Bambai na Reitjul bin tok langa Jeikob, “Wotfo yu nomo bin gibit beibi langa mi? Mobeda mi dai na.”

2 Wal Jeikob bin gitwail langa Reitjul, en imbin tok, “Mi nomo God! Im na bin meigim yu jidan weya yu kaan abum beibi. Nomo mi.”

3 Wal Reitjul bin tok, “Wal iya main wekingel Bila. Yu silip garram im, en im gin abum beibi blanga mi. Oni lagijat na ai garra abum beibi.”

4 Brom deya Reitjul bin gibit Bila langa Jeikob, en dubala bin silip, 5 en bambai Bila bin abum lilboi blanga Jeikob, 6 en Reitjul bin tok, “God bin lisin langa mi. Imbin gudbinji langa mi wen aibin tok langa im, en imbin gibit mi lilboi.” En Reitjul bin gulum neim blanga det lilboi Den.

7 Brom deya Bila en Jeikob bin silip gija igin, en bambai imbin abum najawan lilboi, 8 en Reitjul bin tok, “Aibin abum bigis fait garram main sista. Bat aibin win na.” En imbin gulum neim blanga det lilboi Neftali.

9 Afta na wen Liya bin faindat im kaan abum enimo beibi, imbin gibit langa Jeikob det wekingel blanga im neim Silpa, 10 en wen dubala Jeikob bin silip, bambai na Silpa bin abum lilboi blanga Jeikob, 11 en Liya bin tok, “Mi gudbinji dumaji ai garram lilboi en im neim Ged.” [a]

12 Brom deya Silpa en Jeikob bin silip igin, en bambai imbin abum najawan lilboi, 13 en Liya bin tok, “Mi brabli gudbinji. En ola olgamen garra gulum mi hepiwan.” En imbin gulum neim blanga det lilboi Esha.

14 Brom deya wen imbin taim blanga gajimbat ola sid daga brom ola wit pedik, Rubin bin go langa det pedik, en imbin faindim sambala bush medisin, en imbin deigimbek det bush medisin langa im mami Liya.

Wal Reitjul bin askim Liya blanga gibit im det bush medisin weya det boi bin faindim. 15 Bat Liya bin tok, “Yubin deigidawei main hasbin, en tudei yu wandi trai en deigidawei det bush medisin blanga main lilboi.”

Wal Reitjul bin tok, “If yu gibit mi det bush medisin, wal ai larram yu silip garram Jeikob tunait.” En Liya bin agri langa im, en imbin gibit im det bush medisin.

16 Bambai na wen Jeikob bin kambek brom detlot pedik lilbit leitbala, Liya bin go en imbin midim im hafwei, en imbin dalim im, “Yu garra silip garram mi tunait, dumaji aibin pei blanga yu garram det bush medisin weya main boi bin faindim.”

Wal Jeikob bin silip garram Liya, 17 en bambai Liya bin abum najawan lilboi blanga Jeikob, dumaji God bin lisin langa Liya wen imbin prei langa im. 18 En Liya bin tok, “God bin gibit langa mi dijan lilboi, dumaji aibin gibit main wekingel langa main hasbin.” En imbin gulum neim blanga det lilboi Isaka.

19 Brom deya Liya bin silip garram Jeikob igin, en imbin abum najawan lilboi blanga im, 20 en Liya bin tok, “God bin gibit mi gudwan presen. Main hasbin garra lukbek langa mi olataim, dumaji aibin abum siksbala lilboi blanga im.” En imbin gulum neim blanga det lilboi Sebyulan.

21 Afta na Liya bin abum lilgel, en imbin gulum neim blanga det lilgel Daina.

22 Wal God nomo bin fogedabat Reitjul. Imbin lisin langa im du wen Reitjul bin prei langa im blanga det trabul weya im kaan abum beibi. 23 En bambai na imbin abum lilboi blanga Jeikob, en Reitjul bin tok, “God bin deigidawei det bigsheim brom mi, 24 en imbin gibit mi lilboi.” En imbin gulum det lilboi neim Josef.

25-26 Afta na wen Reitjul bin abum det lilboi Josef, Jeikob bin tok langa Leiban, “Aibin wek brabli adbala blanga yu. En yu garra larram mi gobek langa main ron kantri garram main biginini olabat en main waif olabat na, dumaji blanga olabat na aibin wek blanga yu.”

27 Wal Leiban bin tok, “Yu lisin langa mi na. Aibin luk speshalwan ting deya, en det ting bin shoum mi YAWEI det trubala God im oldei gud langa mi wen yu jidanbat garram mi. 28 Wal yu garra kipgon jidanbat garram mi. Yu dalim mi haumatj mani yu wandim, en ai gibit yu if yu kipgon stap iya langa mi.”

29 Wal Jeikob bin tok, “Yu sabi aibin wek blanga yu brabli longtaim, en yu sabi ola enimul blanga yu bin bridap detmatj weya aibin maindimbat olabat. 30 Bifo aibin kaman langa yu, yubin jidan garram najing, en tudei YAWEI bin gud langa yu, dumaji aibin wek blanga yu. Bat tudei na ai garra gobek en wek blanga main ronwan femili.”

31 Wal Leiban bin tok, “Wanim yu wandim mi blanga gibit langa yu?”

En Jeikob bin tok, “Ai nomo wandim mani brom yu. Bat ai garra kipgon jidanbat en maindimbat ola enimul blanga yu. 32 Ai garra lukaftumbat olabat blanga yu if yu larram mi go thru langa olabat en kadimat ola spadidwan nenigout en ola spadidwan biligout en ola blekwan ship. Yu garra gibit mi detlot enimul na blanga peiyim mi blanga wek blanga yu. 33 En bambai wen yu luk ola spadidwan main, yu garra sabi aibin dum trubalawei langa yu. Bat if yu faindim eni klinwan nenigout en biligout en eni waitwan ship, wal yu garra sabi aibin stilim olabat brom yu.”

34 Wal Leiban bin tok, “Orait. Im gud.” 35 Bat det seim dei weya dubala bin meigim det pramis, Leiban bin deigimwei ola spadidwan en straipiwan biligout en ola spadidwan en waitwan nenigout en ola blekwan ship du. Imbin pudum ola san blanga im bos blanga detlot enimul olabat, 36 en imbin deigidawei olabat longwei brom Jeikob, en deibin trebulin garram detlot enimul thrideistaim.

Wal Jeikob bin stapbek, en imbin lukaftumbat ol detlot najalot enimul weya Leiban bin libum biyain, 37 en Jeikob bin gajim sambala grinwan stik brom thribala tri gulum paplatri, amantri en pleintri, en afta imbin deigimat sambala bak brom detlot stik, en detlot stik bin abum detlot mak garram straipstraip, 38 en Jeikob bin pudum detlot straipiwan stik lida langa det woda trof, dumaji deya na ola enimul bin oldei bridabat wen deibin dringgimbat woda, 39 en wen deibin bridabat lida langa detlot straipiwan stik, bambai na detlot nenigout en ship bin abum straipiwan en spadidwan beibi.

40 Wal Jeikob bin kipum detlot ship en gout olabat langa dubala difrinwan mob, en imbin meigim olabat luk langa ola spadidwan en blekwan enimul blanga Leiban, en blanga tharran na olabat bin bridap detmatj blanga Jeikob.

Wal Jeikob bin stil maindimbat sambala enimul blanga Leiban. Bat imbin kadimat ol detlot enimul blanga im, en imbin kipum olabat brom ol detlot enimul blanga Leiban.

41 Bambai najawan taim wen detlot strongbala enimul bin bridabat wansaid langa det woda trof, Jeikob bin meigim jandap lida langa olabat igin detlot straipiwan stik blanga meigim olabat bridimap bigmob straipiwan en spadidwan beibi igin. 42 Bat im nomo bin pudum detlot straipiwan stik lida langa detlot wikwan enimul. En bambai na Leiban bin abum ola wikwan enimul, en Jeikob bin abum ola strongwan.

43 Wal lagijat na Jeikob bin meigim miselp jidan brabli ritjmen, en imbin abum bigismob ship en gout en kemul en dongki en wekinmen en wekingel olabat hubin jidan jis laiga prisana.

<- Jenasis 29Jenasis 31 ->