Esra

Detlot Juwish Pipul Bin Gobek Langa Jerusalem En Bin Bildimbek Det Serramoni Pleis

Wal dijan stori im blanga King Sairas en hau imbin larram ola Juda pipul gobek langa Jerusalem brom Bebalon. En Esra hubin wanbala serramonimen, bin dalim detlot pipul wen deibin gobek langa Jerusalem blanga bildimbek igin det Serramoni Pleis blanga God, en blanga libum olabat nogudbalawei en bulurrum God. Dijan stori im blanga det seimtaim wen Niyamaiya bin jidan.

1 Wal YAWEI det trubala God bin meigim hepin trubala det wed weya imbin pramisim longtaim langa det speshalwan mesinja blanga im neim Jeramaiya, langa det feswan yiya weya Sairas bin jidan king blanga det kantri gulum Pesha. Imbin gibit det filing langa King Sairas blanga raidimdan oda blanga jandimat det oda ebriweya langa ola pipul langa det kantri weya King Sairas bin jidan bos.[a]

2 “Dijan na det oda weya Sairas det king blanga det kantri gulum Pesha bin gibit.

“ ‘YAWEI det trubala boswan God weya jidan langa hebin bin meigim mi jidan haibala bos langa ola kantri langa dijan wel en imbin dalim mi blanga bildimbek igin det Serramoni Pleis blanga im langa Jerusalem deya langa Juda.[b] 3 God garra jidan garram yumob, im pipul olabat. Yumob garra gobek langa Jerusalem weya yumob oldei weship langa YAWEI det boswan God blanga ol yumob Isreil pipul, en deya na yumob garra bildimbek igin det Serramoni Pleis blanga im. 4 Ol detlot pipul hu stap iya langa Bebalon garra album detlot pipul hu gobek langa Jerusalem. Dei garra gibit olabat silba en gol en daga en enimulmob blanga garrimap ola daga, en dei garra gibit ola ofring langa God blanga det Serramoni Pleis.’ ”

5 Afta ola boswan blanga ola femili blanga det Juda klen en det Benjamin klen en ola serramonimen en ola Libai pipul en detlot pipul weya God bin pikimat bin meigim miselp redi blanga go en bildimap det serramoni pleis blanga YAWEI det boswan God deya langa Jerusalem. 6 Ola kantrimen bin gibit olabat loda enijing. Deibin gibit olabat silbawan enijing, gol, daga, enimul blanga garrimap ola enijing en blanga yusum blanga ola serramoni, en najalot gudwan enijing en ofring blanga det Serramoni Pleis.

7 Wal King Sairas bin gibitbek langa olabat detlot dish en kap weya King Nebakanesa bin deigidawei brom det Serramoni Pleis langa Jerusalem en imbin pudum detlot enijing langa det serramoni pleis blanga im drimin olabat. 8 King Sairas bin gibit detlot enijing langa det men neim Mithradath hubin det boswan blanga ola mani blanga det king, en imbin raidimdan detlot enijing neim langa peipa blanga Sheshbasa det boswan blanga det kantri gulum Juda. 9-10 Dislot na imbin raidimdan, 30 golwan dish blanga ola ofring, 1,000 silbawan dish blanga ola ofring, 29 najalot dish, 30 lilwan golwan dish, 410 lilwan silbawan dish en 1,000 najalot enijing weya deibin yusum langa det serramoni pleis. 11 Holot blanga ol detlot enijing deibin abum 5,400 golwan en silbawan dish en najalot enijing weya Sheshbasa bin deigidawei wen im en detlot pipul hubin jidan prisana langa Bebalon bin gowei brom deya en bin go langa Jerusalem.

Esra 2 ->