1 Wal Juda bin abum faibala san neim Peres, Hesran, Kamai, Huwa, en Shobal. 2 Shobal bin det dedi blanga Riyaiya, en Riyaiya bin det dedi blanga Jeihath, en Jahath bin det dedi blanga Ahumai en Lahad. Olabat bin grengrenfathamob blanga detlot pipul brom Sora.

3-4 Wal Huwa bin det feswan san blanga Keilab en im waif neim Efrath, en im bigininimob bin stadimap det taun gulum Bethlahem. Huwa bin abum thribala san neim Itam, Penyuwel en Isa. Itam bin abum thribala san neim Jesriyel, Ishma en Aidbash, en wanbala doda neim Heisalelponai. Penyuwel bin stadimap det taun gulum Gedowa, en Isa bin stadimap det taun gulum Husha.

5 Wal Eshuwa hubin stadimap det taun gulum Tekowa, imbin abum dubala waif neim Hela en Neira. 6 Eshuwa en Neira dubala bin abum fobala san neim Ahusam, Hefa, Temeni en Heihashtari. 7 En Eshuwa en Hela dubala bin abum thribala san neim Sereth, Isa en Ithnan.

8 Wal Kos bin det dedi blanga det dubala san neim Enab en Sobeba en imbin grengrenfatha blanga detlot femili hubin kaman brom Eiherel det san blanga Haram.

9 Wal wanbala men neim Jeibes imbin jidan brabli haiwan men langa im femilimob. Im mami bin gibit im det neim Jeibes, dumaji imbin abum adtaim wen imbin abum det beibi. 10 Jeibes bin prei langa det God blanga ola Isreil pipul. Imbin tok, “Dedi langa top, yu album mi, en gibit mi brabli gudwan kantri. Yu jidan garram mi, en seibum mi brom ola nogudbala ting weya oldei ardimbat main bodi.” Lagijat na Jeibes bin tok. En God bin kain langa im en imbin gibit im ebrijing weya imbin askim im.

11 Wal Keilab bin det braja blanga Shuha en imbin abum san neim Mehira. Mehira bin det dedi blanga Eshtan, 12 en imbin abum thribala san neim Bethrafa, Paseya, en Tehina. Tehina bin stadimap det taun gulum Neihesh. Det femili lain blanga dislot men bin jidan deya langa det taun gulum Reika.

13 Wal Kenas bin abum dubala san neim Othniyel en Seraiya. En Othniyel bin abum dubala san du, neim Hethath en Miyanothai. 14 En Miyanothai bin det dedi blanga Ofra.

Wal Seraiya bin det dedi blanga Jowab hubin stadimap det pleis gulum Andikraf weya ola pipul hubin meigimbat brabli gudwan andikraf bin jidan.

15 Wal Keilab, det san blanga Jefana bin abum thribala san neim Airu, Ela en Neim. Ela bin det dedi blanga Kenas.

16 En Jehalalel bin abum fobala san neim Sif, Sifa, Tairiya en Eisarel.

17-18 En Esra bin abum fobala san neim Jetha, Mered, Ifara en Jeilan. Wal Mered bin merrit langa Bithiya, en imbin det doda blanga det king brom Ijip. Dubala bin abum doda neim Miriyam en dubala san neim Shamai en Ishba. En Ishba bin stadimap det taun gulum Eshtamowa. Wal Mered bin merrit naja wanbala gel brom det Juda klen, en deibin abum thribala san. Det feswan san neim Jerad bin stadimap det taun gulum Gedowa, en Hiba bin stadimap det taun gulum Sako, en Jekuthiyel bin stadimap det taun gulum Seinowa.

19 Wal Hodaiya bin merrit langa det sista blanga Neiham. Olabat bigininimob bin stadimap det femili gulum Gam, en deibin jidan langa det taun gulum Keila. En det najawan femili gulum Meiyakath, deibin jidan langa det taun gulum Eshtamowa.

20 Wal Shimon bin abum fobala san neim Emnon, Rina, Benanan en Tailan.

En Ishai bin abum dubala san neim Soheth en Binsoheth.

21 Wal Shela bin wanbala san blanga Juda, en sambala femili lain weya bin kamat brom Shela bin Yura hubin stadimap det taun gulum Leka, en Lada hubin stadimap det taun gulum Maresha, en deibin ol meigim matiriyal en deibin jidan langa det taun gulum Bethabiya. 22 Jokim en im pipul olabat bin jidan langa det taun gulum Koseba, en Jowesh en Saraf dubala bin merrit dubala gel brom Moweb, en deibin jidan langa Bethlahem. 23 En deibin oldei meigimbat pot garram klei blanga det king en deibin jidan langa det dubala taun gulum Netaim en Gedara. Dislot stori bin kaman brom longtaim.

24 Wal Simiyan bin abum faibala san neim Nemyuwel, Jeimin, Jarib, Sera en Shaul. 25 En det san blanga Shaul bin Shalum, en im grensan bin neim Mibsam en det san blanga im bin neim Mishma. 26 En Mishma bin abum san neim Heimyuwel. Heimyuwel bin det dedi blanga Sekura en Sekura bin det dedi blanga Shimiyai. 27 Shimiyai bin abum 16 san en siksbala doda, bat im brajamob nomo bin abum bigmob biginini, wulijim det klen blanga Simiyan nomo bin go bigwan laik det klen blanga Juda.

28-31 Wal raidap langa det taim na wen Deibid bin jidan king det femili lain blanga Simiyan bin jidan langa dislot taun gulum Biyashiba, Molada, Heisashuwal, Bila, Isim, Tolad, Bethyuwel, Homa, Siklag, Bethmakaboth, Heisasusim, Bethbiri en Sharaiyim. 32 En deibin jidan langa najalot lilwan taun gulum Itam, Eiyin, Riman, Token en Eshan, 33 en detlot najalot lilwan taun raidap langa Beilath. Deibin raidimdan ola femilimob en weya olabat bin oldei jidan.✡Josh 19:2-8

34-38 Wal dislot men bin bos blanga olabat femili, Meshabab, Jeimlek, Josha det san blanga Amasaiya, Jowal, en Jeihu det san blanga Joshabaiya. Joshabaiya bin det san blanga Seraiya en Seraiya bin det san blanga Eisiyel. Dislot du bin bos blanga olabat femili, Eliyeinai, Jakoba, Jeshohaiya, Esaiya, Ediyel, Jesimiyel, Benaiya, Sisa, hubin det san blanga Shifi, en Shifi bin det san blanga Elan. En Elan bin det san blanga Jedaiya, en Jedaiya bin det san blanga Shimri en Shimri bin det san blanga Shemaiya.

39 Dumaji olabat femili bin kipgon gro bigwan na, deibin spredat sangodanwei raidap gulijap langa det taun gulum Gera, en olabat shipmob bin dagadagat gras sanraiswei langa det hil kantri gulijap langa det taun. 40 Deibin faindim gudwan kantri weya growimap loda gudwan daga, en imbin brabli gudwan en kwaitbala pleis deya.

41 Basdam detlot pipul hubin jidan deya bin brom det femili lain blanga Hem. Bat langa tharran taim na wen Hesakaiya bin jidan king blanga Juda, detlot lidamob blanga Simiyan bin go langa Gera en deibin bitsimap ola tent en kemp blanga det femili lain blanga Hem en detlot Meyunait pipul hubin jidan deya. Deibin andimwei detlot pipul brom deya, en deibin jidan deya miselp na, dumaji imbin gudwan kantri blanga olabat shipmob. 42 Bambai 500 men blanga det klen blanga Simiyan, en deibin go sanraiswei langa Idam. Detlot san blanga Ishai bin lida blanga olabat, en deibin neim Pelataiya, Niyaraiya Refaiya en Yusiyel. 43 Deya na deibin binijimap detlot Amalekait pipul en deibin jidan deya olataim na.

<- Fes Kranakuls 3Fes Kranakuls 5 ->