1-3 En det men neim Sol bin gudbinji weya deibin kilim im ded.

Wal streidawei afta wen Stibin bin dai, ol detlot bilibamob deya langa Jerusalem bin stat abumbat brabli adtaim, dumaji Sol bin trai en stapam olabat blanga kipgon bulurrumbat Jisas. Imbin oldei go langa ebri haus blanga lukabat enibodi hubin bulurrum Jisas, en wen imbin faindim enibodi, imbin oldei grebum im en pudum im langa jeil. Lagijat na imbin oldei dum, dumaji imbin wandi stapam det tjetj langa Jerusalem.

Wal ol detlot bilibamob bin ranawei ebriweya langa det dubala kantri gulum Judiya en Sameriya. Bat detlot speshalwan mishanri bin stap deya gin langa Jerusalem, en sambala men hubin bilib langa God bin kaman en gaburrumap det bodi blanga Stibin, en deibin ol krai blanga im detmatj.[a]

4 Wal detlot bilibamob hubin ranawei brom Jerusalem bin go ebriweya en dalimbat ola pipul det gudnyus. 5 Det biliba neim Filip bin go langa det taun langa Sameriya, en imbin dalimbat ola pipul deya blanga Jisas Krais det Boswan gulum Masaiya, 6 en wen ol detlot pipul deya langa det taun bin lisin im toktok, en wen deibin luk im dumbat speshalwan ting, deibin ol teiknodis langa im, 7 en imbin andimwei loda nogudbala spirit brom loda pipul, en wen detlot nogudbala spirit bin kamat brom olabat, deibin oldei jingat adbala, en Filip bin meigim loda leimbala pipul en kripul pipul gudwan du, 8 en ola pipul langa det taun bin brabli gudbinji.

9 Wal wan men neim Saiman bin jidan deya langa det taun, en imbin oldei dumbat loda klebabala ting, en imbin oldei meigim detlot pipul hatjamp langa im. Imbin reken miselp haibala men, 10 en ebribodi brom det taun, nomeda deibin haibala men o lobala, bat stil deibin ol teiknodis langa im, en deibin oldei tok, “Det men im garram pawa seim laik God garram. Wal det men na det drimin gulum Pawa.” 11 Lagijat na deibin tok blanga Saiman, dumaji brom longtaim imbin oldei dumbat olkain klebabala ting blanga olabat, en deibin oldei teiknodis langa im. 12 Bat afta wen deibin irrim Filip dalimbat det gudnyus blanga det neim blanga Jisas Krais weya God bin meigim im jidan Haibala Bos, deibin ol bilib langa Jisas Krais, en Filip bin beptaisim ol detlot men en wuman hubin bilib langa im, 13 en det men neim Saiman bin bilib langa Jisas Krais du, en afta wen Filip bin beptaisim im, imbin oldei go garram Filip olataim, en imbin oldei hatjamp wen imbin luk ola speshalwan ting weya Filip bin oldei dumbat.

14 Wal detlot speshalwan mishanri langa Jerusalem bin gedim nyus weya detlot pipul langa det kantri Sameriya bin bilib langa det wed blanga God, en deibin jandim Pida en Jon langa olabat, 15 en wen dubala bin kamat langa det taun, dubala bin prei blanga detlot pipul, 16 en dubala bin askim God blanga gibit olabat det Holi Spirit, dumaji Filip bin beptaisim olabat garram det neim blanga Jisas Krais. Bat det Holi Spirit nomo bin kaman langa olabat yet. 17 En wen Pida en Jon bin pudum dubala bingga langa olabat hed, det Holi Spirit bin kaman langa olabat na.

18 Wal wen det men neim Saiman bin luk det Holi Spirit bin kaman langa detlot pipul wen det dubala speshalwan mishanri neim Pida en Jon bin pudum dubala bingga langa olabat hed, imbin wandi gibit dubala mani blanga det pawa, 19 en imbin tok, “Yunbala gibit mi det pawa weya ai gin pudum main bingga langa enibodi hed en meigim det Holi Spirit kaman langa im.”

20 Wal Pida bin dalim im, “Yu reken yu gin baiyim det pawa brom God garram mani? Wal yu en yu mani garra go langa helfaiya. 21 Yu kaan joinin langa melabat en album melabat garram dijan wek, dumaji det hat blanga yu im nomo rait langa Godwei. 22-23 Yu garra tenim miselp brom det nogudbalawei blanga yu, en yu garra askim God blanga larramgo yu fri brom det nogudbala ting weya yu jinggabat, dumaji ai sabi yu stil brabli nogud insaid, en detlot nogudbala ting insaid langa yu stil taiyimap yu.” Lagijat na Pida bin tok.

24 Wal det men bin dalim Pida en Jon, “Yunbala garra prei blanga mi, dumaji ai nomo wandim det nogudbala ting garra hepin langa mi.”

25 Afta na Pida en Jon bin tok langa ola bilibamob, en deibin dalimbat olabat det wed blanga Jisas, en afta dubala bin gobek langa Jerusalem, en olawei langa roud dubala bin dalimbat det gudnyus langa ola pipul langa ebri taun langa det kantri Sameriya.

26 Brom deya wan einjul bin kamdan brom hebin, en imbin dalim Filip. Imbin tok, “Yu gidap en go langa det olwan roud weya im go sauthwei brom Jerusalem raidap langa det taun gulum Gasa.” 27 En Filip bin duwit langa det einjul.

Wal bifo det einjul bin tok langa Filip, wan men brom det kantri gulum Ithiyopiya bin go langa Jerusalem blanga weship langa det Juwish Serramoni Pleis. Det men bin det boswan blanga ola mani blanga det kwin langa det kantri, en wen imbin binij abumbat det serramoni langa Jerusalem, imbin gobek langa im kantri.

28 Wal wen Filip bin kamat langa det roud, imbin faindim det men deya garram im hos en bagi, en wen det men bin trebulin langa det roud, seimtaim imbin ridimbat det buk weya det speshalwan mesinja blanga God neim Aisaiya bin raidimdan.

29 Wal det Holi Spirit bin dalim Filip, “Yu go raidap langa det bagi en bulurrum im wansaid.” 30 En wen Filip bin go deya, imbin irrim det men bin ridimbat det buk blanga Aisaiya, en Filip bin askim im, “Yu sabi wanim yu ridimbat?”

31 Wal det men bin tok, “Ai kaan sabi, dumaji nobodi dalim mi.” En imbin dalim Filip blanga galimap langa im bagi en jidan wansaid langa im blanga dalim im.

32 Wal Filip bin galimap langa det bagi, en imbin luk det stori weya det men bin ridimbat, en det stori bin tok, “Im nomo bin tok enijing. Imbin jidan kwaitbala, jis laik det ship weya sambodi lidimbat im langa det yad blanga dai. En imbin jidan kwaitbala jis laik det lilwan ship wen olabat kadim im wuliwan heya. 33 Deibin tridim im nogudwei, en dei nomo bin gibit im feyago. Wal nobodi kaan tok enijing blanga im biginini olabat, dumaji deibin deigidawei im laif wen imbin yangmen.” Lagijat na det stori bin tok.[b]

34 Wal det men langa det bagi bin dalim Filip, “Yu dalim mi na. Blanga hu det mesinja bin tok langa dijan stori? Imbin tok blanga imselp o blanga sambodi?”

35 Wal brom det stori na Filip bin stat dalimbat det gudnyus blanga Jisas Krais langa det men.

36-37 Bambai na wen deibin stil trebulin langa det roud, deibin kamat langa wan pleis garram woda, en det men bin dalim Filip, “Woda iya luk! Enijing gin stapam mi blanga beptais?”

38 Wal det men bin stapam det bagi, en dubala bin gowin langa det woda, en deya na Filip bin beptaisim im, 39 en wen dubala bin kamat brom det woda, det Holi Spirit bin deigidawei Filip, en det men nomo bin luk langa im igin.

Brom deya det men bin kipgon langa im ron kantri, en imbin brabli gudbinji, 40 en Filip bin faindim miselp langa det taun gulum Eshdad.

Brom deya Filip bin go langa det taun gulum Sesariya, en olawei langa roud imbin dalimbat det gudnyus langa ola pipul langa ebri taun.

<- Eks 7Eks 9 ->