1 Bambai na Deibid bin jinggabat, en imbin tok, “Enitaim na King Sol garra kilim mi ded. Wal mobeda mi ranawei langa det kantri blanga ola Filastain pipul en jidan deya, dumaji if ai gowei brom main ron kantri, wal King Sol garra stap lukabatbat mi, en ai kaan wori blanga eni trabul.” Lagijat na Deibid bin tok miselp.

2-3 Wal Deibid en im 600 men olabat bin deigim olabat femili olabat, en deibin ol go langa King Ekish hubin san blanga Mayak deya langa det Filastain taun gulum Geth, en deibin jidan deya langa det taun garram King Ekish.

Wal Deibid bin jidan deya garram im dubala waif Ahinowam en Ebigeil. Ahinowam bin brom det taun gulum Jesriyel, en Ebigeil bin brom det taun gulum Kamul weya imbin jidan waif blanga det dedbala men neim Neibal basdam.

4 Wal wen King Sol bin gedim nyus weya Deibid bin ranawei brom det Isreil kantri en go langa det Filastain taun, imbin lafta gibap, en im nomo bin lukabat im enimo na.

5 Afta na Deibid bin dalim King Ekish, “If yu gulum mi fren, wal yu gibit mi wan lilwan taun weya melabat garra jidan, dumaji melabat nomo wandi jidan iya langa dijan taun weya king oldei jidan.”

6 Wal King Ekish bin gibit im det taun gulum Siklag, en brom det taim na ola king hubin kamat brom det Juda klen bin oldei jidan bos blanga det taun.

7 Wal Deibid en im femili olabat en ola men blanga im bin jidan deya langa det Filastain kantri wan yiya en fobala mants, 8 en deibin oldei go en fait detlot pipul langa detlot thribala kantri gulum Geshuwa, Gesi en Amalek. Brom longtaim detlot pipul bin jidanbat langa detlot kantri olawei langa det najawan kantri gulum Shuya raidap langa Ijip.

9 Wal Deibid en im men olabat bin oldei bidim detlot pipul, en deibin oldei kilim ola men en wuman ded, en deibin oldei deigidawei ola ship en buligi en dongki en kemul en ola enijing blanga olabat, en afta deibin oldei gobek langa King Ekish, 10 en imbin oldei askim Deibid, “Weya yumob bin go fait?”

Wal Deibid bin oldei tok trikibalawei, “Melabat bin go en fait sauthsaid langa det Isreil kantri gulum Juda, en melabat bin go en fait langa det kantri blanga ola Jeramiyel pipul, en melabat bin go en fait langa det kantri blanga ola Kenait pipul du.”

11 Wal wen Deibid bin oldei go en fait, imbin oldei kilim ebribodi ded, dumaji im nomo bin wandim enibodi blanga go en dalim detlot Filastain pipul deya langa det taun gulum Geth wanim bin hepin. Lagijat na Deibid bin oldei dumbat wen imbin jidan deya langa det kantri blanga ola Filastain pipul.

12 Wal King Ekish bin bilib langa Deibid, en imbin dalim miselp, “Imbin meigim im ron kantrimen olabat heidim im detmatj. Wal im lafta wek blanga mi olagija na.”

<- Fes Semyul 26Fes Semyul 28 ->