1 Wal YAWEI det trubala God bin kipgon tok, “Det taim na ai garra gibitbek ola gudbala ting langa main pipul olabat deya langa Jerusalem en Juda. 2 En ai garra majurrumap ola najalot pipul brom ebri kantri du, en ai garra deigim olabat langa det pleis gulum Jadjim Beli, en deya na ai garra jadjim olabat blanga ol detlot nogudbala ting weya deibin dumbat langa main pipul olabat.

“Detlot najalot pipul bin deigidawei main pipul olabat ebriweya langa ebri kantri. En nomeda det kantri weya main pipul olabat bin jidan im blanga mi, bat stil detlot pipul bin kadimat miselp detlot len main. 3 En deibin gembuling blanga hu garra gajim detlot pipul main. En wen deibin wandi silipsilipbat garram enibodi, dei nomo bin oldei peiyim det gel garram mani. Deibin oldei peiyim im detlot lilboi main weya deibin deigidawei brom main kantri. En wen deibin wandim wain blanga dringgimbat, dei nomo bin oldei baiyim det wain garram mani. Deibin oldei baiyim det wain garram detlot lilgel main weya deibin deigidawei brom main kantri.

4 “Wal ol yumob pipul deya langa det dubala taun gulum Taya en Saidan en langa det kantri gulum Filastain, wotfo yumob dum det nogudbala ting lagijat langa mi? Maitbi yumob trai peiyimbek langa mi blanga samting weya aibin dum langa yumob.

“If yumob trai peiyimbek langa mi, wal ai garra peiyimbek langa yumob streidawei, 5 dumaji yumob na bin deigidawei ola silba en gol en gudwan ting blanga mi blanga pudum langa yumob ron serramoni pleis. 6 En yumob na bin deigidawei main pipul olabat brom Jerusalem en Juda, en yumob bin selim olabat langa detlot Grik pipul hubin deigidawei olabat langa ola longweiwan kantri.

7 “Wal ai garra bringimbek main pipul olabat brom ol detlot kantri weya yumob bin selim olabat, en ai garra dum langa yumob seimwei laik yumob bin dum langa olabat. 8 Ai garra larram najalot pipul deigidawei yumob biginini olabat en selim olabat langa ola pipul langa Juda, en ola Juda pipul garra selim olabat langa detlot brabli longweiwan kantri weya ola Sabiyan pipul jidan. Trubala im garra hepin lagijat, dumaji mi na YAWEI bin tok.✡Aisai 14:29-31; 23:1-18; Jera 47:1-7; Isik 25:15—28:26; Eimos 1:6-10; Sef 2:4-7; Sek 9:1-7; Meth 11:21,22; Luk 10:13,14

9 “Wal yumob garra jingat langa ola pipul langa ebri kantri, en yumob garra dalim olabat lagijat, Yumob meigim miselp redi blanga fait. Yumob jingat langa ola solja blanga yumob na, en yumob majurrumap olabat en kaman. 10 En yumob gajim ol detlot ho weya yumob yusum blanga wek langa yumob gadin, en yumob meigim bigwan naif brom detlot ho. En yumob gajim ol detlot longwan huk weya yumob yusum blanga wek langa yumob gadin, en yumob meigim spiya brom detlot huk. Yumob garra meigim bigmob bigwan naif en spiya, dumaji ebribodi garra joinin langa det fait. Larram detlot wikwan pipul tok, ‘Nomeda melabat wikwan, bat stil melabat garra joinin langa det fait.’✡Aisai 2:4; Maika 4:3 11 Kwikbala na ol yumob pipul brom ebri kantri, yumob kaman en majurrumap miselp deya na langa det pleis gulum Jadjim Beli. Wal YAWEI yu jandim yu solja olabat blanga fait blanga melabat.

12 “Ola pipul langa ol detlot kantri garra meigim miselp redi, en dei garra majurrumap miselp deya langa Jadjim Beli, 13 en deya na ai garra jadjim olabat, dumaji olabat brabli nogudbala.

“Wal main solja olabat garra binijimap detlot nogudbala pipul jis laik weya pipul kadimdan detlot sid daga weya im kukwan, en dei garra binijimap olabat jis laik weya pipul skwisimap detlot kukwan greiptri daga blanga meigim jus. Main solja olabat garra dum lagijat langa olabat raidap dei binijimap olabat brabliwei.✡Reb 14:14-16,19,20; 19:15

14 “Wal milyans en milyans jandapbat deya langa Jadjim Beli, dumaji det dei weya ai garra jadjim olabat im gulijap na. 15 En langa det dei det san en det mun garra go dakbala, en ola sta kaan lait enimo na.” Lagijat na YAWEI bin tok.

16 Wal det taim na YAWEI garra jingat brabli adbala brom det hil gulum Saiyan. Im garra jingat jis laiga thanda brom Jerusalem, en det graun en det skai garra sheiksheik. Bat God garra maindimbat im pipul olabat en lukaftumbat olabat wen det ting garra hepin.✡Eimos 1:2

17 Wal God bin tok langa im pipul olabat, “Det taim na yumob garra sabi mi na YAWEI det trubala God blanga yumob. En yumob garra sabi mi jidan iya langa dis seikridwan hil gulum Saiyan. En dis taun Jerusalem garra jidan brabli seikridwan taun, en nobodi brom longweiwan kantri kaan kaman en fait iya enimo.

18 “Wal det taim na yumob garra faindim detmatj daga langa ola hil. En detmatj buligi garra wokabat ebriweya langa det kantri du. En ola krik ebriweya langa Juda garra abum loda woda. En wanbala riba garra kamat brom main Serramoni Pleis, en det riba garra wodarim det pleis gulum Akeisha Beli.

19 “Bat im nomo lagijat langa det dubala kantri gulum Ijip en Idam. Det dubala kantri na garra go brabli draiwan jis laiga deset kantri en jidan nomo garram pipul, dumaji detlot pipul bin kaman en fait langa ola pipul iya langa Juda, en deibin weistim loda blad blanga detlot Juda pipul hu nomo bin dum enijing langa olabat.

20-21 “Wal ai garra peiyimbek olabat blanga det blad. Ai kaan larramgo olabat fri brom det nogudbala ting weya deibin dum langa main pipul olabat. Bat Juda en Jerusalem garra jidan garram detmatj pipul olagijawan. En mi na YAWEI garra jidan deya na ontop langa det seikridwan hil gulum Saiyan.” Lagijat na YAWEI bin tok.

Binij na.

<- Jowal 2