1 Wal Job bin kipgon tok, “Wotfo laif im brabli adwan? Wotfo wi ardimbat detmatj? 2 Wi dumbat adwek jis laik prisana en wandim det dei blanga binij, dumaji wi oldei nokap, en wi wandim det pei dei blanga kaman kwikbala, jis laik detlot wekinmen. 3 God bin meigim det dei go slobala, en imbin meigim det naitaim nogudwan. 4 Mi oldei prei blanga det naitaim garra binij, bat im jidan longwan en mi oldei tenimranbat miselp olnait. 5 Blanga main draiwan bodi, im jidan garram wem en dardiwan garram bigismob sowa oloba. 6 Aibin reken ai garra jidan longtaim bat main laif im go kwikbala na, jis laik sambodi tjakam spiya kwikbala.”

7 Wal Job bin kipgon tok, “Mi jinginat langa yu God. Yu nomo foget main laif im oni shotwan. En oni det trabul im deya lida langa mi. 8 Wal ai garra binijap na, en God, yu kaan luk langa mi igin. 9 Ai garra dai en ai kaan neba kambek. Ai garra gowei wulijim det klaud wen det win oldei blowimwei. 10 Ai kaan neba kambek langa main pleis igin. En ebribodi garra fogedabat mi.

11 “Blanga tharran na ai kaan jis jidanbat kwaitbala. Ai garra lafta tok, dumaji mi brabli einggri en mi ardimbat nomo lilbit. 12 Wotfo yubin taiyimap mi jis laiga prisana? Yu reken mi jidan wulijim det solwoda o bigwan solwoda enimul? 13 Ai trai blanga abum gudbala silip, 14 bat yu oldei gibitbat mi olkain nogudwan drim. 15-16 Ai lafta jugum miselp garram roup en nomo jidanbat garram dijan bodi. Yu libum mi na, en larram mi dai. Main laif im najing na. 17 Wanim meigim yu jinggabat blanga melabat?[a] 18 Wotfo yu oldei testimbat melabat brom wen det san oldei gidap raidap wen det san oldei godan? 19 Wotfo yu kaan luk najawei basdam wulijim ai gin silip gudwei? 20 Wotfo yu wotjimbat melabat oldei? If mi dum nogudbala ting, aibin ardimbat yu? Wotfo yu tjakambat spiya langa mi? Yu reken mi hebiwan loud blanga yu? 21 Wotfo yu kaan larramgo mi fri brom main nogudbalawei? Yu kaan faindim mi dregli, dumaji mi garra dai na.” Lagijat na Job bin tok.

<- Job 6Job 8 ->