1 Wal wen Mosis bin jandap mijamet garram ola boswan langa Isreil, imbin tok langa detlot Isreil pipul, “Yumob garra dum ol detlot ting weya ai dalim yumob tudei. 2-4 Yumob garra krosim det Jodan Riba en kamat langa det kantri weya YAWEI det trubala God blanga wi garra gibit yumob, en weya YAWEI bin pramisim wi grengrenfathamob. En det kantri en det graun im brabli gudwan blanga growimap olkain daga. En deya na sangodansaid langa det Jodan Riba, yumob garra meigim jandap sambala bigwan ston langa det hil gulum Ibal en yumob garra rabum olabat garram waitwan klei en raidimdan langa olabat ol detlot lowa weya aibin titjimbat yumob. 5 En yumob garra bildimap teibul blanga ofring garram ston. Yumob nomo kadim garram aiyanwan enijing, 6 dumaji eni teibul blanga ofring yumob bildimap blanga YAWEI, yumob nomo lau yusum enijing blanga kadim detlot ston. En deya na yumob garra gibit barnapwan sekrifais ofring, 7 en yumob garra sekrifais en dagat det feloship ofring en gibit theingks langa YAWEI. 8 En langa detlot ston yumob bin rabum garram klei, yumob garra raidimdan gudwei ebri wed blanga God lowa.” Lagijat na Mosis bin tok.[a]

9 Afta na Mosis bin deya mijamet garram detlot Libai serramonimen, en imbin tok langa detlot Isreil pipul, “Yumob Isreil pipul, yumob lisin langa mi. Tudei na, yumob jidan pipul blanga YAWEI det trubala God blanga wi, 10 en yumob garra teiknodis en duwit langa im en kipum ol detlot lowa weya aibin dalimbat yumob tudei.” Lagijat na Mosis bin tok.

11 Wal Mosis bin kipgon tok, 12 “Afta wen yumob krosim det Jodan Riba ola pipul brom Simiyan, Libai, Juda, Isaka, Josef en Benjamin klen garra jandapbat langa det hil gulum Gerisim, en olabat garra tok langa ola pipul hau YAWEI garra lukaftumbat en albumbat olabat.[b] 13 En ola pipul brom Rubin, Ged, Esha, Sebyulan, Den en Neftali klen garra jandap langa det hil gulum Ibal, 14 en detlot Libai serramonimen garra tok adbala ol dislot wed blanga panishmen langa detlot Isreil pipul.

15 “Dei garra tok, ‘Wal YAWEI garra panishim enibodi hu meigim drimin sheip brom ston, wud, o aiyan en weshipbat tharran snikibalawei, dumaji YAWEI nomo laigim detlot pipul hu dum detlot ting.’

“En ola pipul garra tok, ‘Yuwai! Trubala dijan im tok!’ [c]

16 “ ‘Wal YAWEI garra panishim enibodi hu nomo rispek en teiknodis langa im dedi o mami.’

“En ola pipul garra tok, ‘Yuwai! Trubala dijan im tok!’ [d]

17 “ ‘Wal YAWEI garra panishim enibodi hu mubumbat eni ston blanga det bandri lain blanga yumob kantrimen.’

“En ola pipul garra tok, ‘Yuwai! Trubala dijan im tok!’ [e]

18 “ ‘Wal YAWEI garra panishim enibodi hu lidimbat sambodi hu jidan blainwan langa det rong roud.’

“En ola pipul garra tok, ‘Yuwai! Trubala dijan im tok!’ [f]

19 “ ‘Wal YAWEI garra panishim enibodi hu nomo gibit feyago langa detlot pipul brom najawan kantri, o detlot biginini hu nomo garram dedi o mami, o detlot widogel.’

“En ola pipul garra tok, ‘Yuwai! Trubala dijan im tok!’ [g]

20 “ ‘Wal YAWEI garra panishim enibodi san wen im silipsilipbat garram eni waif blanga im dedi. Tharran na garra meigim im dedi sheim!’

“En ola pipul garra tok, ‘Yuwai! Trubala dijan im tok!’ [h]

21 “ ‘Wal YAWEI garra panishim enibodi hu silipsilipbat garram eni enimul.’

“En ola pipul garra tok, ‘Yuwai! Trubala dijan im tok!’ [i]

22 “ ‘Wal YAWEI garra panishim enibodi hu silipsilipbat garram im sista o im haf sista.’

“En ola pipul garra tok, ‘Yuwai! Trubala dijan im tok!’[j]

23 “ ‘Wal YAWEI garra panishim enibodi hu silipsilipbat garram det mami blanga im ronwan waif.’

“En ola pipul garra tok, ‘Yuwai! Trubala dijan im tok!’[k]

24 “ ‘Wal YAWEI garra panishim enibodi hu medrimbat sambodi sigridbalawei.’

“En ola pipul garra tok, ‘Yuwai! Trubala dijan im tok!’

25 “ ‘Wal YAWEI garra panishim enibodi hu deigim eni mani blanga medrimbat sambodi hu nomo bin dum enijing rong.’

“En ola pipul garra tok, ‘Yuwai! Trubala dijan im tok!’

26 “ ‘Wal YAWEI garra panishim enibodi hu nomo dum wanim imbin tok langa im lowa en wanim imbin titjimbat olabat.’

“En ola pipul garra tok, ‘Yuwai! Trubala dijan im tok!’ ”[l]

<- Dyudaranami 26Dyudaranami 28 ->