‘Album melabat, dumaji melabat garram detmatj trabul.’
10 Wal detlot enami bin pulumat ola brabli gudwan ting blanga Jerusalem.
Detlot Isreil pipul bin luk olabat bin gowin langa det Serramoni Pleis weya YAWEI nomo larram pipul brom najalot kantri gowin.
11 Blanga im pipul olabat oldei kraikraibat wen dei lukabat blanga daga.
Dei oldei gajimbat olabat ronwan purdiwan gol en enijing blanga selimbat blanga gajim mowa daga blanga meigim olabat jidan laibala.”
Lagijat na det speshalwan mesinja bin tok.
 
Jerusalem im jingat langa YAWEI,
“YAWEI, yu luk langa mi dumaji mi oldei jidan brabli nogudbinji.
12 Mi oldei jingat langa enibodi bat nobodi jinggabat langa mi.
Mi tok, ‘Yumob luk langa mi!’
Nobodi nomo bin brabli nogudbinji laik mi.
Wal det trabul na YAWEI bin gibit langa mi
wen imbin brabli gitwail langa mi.
13 Im jis laik YAWEI bin jandim faiya brom ontop,
en det faiya bin barnimap ol main boun insaid langa mi.
En im jis laik imbin trepam langa mi laiga enimul en aibin buldan langa graun,
en imbin jis libum mi deya en aibin abum detmatj pein.
14 En im jis laik imbin taiyimap ol detlot nogudbala ting weya aibin dumbat langa main nek en aibin go brabli wikwan na, nomo garram eni munda.
En main bos bin hendimoba mi langa main strongwan enamimob hubin bidim mi.
15 Main bos nomo bin teiknodis langa ol main brabli strongbala soljamob.
Imbin jandim ami blanga binijimap ol main boi.
En imbin smeshimap main pipul olabat laik ola greip daga weya dei oldei meigim wain.
16 Blanga dijan na mi nogudbinji en mi oldei krai detmatj.
Nobodi kaan stapam mi dijan, en nobodi kaan dalim mi wanim blanga dum.
Wal detlot enami bin bidim mi, en main pipul olabat nomo garram enijing na.”
Lagijat na Jerusalem bin tok.
 
17 Det speshalwan mesinja im tok na,
“Jerusalem oldei jingat garram im bingga langa najalot pipul blanga album im, bat nobodi nomo oldei album im.
Wal YAWEI im jingat langa detlot pipul hu jidan langa gulijap kantri langa im en olabat bin kaman en fait langa im.
Dei tridimbat im brabli nogudbalawei wulijim dardiwan reig.”
Lagijat na det speshalwan mesinja bin tok.
 
18 Jerusalem bin tok na,
“YAWEI det trubala God bin rait, dumaji aibin gibit bekboun langa im en mi nomo bin dum wanim imbin wandim mi blanga dum.
Yumob pipul ebriweya, yumob irrim mi basdam.
Mi jidanbat brabli soribala detmatj.
Main enamimob bin deigidawei prisana ol main boi en gel.
19 Aibin oldei jingat adbala langa main frenmob, bat olabat nomo bin wandim album mi.
Detlot serramonimen en lidamob, deibin daidaibat langa detlot roud wen deibin lukabatbat blanga daga langa det taun blanga jidan laibala.
20 YAWEI, yu lukdan langa mi dumaji mi garram detmatj trabul en mi nomo gudbinji. Mi brabli nogudbinji.
Mi wori miselp dumaji aibin dum ola nogudbala ting langa yu.
Langa ebri roud main pipul olabat deibin binijap wen detlot enamimob bin kilimbat olabat.
En langa ebri kemp main pipul olabat binijap dumaji olabat nomo garram daga.
21 YAWEI, yu irrim mi na.
Mi jidan brabli nogudbinji, en nobodi nomo wandim album mi.
Ol main enamimob bin gudbinji blanga ol detlot trabul weya yubin bringimap langa mi.
Yu kaman kwikbala en panishim ol dislot enamimob laik yubin pramis langa mi.
22 YAWEI, yu luk langa olabat nogudbalawei.
Yu panishim olabat laik yubin panishim mi blanga main nogudbalawei.
Mi krai binji detmatj dumaji mi brabli nogudbinji.”
Lagijat na Jerusalem bin tok.

Leminteishans 2 ->