1 Wal aibin irrim brabli nogudwan stori blanga yumob Kristjan pipul deya langa Korinth. Ola odinri pipul nomo dum detkain nogudbala ting weya aibin irrim hepin langa yumob. Aibin irrim wan men deya bin merrit langa det sekan waif blanga im ronwan dedi.✡Dyud 22:30 2 En yumob toktok praudbalawei deya! Wal dijan nogudbala ting nomo bin meigim yumob nogudbinji, en yumob nomo bin andimwei det men brom yumob tjetj.

3-4 Wal nomeda mi nomo deya langa yumob garram main bodi, bat stil main filing im deya garram yumob, en aibin olredi jadjim det men hubin merrit langa im dedi waif jis laik ai bina dum if ai bina deya garram yumob, dumaji Jisas Krais det Bos blanga wi bin gibit mi det rait blanga jadjim im. En wen yumob majurrumap miselp blanga miting, main filing garra deya garram yumob, en det pawa blanga Jisas Krais det Bos blanga wi garra deya du, 5 en deya na langa det miting yumob garra andimwei im brom det tjetj en hendimoba det men langa Seitin blanga binijimap det bodi blanga im wulijim God garra seibum det spirit blanga im langa det dei weya Jisas Krais det Bos blanga wi garra kambek.

6 Wal ai dalim yumob. Im nogud wen yumob toktok praudbalawei en reken miselp yumob gudbala, dumaji yumob sabi det nogudbala ting weya det men bin dum garra meigim ebrijing nogud. Im jis laik det raising weya wi pudum langa daga. Nomeda wi pudum oni lilbit raising, bat stil im meigim det daga go bigwan.✡Galei 5:9

7 Wal yumob garra tjakidawei det nogudbala ting en jidan gudbalawei, dumaji God bin meigim yumob nyubala pipul. Im jis laik langa det Pasoba Serramoni weya deibin oldei tjakidawei det raising en meigim det nyubala daga nomo garram raising.

Wal Jisas Krais bin dai jis laiga sekrifais ofring blanga wi jis laik det lilwan ship weya deibin oldei kilim langa det Pasoba Serramoni,✡Eksa 12:5 8 en blanga tharran na wi kaan jidan garram nogudbala filing blanga enibodi en dumbat olkain nogudbala ting. Wi garra jidan gudbalawei insaidwei en trubalawei atsaidwei.✡Eksa 13:7; Dyud 16:3

9 Wal langa det leda weya aibin jandim langa yumob basdam, aibin dalim yumob nomo blanga meigim miselp fren blanga detlot nogudbala pipul weya oldei silipsilip gija en dum olkain nogudbala ting lagijat.

10 Wal wen aibin tok “nogudbala pipul”, maitbi yumob bin reken aibin tok blanga ol detlot odinri pipul hu oldei silipsilip gija en jidan gridibala en stilimbat enijing en weshipbat olkain drimin. Bat ai nomo bin tok blanga detlot odinri pipul, dumaji if ai bina dalim yumob nomo blanga tok langa detlot odinri pipul, wal yumob bina lafta gowei brom dijan wel blanga gidawei brom detlot pipul.

Yu si? Aibin tok blanga Kristjan pipul. 11 En ai garra dalim yumob streidat iya langa dijan leda na. If enibodi gulum miselp Kristjan, en im kipgon dumbat detkain nogudbala ting, wal yumob kaan tok langa im. If eni Kristjan pipul oldei silipsilip gija o jidan gridibala o weshipbat olkain drimin o tokabat gija o jidan drangginbala o stilinbala, wal yumob kaan jidan fren garram detkain Kristjan pipul en dagat daga garram olabat.

12-13 Yumob sabi? Wi nomo garram det rait blanga jadjim ol detlot pipul hu nomo gulum miselp Kristjan, dumaji God na garra jadjim olabat. Bat wi garram det rait blanga jadjim detlot Kristjan pipul hu jidan langa wi tjetj, en wen dei dum nogudbala ting, wi garra jadjim olabat, dumaji langa oltestaman im tok, “Yumob garra andimwei detlot nogudbala pipul brom yumob tjetj.”✡Dyud 13:5; 17:7

<- Fes Karinthiyans 4Fes Karinthiyans 6 ->