1 О Иуда андэ кодыя время ашадя пэстерэ пхралэн тай жыля тэ жувэл каринг екх адуламеё, савэс акхарэнас Хира. 2 Котэ о Иуда дикхляпэ щяса ханаанеёстеря, савэс акхарэнас Шуа. О Иуда ля ла пала пэстэ тай ашыля тэ жувэл ласа. 3 Вой ашыля пхари тай андя шавэс, савэсти дя алав Эро. 4 Вой упалэ ашыля пхари тай андя шавэс тай дя лэсти алав Онано. 5 Вой андя инке екхэ шавэс тай дя лэсти алав Шэло. Вов аракхадиляпэ латэ андо Хезиво.

6 О Иуда ля лэ Эрости, пэстерэ англунэ шавэсти, ромня, савя акхарэнас Фамарь. 7 О Эро, лэ Иудаско англуно шаво, сас вырыто англа лэ РАЕСТИ якха, тай о РАЙ умардя лэс. 8 Тунче о Иуда пхэндя лэ Онаности:

— Ту трэбуй тэ совэс терэ пхралэстеря ромняса, ке сан пхрал латерэ ромэсти: трэбуй тэ стерэс бэятонэн важ теро пхрал[a].

9 Ай о Онано ганэлас, со э бэяцэ авэна най лэстерэ, тай кала совэлас пэстерэ пхралэстеря ромняса, вов шолас пэ пхув, соп тэ на стерэл бэятонэн важ пэско пхрал. 10 Кода, со вов терэлас, сас вырыто англа лэ РАЕСТЕРЭ якха, пала кода Вов умардя и лэ Онанос.

11 Тунче о Иуда пхэндя пэстеря боряти ла Фамаряти:

— Жув сар пхивли андо чер кай теро дад, жыпокэ на вибарёла мэрно шаво о Шэло.

О Иуда гындосарэлас: «Сар бэ тэ на мэрэл и о Шэло, сар лэстерэ пхрала».

Э Фамарь жалтар тэ жувэл кай пэско дад.

12 Пай бут время лэ Иудасти ромни, лэ Шуастери щей, муля. Кала о Иуда уляпэ ла грижатар, вов жыля андэ Тимна каринг э мануша, савэ стрыжынас лэстерэ бакрэн, тай лэско амал о Хира адуламеё жыля лэса. 13 Ла Фамаряти пхэндэ:

— Теро састро жал андэ Тимна тэ стрыжый пэстерэ бакрэн.

14 Тунче вой изля пар пэстэ э пхивликани йида, ушарадя пэско муй, соп тэ на гатярэн ла, тай бэшля паша лэ форости вудара паша Эноимо, о форо па дром каринг э Тимна. Вой дикхэлас, кай о Шэла вибариля, ай ла на отдинэ лэсти ромняса.

15 Кала о Иуда додикхля ла, вов гындосардя, со кода лубни, пала кода со лако муй сас ушардо. 16 Вов бандиля па дром, поджыля латэ тай пхэндя:

— Авэн, дэ манди тэ совав туса.

Вов на ганэлас, со кода лэсти бори. Вой пхэндя:

— Ай со ту дэса манди пала кода, соп тэ совэс манца?

17 Вов пхэндя:

— Мэ бишалава тут бузнорэс анда мэрно гурто.

Вой пушля:

— Ай ту дэса манди варисо, жы кай на бишалэса лэ бузнорэс?

18 Вов пхэндя:

— Со тэ дав тути?

Вой пхэндя:

— Тери печять пэ дурюры тай о дэсто, саво тутэ андо васт.

Вов дя лати кода, со вой мангэлас, сутя ласа, и Фамарь ашыля пхари лэстар. 19 О Фамарь ужыля котар, изля пар пэско косно тай упалэ ля пэр пэстэ э пхивликани йида.

20 Андэ кодыя время о Иуда бишалдя пэстерэ амалэса лэ адуламеёса бузнорэс, соп тэ залэл палпалэ э печять тай о дэсто кодыла жувлятар, ай о амал на аракхля ла. 21 Вов пушля кай э катутнэ мануша:

— Кай сыни кодыя лубни, сави бэшэлас паша дром андо Эноимо?

Вонэ пхэндэ:

— Катэ на сас нисави лубни.

22 Вов рисайля каринг о Иуда и пхэндя:

— Мэ на аракхлэм ла, ай э мануша колэ тханэстерэ пхэндэ: «Катэ на сас нисави лубни».

23 О Иуда пхэндя:

— Мэк ашавэл пэсти кода, со ля, ке э мануша асана амэндар. Ке мэ бишалдэмас лати лэ бузнорэс, ай ту ла на аракхлян.

24 Пай трин шона лэ Иудасти пхэндэ:

— Тери бори э Фамарь тердя лажаво тай колэстар ашыля пхари.

О Иуда пхэндя:

— Мэк виндярэн ла тай спхабарэн!

25 Кала ла ундярэнас, вой бишалдя каринг о сатро кацавя думаса:

— Мэ сым пхари колэ манушэстар, касти сынэ кадыя печять тай о дэсто.

Инке вой пхэндя:

— Дикх, на гатярэс, касти кадыя печять, э дури тай о дэсто?

26 О Иуда гатярдя лэн тай пхэндя:

— Вой май чячюни мандар, пала кода со мэ на отдэм ла пала мэрнэ шаво Шэло.

О Иуда будэр на совэлас ласа.

27 Кала авиля Фамаряти время тэ анэн, латэ андо йило сас дуй шаворэ-близнецуря. 28 Кала вонэ аракхадёнас, екх лэндар вишутя о васт аври. Тунче э жувли, сави лэлас лэ бэятонэн, пхангля пэ кодыва васт лоло тхав и пхэндя:

— Кадыва вижыля англуно.

29 Ай вов цырдя о васт палпалэ, тай вижыля лэско пхрал. Тунче вой пхэндя:

— Сар ту промардяпэ?

Тай дя лэсти алав Парэцо[b].

30 Пала лэстэ вижыля и кодыва, савэстэ по васт сас лоло тхав. Тай динэ лэсти алав Зарахо[c].

<- Англунимос 37Англунимос 39 ->